Dŭm hdră ti knăm anei dưi mkŏ mjing hŏng klei klah čŭn, kñăm mkăp đru kơ mnuih ƀuôn sang msir mghaih klei truh mơ̆ng yan adiê ngă. Knăm Tế thu jing sa knăm dhar kreh djuê ana mơ̆ng đưm dưi mkŏ mjing hlăm wưng mlan pŭr grăp thŭn ti Sang  yang Lạc Giao, anôk ngă yang kơ Đào Duy Từ lehanăn phung đưm mâo leh klei đru mguôp mkŏ mjing Sang yang Lạc Giao – ƀuôn sang tal êlâo mơ̆ng mnuih Yuăn ti krĭng lăn Dak Lak.

Knăm anei dưi mkŏ mjing hŏng klei mpŭ mâo klei hgŭm mơ̆ng phung khua thŭn, mnuih mâo kơhưm, mâo klei thâo hlăm ƀuôn hluê ngă. Knăm anei čiăng lač jăk kơ lăn adiê, lač jăk kơ phung yang, phung aê aduôn atâo atiêt đưm êlâo adih brei leh adiê jăk êa hlĭm hjan, ala čar êđăp ênang, ngă bruă tŭ jing, djŏ boh mnga. Hlăm knăm thŭn anei, mâo sa kdrêč akâo kơ angĭn êbŭ êa lip hnưm jih, mnuih ƀuôn sang hnưm lŏ wĭt hŏng klei hdĭp aguah tlam./.