Hlăk mdiê mphŭn ktrŏ boh, dơ̆ng ksă, mnuih Jrai ngă Yang Hri (ngă yang mdiê). Ti kdrăn lŏ, anôk ngă yang Hri, arăng dưm sa boh čeh kpiê ti nah Ngŏ. Hlue si pô riu yang Y-Phĭ Mjâo ti ƀuôn A1, wăl krah Ea Sup, kdriêk Ea Sup, čar Dak Lak, čeh kpiê dưm nah Ngŏ anei jing pioh kơ Yang gah- ngŏ, jing yang ksiêm dlăng kluôm leh anăn wăt phung yang hlăm adiê răng mgang ƀuôn sang, pưk hma. Pô riu yang Y-Phĭ Mjâo brei thâo:“Anăn jing sĭt buh mdiê pla ktơr. Ngă Yang Hri anei jing klei bhiăn hdĭp mda mơ̆ng đưm mnuih Jrai, ngă Yang Hri Yang Hrai, mnuih Jrai pia jing Trum, mơ̆ng ênuk amĭ ama kkiêng leh. Mnuih Jrai ngă yang mdiê čiăng dưi akâo ngă bruă găl jăk, kkuih amâo bi rai pưk hma.”

Čiăng ngă Yang Hri, khua mduôn ti ƀuôn srăng ruah hruê jăk leh anăn hưn hŏng mnuih ƀuôn sang hlăm ƀuôn mprăp bruă mdê mdê. Khua ƀuôn mbha kơ phung hlăm ƀuôn mprăp dŭm bruă mdê mdê. Đa đa snăn mprăp čeh kpiê, đa đa mprăp mnŭ da amâodah ŭn, djam dliê, điŏ brông… Truh hruê ngă yang, leh mprăp djăp ênŭm mnơ̆ng ngă yang, phung riu yang mphŭn răk klei riu yang, iêô jak phung yang wĭt dlăng ai tiê mnuih ƀuôn sang. Pô riu yang Y-Phĭ Mjâo lač: “Tơdah ngă Yang Hri brei drei mprăp mnơ̆ng ngă yang. Phung riu yang kơh dưi ngă yang. Hlăm ti djuê ana snăn brei duah pô riu yang jing pô anăn. Brei ngă yang hŏng sa drei mnŭ leh anăn čeh kpiê. Tơdah amâo mâo mnŭ, čeh kpiê snăn amâo dưi ngă yang ôh. Bi êmô amâo dưi ôh kyua hlue si klei mĭn mnuih Jrai anăn jing mnơ̆ng hlơr. Bi ŭn snăn dưi ngă yang”

Leh ngă yang, phung khua ngă yang, phung riu yang iêô êdam êra leh anăn mnuih ƀuôn sang tông čing čar. Jih ƀuôn sang huă mnăm, kdŏ čhuang, grăp čô mnuih mnăm kpiê êjai mmuiñ ênhiang djuê ana êjai. Knăm ngă yang Hri jing knăm yuôm bhăn, mâo gŏ sang leh anăn êpul êya mkŏ mjing hŏng klei čang hmăng jăk êa hlĭm hjan, bi êdah klei bi hgŭm mguôp hlăm ƀuôn sang, mjing ai ktang bi hgŭm êpul êya. Pô riu yang Y-Phĭ Mjâo brei thâo:“Bruă ngă Yang snăn jih jang mnuih brei hlue ngă. Tơdah phung khua thŭn jih leh snăn phung hđeh mrâo brei tui hlue phung khua mduôn. Amâo dưi bi luč ôh klei bhiăn knhuah gru djuê ana pô. Đưm dih jih mnuih Jrai, Ê đê, Mnông ngă yang sơăi.”

Knăm ngă yang Hri mnuih Jrai ti kdriêk Ea Sup jing sa klei dhar kreh jăk siam jiă kma knhuah djuê ana mâo mnuih ƀuôn sang tinei dlăng myuôm leh anăn răng kriê mơ̆ng ênuk êdei truh ênuk êdei. Anei jing gưl čiăng kơ mnuih ƀuôn sang hlăm gŏ sang, ƀuôn sang bi hgŭm hrăm mbĭt kah mbha hlăm bruă mđĭ kyar bruă duh mkra, mkŏ mjing gŏ sang jăk mơak leh anăn hjuă kjăp klei bi hgŭm êpul êya./.