Ka bŏ 2 hruê Knăm ngă yang Vía Bà thŭn anei, mâo leh 40 êpul hŏng êbeh 2.000 čô nao hlăm knăm anei ti Wăl knhuah gru rŭ mdơ̆ng ala čar mdê hjăn Sang Tuôr Nhạn, ƀuôn hgŭm Tuy Hòa, čar Dak Lak. Dŭm êpul mâo mprăp djăp ênŭm, mơ̆ng mnơ̆ng ngă yang kơ Thánh Mẫu, kdrăp čŭt hơô truh kơ dŭm ênhiang kdŏ mmuñ čiăng ba mdah hlăm Knăm Vía hŏng ai tiê mpŭ lehanăn ba dŭm klei čang hmăng jăk siam hĭn. Mnuih nao hgŭm hlăm Knăm mơak klei mĭn đăo anei, brei thâo snei:

"Akâo kơ lăn čar êđăp ênang, akâo kơ čar Dak Lak drei djăp mta ra klei jăk găl, adiê jăk êa hlĭm hjan, yan ngă bruă djŏ boh mnga”.

Hlăm klei mĭn đăo mơ̆ng mnuih ƀuôn sang dŭm čar Dhŭng kwar Krah, Thiên Y Thánh Mẫu jing Amĭ krĭng lăn, jing pô răng mgang djăp mta ra mnơ̆ng, mnuih ƀuôn sang mâo klei hdĭp hơĭt ênang, trei mđao, yâo mơak. Kyua anăn, Knăm Vía Bà kma leh hlăm klei hdĭp ai tiê klei mĭn, jing sa hdră ai tiê klei mĭn đăo ngă yang Mẫu mơ̆ng mnuih ƀuôn sang Dhŭng kwar krah. Kơ klei mĭn đăo, tinei mâo klei hrăm mbĭt, bi mguôp plah wah dhar kreh klei mĭn đăo ngă yang mơ̆ng mnuih Čam lehanăn klei ngă yang Mẫu mơ̆ng mnuih Việt.

Hlăm knăm Vía Bà mâo 2 kdrêč jing ba mnơ̆ng myơr lehanăn kdrêč kdŏ čiăng kơ Thiên Y ANa hơ̆k mơak lehanăn ƀuh klă klei mpŭ mơ̆ng mnuih ba myơr mnơ̆ng. Thông Thị Thêu, mnuih djuê ana Čam mơ̆ng Bắc Bình, Lâm Đồng brei thâo:

Mngăt ai tiê jing yuôm bhăn snăk. Grăp thŭn truh mlan anei hơ̆k kdơ̆k bi nao yơh. Nao mơak kơ Ñu, akâo kơ gŏ sang suaih pral, trei mđao, kuh kŭm ênŭm ênap. Amâo nao ƀuh ai tiê kăn hơĭt lei mơh, grăp thŭn bi nao nanao.

Knăm ngă yang Vía Bà thŭn anei dưi mkŏ mjing êđăp ênang, djăp ênŭm, Anôk kriê dlăng knhuah gru čar Dak Lak mkŏ dăp leh wăl anôk mkăp kơ dŭm êpul mơ̆ng Ƀăng jang hlŏng truh kơ wăl knhuah gru, mprăp dŭm anôk mprăp knăm ngă yang, anôk dưm mnơ̆ng ngă yang, kdrăp čŭt hơô, krĭng huă ƀơ̆ng, rơ̆ng kơ êpul hriê hgŭm srăng mâo hruê mơak tŭ dưn ti wăl knhuah gru Snag Tuôr Nhạn. Mbĭt hŏng mnuih nao ti knăm anei, lŏ mâo dŭm êbâo čô mnuih ƀuôn sang lehanăn tuê hiu čhưn hriê tui ksiêm kơ knhuah dhar kreh jăk siam mơ̆ng đưm anei. Phạm Phú Thái, tuê hiu čhưn mơ̆ng Đà Nẵng brei thâo:

"LGưl tal êlâo truh ti Phú Yên snăn kâo dưi ƀuh leh knăm ngă yang Mẫu. Anei jing dhar kreh amâo êdah klă jăk êdi, bi êdah klă knhuah dhar kreh djuê ana Việt pô”.

Hluê si pô mă bruă ksiêm hriăm kơ hƀuê ênuk Nguyễn Danh Hạnh, bruă hluê ngă klei ngă yang Mẫu mâo leh UNESSCO tŭ yap jing knhuah gru dhar kreh amao êdah klă bi ala kơ anak mnuih tar rŏng lăn. Knăm ngă yang Vía Bà siă suôr hŏng ai tiê klei mĭn đăo ngă yang Mẫu dưi mkŏ mjing ti wăl knhuah gru rŭ mdơ̆ng ala čar mdê hjăn Sang Tuôr Nhạn đru bi mni leh boh tŭ yuôm knhuah gru anei.

"Knăm ngă yang Vía Bà jing lŏ čuê knhuah gru dhar kreh mơ̆ng đưm êlâo, jing tur knơ̆ng yuôm bhăn čiăng kơ drei ksiêm dlăng klei bi mguôp, hlai mbĭt mơ̆ng dŭm knhuah dhar kreh, plah wah êpul êya mnuih hlăm hƀuê ênuk. Bruă krơ̆ng kjăp klei anei amâo djŏ knŏng ngă kơ knhuah gru hĭn mơh siam, ƀiădah čiăng kơ knhuah gru hdĭp nanao hŏng krĭng êpul êya mnuih ƀuôn sang dôk. Leh anăn wăl knhuah gru anei srăng mâo lu mnuih mđing dlăng hĭn. Anei jing mta phŭn čiăng kriê pioh lehanăn mđĭ lar boh tŭ yuôm knhuah gru, mkăp kơ hdră mdid\ kyar bruă hiu čhưn ênguê alŭ wăl”.

Găn dŭm thŭn mlan, knăm ngă yang Vía Bà mâo bruă klam yuôm bhăn hlăm klei hdĭp ai tiê klei mĭn mơ̆ng mnuih ƀuôn sang lehanăn jing boh tŭ yuôm dhar kreh amâo dah klă dưi kriê pioh, mpŭ mni. Knăm ngă yang Vía Bà dưi lŏ čuê mơ̆ng dŭm ênuk gưl lŏ dơ̆ng kriê pioh kjăp, đru bi lu jơr klei hdĭp dhar kreh, ai tiê klei mĭn mnuih ƀuôn sang./.