Knăm hua êsei mrâo mnuih M’Nông mphŭn kčưm mơ̆ng leh khua mduôn lehanăn pô sang mprăp leh djăp ênŭm mnơ̆ng pioh ngă yang čiăng akâo kơ mngăt mdiê wĭt kơ hjiê, ti êñan hjiê mprăp dŭm kyâo mnga, mâo mkra mơ̆ng alê, mjing msĕ si rup amung mdiê. Tui si klei mĭn mnuih M’nông, hŏng bruă bi msiam msĕ snăn kñăm krơ̆ng kơ mngăt mdiê dôk hlăm hjiê, amâo lŏ kbiă hiu kơ êngao ôh. Knăm huă êsei mrâo mâo mkŏ mjing ti sang, snăn phung mniê bi tăp mdiê, mâo braih knă êsei mrâo jing mdiê mrâo leh wĭt puôt hlăm hma, êsei mrâo anei dưi mprăp mbĭt hŏng jih jang mnơ̆ng pioh kơ klei ngă yang.

 “Mdiê hlăm hma leh ksă, kmŭn leh prŏng, kbâo leh mmih, truh leh yơh yan puôt êmiêt, hmei mkŏ mjing klei ngă yang huă êsei mrâo iêo jak aê aduôn atâo atiêt, lehanăn jih jang yang, brei kơ hmei dưi iêo mngăt mdiê wĭt kơ hjiê. Hrue anei hmei mkŏ mjing huă êsei mrâo, brei kơ kgă huă êlâo hmei huă êdei, brei kơ jông huă êlâo hmei huă êđei, brei kơ hwar huă êlâo hmei huă êdei, brei kơ dhŏng huă êlâo hmei huă êdei, hmei hdơr knga êsei ti čŏng gŏ, hmei hdơr knga brei mnăm kpiê êa tal êlâo, hmei hdơr knga brei ƀơ̆ng êrah mnŭ...”

Ruĕ klei riu yang, ñu mă mnŭ khăt êrah, lehanăn tak êrah mnŭ, lehanăn mă ƀiă kpiê hƀrah ti êñan hjiê hŏng klei mĭn jing čiăng krơ̆ng mngăt mdiê dôk hŏng găp djuê, čiăng kơ jăk êa hlĭm hjan, mnơ̆ng buh pla čăt đĭ, mnuih hlăm găp djuê suaih pral, êđăp ênang.

   Klei ngă yang huă êsei mrâo mơ̆ng mnuih M’nông kreh mkŏ mjing hlăm dua hrue: Hrue tal êlâo ngă yang kơ yang dliê, yang êa, yang mdiê ti hma, êsei hlăm hlao mâo mdơ̆ng pioh ngă yang, leh kơnăn grăp čô mnuih nao bi puôt lehanăn ba wĭt mdiê tuh hlăm brŏng pia jing iêo mngăt mdiê wĭt kơ sang. Hrue tal dua, leh iêo mngăt mdiê wĭt kơ sang leh, pô sang leh ruĕ ngă yang mprăp êsei hdjam iêo jak găp djuê hriê bi huă ƀơ̆ng, hơ̆k mơak kơ sa thŭn čoh bruă ngă hma suăi êmăn mâo ba wĭt leh mdiê kơ sang.    

Y Tiêng, ti să Nâm Nung, kdriêk Krông Nô, čar Đăk Nông brei thâo knăm huă êsei mrâo jing hrue hơ̆k mơak kơ mnuih Mnông. Grăp čô mnuih srăng hiu huă mnăm truh hŏng grăp boh sang mâo huă êsei tal êlâo mơ̆ng yan buh pla, bi hơêč hmưi klei suaih pral hdơ̆ng găp mâo klei myun dan.

 “Ngă yang kơ mdiê, iêo mngăt mdiê mphŭn dô adih jing yuôm bhăn, jing hrue mơak kơ bon, jing msĕ hŏng thŭn mrâo ară anei anăn yơh. leh klei ieoe mngă mdiê, puôt mdiê ksă tal êlâo hlăm hma ba wĭt tăp mâo brai knă lehanăn iêo jak găp djuê ƀuôn sang hriê huă ƀơ̆ng. Tal êlâo jing riu yang kơ mdiê, lehanăn ngă yang asei hơêč hmưi kơ klei suaih pral kơ mnuih hlăm sang, hŏng jih jang mnơ̆ng ƀơ̆ng huă mâo mprăp leh hlăm hlao duh kơ yang”.

 Mnuih M’nông mưng iêo kơ djăp mta yang, yap jih jang mnơ̆ng mâo yang sơăi, mơ̆ng diêt hlŏng kơ prŏng. Snăn klei mkŏ mjing anôk ngă yang ăt dưi mkŏ mjing hŏng klei mpŭ. Bơ̆ Khiêm, ƀon U3, wăl krah Ea Tling, kdriêk Cư Jut, čar Đăk Nông brei thâo:

 “Êlâo kơ klei ngă yang hlăm brô sa hrue kăm, arăng mprăp anôk riu yang, kñăm čiăng iêo jih jang phung yang hriê huă mnăm mbĭt hŏng ƀuôn sang. Anôk ngă yang mâo mdơ̆ng gơ̆ng kŭt amâo mâo dlông ôh, mkra hŏng lu gru grua mkra rup čĭm, rup hlô rang hŏng đĭng đrao đĭng m’ô, mâo êriâo, mâo rup amung mdiê hrĭ hŏng alê. Ti krah anôk riu yang mkra hlao lat hŏng alê dưm mnơ̆ng ngă yang msĕsi boh kŏ ŭn, amâodah êmô kbao, êsei čeh kpiê kă ti gơ̆ng ngă yang, mâo mbĭt hŏng dŭm mta boh kroh mnơ̆ng jing boh mnga mơ̆ng bruă pla mjing.

Kdrêč riu yang jing bŏ hŏng klei mpŭ kyuadah anei jing klei iêo yang, iêo djăp mta yang hriê bi êdah klei hmăng hmưi mơ̆ng ƀuôn sang čiăng kơ phung yang suôt hĕ jih yang jhat yang liê, hlô dliê jhat ƀai.  Thị Bah, ti să Dak Ndrung, kdriêk Dak Song, čar Dak Nông lač:

“Klei huă êsei mrâo bi êdah ai tiê thâo hdơr knga kơ yang mdiê, lehanăn jih jang yang adiê, hmăng hmưi kơ klei suaih pral truh hŏng găp djuê, dah thâo mâo ngă yang hŏng ŭn, dah hơăi hŏng mnŭ, kñăm čiăng kơ yang mdiê dôk hŏng găp djuê, čiăng kơ găp djuê trei mđao”./.