Hlăm klei bi kƀĭn mâo 6 čô thâo mbruă mâo Khua Knơ̆ng bruă sang čư̆ êa čar Kon Tum dưi mđup brei Hră pah mni; 23 čô thâo mbruă mâo Khua Anôk bruă djuê ana čar Kon Tum mđup brei Hră pah mni kyua mâo klei tŭ êdah kdlưn hlăm bruă răng mgang leh anăn mđĭ lar ênoh yuôm djuê ana.

Čar Kon Tum ară anei mâo 43 djuê ana hdĭp mda, hlăm anăn mâo 7 djuê ƀiă tinăn mtam, mâo: Sêdang, Jeh Triêng, Bahnar, Jarai, Brâu, Rơ Măm leh anăn Hrê. Thŭn  mlan găn gao, truh ară anei êpul êya dŭm djuê ƀiă ti čar Kon Tum ăt djă pioh lu klei dhar kreh djuê ana jăk siam, êdah êdi jing bruă pơ̆k mñam, tuh tia msei, hrĭ mñam, mkra mjing kdrăp tông ayŭ djuê ana, krah rup hŏng kyâo… bi lu jơr thiăm klei hdĭp ai tiê leh anăn mnơ̆ng dhơ̆ng mnuih ƀuôn sang.