Hŏng adiê mđiă bhang ti lăn dap kngư, mâo dŭm ênai mơ̆ng klei kdŏ Lăm Vông, ênai hgơr, ênai čing tinei hlăk dôk mtluk mtlak hŏng knăm prŏng hlăm thŭn. Knăm Bunpimay, amâodah lŏ pia knăm bi sač êa, jing knăm kčưm kơ thŭn mrâo yap hlue thŭn klei đăo Ƀôđa, lehanăn ăt jing wưng kih bi doh jih ya mta klei amâo mâo jăk amâo myun, hmăng hmưi kơ klei hnŭk ênang jăk mơak.

Lê Văn Nuôi, K’iăng khua knơ̆ng bruă sang čư̆ êa kdriêk Buôn Đon brei thâo, thŭn anei, knăm Bunpimay ti Buôn Đon lŏ mâo klei bi hdơr 30 thŭn hrue mkŏ mjing kdriêk Buôn Đon, 50 thŭn hrue kwar dhŭng mâo klei êngiê, mluh lir lăn čar, kkuh drông ênuk gưl mđĭ kyar mrâo, hŏng klei gĭt gai mơ̆ng bruă sang čư̆ êa dua gưl:

 “Thŭn anei bi hdơr hrue hƀuê ênuk yuôm bhăn jing thŭn knhal tuič mơh lăm lui bruă sang čư̆ êa gưl kdriêk, kyuanăn čiăng djă pioh kơ bruă sang čư̆ êa să, snăn diñu srăng hdơr kơ knhuah gru anei. Thŭn anei ăt mkŏ mjing lu bruă ngă mkăn, sitôhmô hâo hưn kơ plao ksĭ Hoàng sa, Trường Sa jing dŏ Việt Nam, dua lĕ srăng mâo êpul kdŏ muiñ mơ̆ng kdriêk Lăk nao bi mguôp dhar kreh kdŏ muiñ hŏng mnuih M’Nông lehanăn Lào.”

Mbĭt hŏng mnuih ƀuôn sang phŭn agha jing mnuih Lao, lu mnuih ƀuôn sang djuê ana mkăn dôk hdĭp mda ti Buôn Đon ăt truh mđrăm mbĭt hŏng knăm  Bunpimay. Vy Thị Mới, djuê ana Nùng, ti să Ea Bar yăl dliê klei mơak mñai mơ̆ng pô leh mâo nao hlăm knăm ka mrai, bi mnei kơ yang boda, lehanăn bi sač êa:

 “Gưl tal êlâo mâo nao hlăm knăm thŭn mrâo mơ̆ng Lao kâo ƀuh jing mơak êdi, hŏng ai êwa mơak mñai, kâo mâo klei kă mrai ti kngan bi knăl kơ klei mbhă myun, lehanăn ba wĭt klei jăk siam hlăm klei hdĭp”.

 Klei kă mrai ti kngan, tui si klei bhiăn mnuih Lao, anei jing klei yuôm bhăn hlăm akŏ thŭn mrâo, mâo mnuih kŏ arăng bâo hlâo arăng yap diñu ka brei mrai hlăm kkuê kngan lehanăn hơêč hmưi klei jăk jĭn kơ digơ̆. Knăm bi mnei yang boda, amâodah klei mbuôn čuah, lehanăn klei bi sač êa bi êdah klei tŭ dưn pioh mđĭ ai, lač kơ klei hdĭp jăk yâo. Mblang kơ klei yuôm bhăn mơ̆ng knăm anei, Y Nô Ly Kbur, mnuih Lào hdĭp ti să Krông Ana, lač:

 “Tơdah drei bi ka mrai ti kkuê kngan snăn phung kŏ arăng bâo hlâo arăng yap ka mrai lehanăn mâo klei hơêč hmưi čiăng kơ drei mâo klei êđăp ênang, jăk jĭn, bi kleoi muôn čuah jing bi knăl kơ klei lăm lui jih klei hnĭng ênguôt, klei amâo mâo jăk hlăm klei hdĭp drei, čiăng kơ drei mâo sa klei hdĭp mrâo myuin mdan mơak mñai”.

Knăm Bunpimay ti Buôn Đon knư̆ hĭn mơh lŏ bi mtluk mtlak mơak mñai hlăm ênai čing hgơr,. Klei bi kdŏ Lăm Vông – djuê ana Lao. H’ưng Ê Ban, ti buôn Jơ̆ng Lăn, să Krông Ana, kdriêk Buôn Đon lač:

 “Kâo nao hlăm knăm mơak Lao anei jing gưl tal 4 leh, thŭn anei kdriêk mkŏ mjing prŏng hĭn, lehanăn mâo lu mnuih ƀuôn sang nao bi mguôp. Kâo ƀuh knăm thŭn mrâo mơ̆ng Lao mâo klei yuôm bhăn prŏng snăk, jing klei bi mguôp anak mnuih, bi mguôp jih jang djăp djuê ana mbĭt. Kâo ƀuh jing mơak snăk, msĕ si ară anei mâo êliang kdŏ Lăm vông mtluk mtlak kâo ƀuh asei mlei kâo čiăng hlŏng hlue kdŏ mơh”.

Amâo mâo djŏ knŏng jing anôk bi klin dhar kreh, knăm Bunpimay lŏ bi hdơr dŭm knhuah gru dhar kreh, klei thâo bi mguôp plah wah dua djuê ana Việt Nam – Lào. Bi Đinh Công Trình, kahan hđăp tuôm bi blah leh ti Lao mơ̆ng thŭn  1969 - 1973, snăn anei jing wưng hdơr knga yuôm bhăn:

 “Êlâo dih tĭng kơ nah dih mâo klei đru mơ̆ng mnuih ƀuôn sang Lao dơ̆ng mơ̆ng asăr hra, êa mnăm, tơl ruă duam mâo klei đru ba mdrao mgŭn. Hrue anei truh kơ anei nao hlăm knăm anei kâo ƀuh jing mơak êdi, mâo klei lŏ hdơr knga, lŏ hdơr kơ klei jăk jĭn mnuih ƀuôn sang Lao lehanăn čang hmăng kơ  lehanăn knŭk kna dua ala čar mđing hĭn mkŏ mjing klei bi hgŭm Việt Nam – Lào mâo nanao klei mtah mda jăk siam”.

Knăm Bunpimay, mơ̆ng mnuih Lào ti Buôn Đon – amâo mâo djŏ knŏng jing knăm mơak kơ sa djuê ana, ƀiădah lŏ jing leh klei knăl kơ klei thâo bi mguôp, hrăm mbĭt dhar kreh plah wah dŭm djuê ana ayŏng adei hlăm kring knông lăn čar Daklak./.