Knăm bi mjing ayŏng adei mnuih Êđê dưi mkŏ mjing mâo dua nah gŏ sang, mnuih ƀuôn sang hlăm ƀuôn jĕ giăm taih kbưi nao dlăng. Anei jing sa knăm bi mguôp klei khăp ayŏng adei, găp djuê truh kơ ênuk anak čô. Pô riu yang Y-Wươn Niê Kdăm (60 thŭn, ti ƀuôn Wiâo A, să Ea Hồ, kdriêk Krông H Nang, čar Dak Lak brei thâo, mnŏng ngă yang mâo băn Êđê, kông leh anăn mnŭ. Khădah snăn, tơdah amâo ênŭm mnơ̆ng ngă yang ăt dưi mkŏ mjing mơh kyua mnuih Êđê lač klei khăp jing yuôm bhăn hĭn. Knăm bi mjing dưi mkŏ mjing kyua mơ̆ng ai tiê dua nah čŏng ngă, amâo kyua duah klei tŭ dưn prăk mah ôh. Leh anăn boh nik, phung mkŏ mjing ayŏng adei brei mâo ƀô̆ mta êlâo kơ 5 mmông aguah čiăng ƀuh pô sang čuh ŭn, mprăp mnơ̆ng ngă yang, kă čeh kpiê…

 “Tơdah bi mjing ayŏng adei snăn iêô dua nah gŏ sang, găp djuê dlăng leh anăn thâo mơ̆ng ară anei, dua tĭng gŏ sang thâo jing ayŏng adei hdơ̆ng pô. Sa amĭ, sa ama. Leh anăn čiăng kơ dua ayŏng adei bi khăp msĕ si sa amĭ, bi mđup brei băn, mbuh kông”.

 Tơdah jih jang hơĭt leh anôk dôk, phung mniê khăng dôk nah Yŭ hlăm sang dlông, bi phung êkei dôk ti nah Dưr, phung thâo mbruă tông čing hưn mthâo knăm bi mjing mphŭn kčưm. Dua čô bi mjing dôk giăm hlao mnơ̆ng ngă yang leh anăn mnơ̆ng ngă yang. Phung dôk gŭ riêng gah dlăng knăm anei mâo pô riu yang, khua mduôn, khua ƀuôn amâodah phung mâo kơhưm. Pô riu yang Y-Wươn Niê Kđăm brei thâo, hlăm knăm bi mjing, klei bhiăn mbuh kông kơ pô mjing yuôm bhăn snăk. Kông dưi mbuh jing sa mnơ̆ng bi knal yuôm bhăn bi êdah klei bi mguôp plah wah dua ayŏng adei bi mjing. Pô riu yang Y-Wươn Niê Kdăm mblang:

 “Êlâo kơ mbuh kông snăn ngă yang hŏng mnŭ, čeh kpiê čiăng hưn kơ aduôn aê atâo atiêt. Mbuh kông hưn kơ Yang mơ̆ng ară anei jing ayŏng adei sa boh sang, srăng bi kah mbha, bi đru hlăm klei hdĭp. Bruă mbuh kkông jing yuôm bhăn snăk, ăt msĕ si klei bi ƀuăn dua ung mô̆ mơh, dua čô ayŏng adei bi mjing ƀuăn bi khăp, kriê dlăng, bi đru. Leh anăn mơ̆ng ară anei jih ƀuôn sang jĕ giăm taih kbưi thâo sơăi, diñu dua jing ayŏng adei sa boh sang”.

Leh knăm ngă yang, dua čô bi mjing msĕ si ayŏng adei sa amĭ, mơak amâodah ênguôt, bi khăp, bi đru hlăk tuôm hŏng dleh dlan, bi mđĭ ai ngă bruă, răng mgang truh kơ ênuk anak čô. Pô riu yang Y-Wươn Niê kdăm lŏ brei thâo:

“Ară anei mnuih ƀuôn sang ăt mkŏ mjing knăm bi mjing. Kâo bi mĭn knăm bi mjing yuôm bhăn snăk, mđĭ ai tiê bi hgŭm êpul êya, mnuih ƀuôn sang hrăm mbĭt răng kriê knhuah hdĭp êpul êya. Sa ƀĕ kyâo amâo dưi jing kmrơ̆ng, lu kyâo bi mguôp dưi jing kmrơ̆ng prŏng. Čang hmăng anak čô êdei anei srăng hrăm mbĭt hriăm tông čing, hriăm duê leh anăn djă pioh knhuah dhar kreh djuê ana pô.”

 Knăm bi mjing ayŏng adei bi êdah mnuih Êđê dlăng myuôm klei khăp hlăm êpul êya leh anăn jăk siam, mtô anak čô mđing kơ klei jăk siam hlăm klei hdĭp. Ară anei, klei bhiăn anei ăt khăng dưi mkŏ mjing nanao hlăm ƀuôn sang. Leh knăm bi mjing, amâo djŏ knŏng dua gŏ sang jing ayŏng adei jing sa boh sang ôh, bi đru hlăm djăp bruă, hrăm mbĭt hgao klei dleh dlan ƀiădah lŏ bi mguôp grăp čô mnuih sa djuê ana bi hgŭm mkŏ mkra ƀuôn sang ƀrư̆ trei mđao, mdrŏng sah./.