Ti alŭ wăl knơ̆ng Lý Sơn, dŭm hrue mdei knăm mơak, ênoh mnuih bi kluh nao, nao čuă dlăng bŏ mtam. Amâo mâo djŏ knŏng jing anôk jăk siam. Lý Sơn lŏ bi mtruh hŏng tue hiu čhưn lu mta klei bi mngar mơ̆ng dhar kreh tinei.

Hlăm wưng anei, knăm ngă yang kơ kahan Hoàng Sa mâo mkŏ mjing kdrăm k’ah, mâo leh lu tue nao dlăng, đru lŏ bi êdah klei thâo mpŭ kơ klei tŭ dưn hƀuê ênuk, klei dưi êngiê kơ êa ksĭ plao ksĭ lăn čar. Leh klei anăn, mâo knăm klei bi lông mtiŏ mran hlăm êa ksĭ, mâo lu mnuih ƀuôn sang nao dlăng.

Hlăm klei hiu čhưn hlăm plao ksĭ, mâo čư̆ Thới Lới, alŭ wăl knơ̆ng Lý Sơn jing anôk jưh jơ̆ng amâo mâo dưi wơr ôh. Dơ̆ng mơ̆ng čŏng čư̆, phung tue dưui trah dlăng phă êa ksĭ mtah mda, ƀuh klei siam kdrăm k'ah mơ̆ng sa boh plao ksĭ, Nguyễn Đức Tiến, hriê mơ̆ng čar Hưng Yên lač:

“Kâo truh kơ anei kâo ƀuh plao ksĭ siam êdi, mtah mda, êwa êđăp doh. Tơdah lŏ mâo klei găl snăn phung mah jiăng mda asei ăt čiăng lŏ hriê sa blư̆ dơ̆ng”.

Amâo mâo djŏ knŏng plao ksĭ, dŭm anôk lăn mnga êa mơak, dhar kreh jăk siam hlăm čar Quảng Ngãi ăt mâo lu tue hiu čhưn. Hŏng adiê msĕ si ară anei, mđiă siam, êđăp mjing leh anôk truh jăk êdi kơ phung tue, hiu čhưn ktue hang ksĭ, djiêo drai êa, hnoh krông, êa hnoh. Hdră êlan kơ klei hiu čhưn ênguê thŭn anei brei ƀuh lu tue ruah jing nao hlăm dŭm anôk mâo klei jăk êđăp, mâo dhar kreh jăk siam, mguôp hlăm klei hiu dlăng lehanăn mdei msăn.

 Ti să Măng Đen (kdriêk Kon Plông, čar Kon Tum hđăp), ai êwa mkŏ mjing dŭm knăm mơak, nao mđrĭng hŏng dhar kreh hiu čhưn ênguê dưi mkŏ mjing jăk, Boh nik, knăm mơak hlăm êlan klông, hŏng dŭm klei ruĕ, lehanăn kdŏ muiñ ktue êlan klông hlăm êlan dơ̆ng prŏng mrô 24. Dŭm ênai čing čhar, klei kdŏ čhuang hŏng lu êa mil jăk siam, iêo jak leh lu tue hiu čhưn, mơ̆ng klei anăn mjing klei jĕ giăm, lehanăn lar bra lu hĭn ai êwa mơak mñai.

Tơdah mlam mmăt truh, anôk čhĭ mnia boh mnga bruă lŏ hma, lehanăn ana êa drao Măng Đen jing leh anôk bi kčah amâo mâo dưi êkŭt ôh. Hlăm anôk čhĭ mnia anei hŏng lu mta pui jăk siam, mâo lu mta mnơ̆ng ƀơ̆ng dưi mkra mjing, hŏng lu mnâo mnañ jăk yao mơ̆ng krĭng dlông. Phung tue dưi êbat hiu čuă dlăng dŭm knưng mnơ̆ng, lông ƀơ̆ng dŭm mta mnơ̆ng ƀơ̆ng mơ̆ng djuê ana, ksiêm duah kơ mnơ̆ng dhơ̆ng hlăm alŭ wăl, tinăn ƀuh klei thâo jĕ giăm, thâo khăp kơ tue mơ̆ng mnuih ƀuôn sang tinei. Amai Đặng Phương Lan, mơ̆ng ƀuôn prŏng Đà Nẵng mâo lu blư̆ leh truh hŏng Măng Đen hiu čhưn lač:

“Grăp blư̆ truh hŏng Măng Đen, pătdah grăp mlam hmei hiu čhưn truh hŏgn sang mnia anei. Amâo mâo djŏ knŏng kyua klei mtluk mtlak mơak mñai, ƀiădah tinei lŏ jiă knhuah dhar kreh alŭ wăl, jing jăk êdi”.

 Sa mta klei hiu čhưn dhing mrâo mâo leh lu phung tue khăp êdi anăn jing hiu dlăng kdrăn kphê krĭgn êđăp ti Măng Đen. Hlăm krah dliê hngô êđăp, phung tue dôk bi mnăm kphê, lehanăn dlăng klei kar mkra hŏng kiê kngan, dlăng êa kphê rôč. Grăp kčok kphê amâo mâo djŏ knŏng ba hrie mnâo mnañ jăk mơ̆ng kphê, ƀiădah hlăm anăn lŏ mâo lu klei yăl dliê kơ krĭng lăn lehanăn anak mnuih tinei.

 Vũ Thị Hồng Phương, Khua anôk bruă ngă hraư mơar ƀuôn hgŭm Măng Đen, čar Quảng Ngãi brei thâo, bruă lông hiu dlăng kdrăn kphê krĭng êđăp kñăm mđĭ hĭn boh tŭ dưn mơ̆ng kphê, lehanăn hưm mdah anăn knăl alŭ wăl. Mơ̆ng dŭm kčŏk kphê kar mkra hŏng kriê kngan, jih jang klei tŭ dưn mâo jing, mkŏ mơ̆ng klei duh mkra pla mjing hlŏng truh kơ bruă hiu čhưn ênguê, đru mđĭ leh klei duh mkra hlăm alŭ wăl. Vũ Thị Hồng Phương lŏ brei thâo: 

“Mơ̆ng klei anei, ƀuôn hgŭm Măng Đen čang hmăng mâo mkŏ hŏng dŭm anăn knăl kphê krĭng êđăp mbĭt hrăm. Mơ̆ng anăn, mjing sa krĭng kơ tue hiu čhưn ênguê, hŏng lu mta mnơ̆ng mơ̆ng bruă hiu čhưn eneguê tuôm hŏng phung tue truh ti   Măng Đen, đru hưn mdah lu mta mnơ̆ng hlăm bruă hiu čhưn ênguê ti alŭ wăl”.

Hlăm klei hiu čhưn dhing, mâo lu bruă dhar kreh, anôk čhưn ênguê yang ƀuôn ăt mâo mkŏ mjing mơh dŭm klei hlăp mbul jăk siam msĕ si klei bi lông mtiŏ mran, bi lông muiñ bài chòi, knăm mơak mnơ̆ng ƀơ̆ng huă, lŏ iêo jak lu hĭn tue truh hŏng Quảng Ngãi. Klei lu mta hlăm bruă hiu čhưn ênguê hŏng lu mta mnơ̆ng kơ bruă hiu čhưn ênguê mjing leh anôk jăk kơ krĭng lăn Quảng Ngãi.