Hlăm dŭm mta bruă bi hdơr 93 thŭn mkŏ mjing Đảng Cộng sản Việt Nam leh anăn 110 thŭn mkŏ mjing čar Kon Tum(9/2/1913- 9/2/2023), aguah mbruê 6/2, Čar Kon Tum mkŏ mjing knăm mơak Kpŭng đung hŏng êwa hlơr Sâm Ngọc Linh K5 “Phiơr wĭt kơ čư̆ čhiăng”. Hlăm knăm mơak,  mâo jih jang 30 boh Kpŭng đung hŏng êwa hlơr phiơr dlông  anôk čăt đĭ ana êa drao yuôm bhăn “Ngăn dŏ ala čar” Sâm Ngọc Linh.

Nao hlăm knăm mơak, phung tuê leh anăn mnuih ƀuôn sang alŭ wăl dưi đĭ kpŭng phiơr amâo mâo liê prăk čiăng ktuê dlăng klei siam mơ̆ng čư̆ dliê. Boh nik, nao hlăm knăm anei mâo Trung tướng, pô jhŏng ktang lĭng kahan yang ƀuôn Phạm Tuân, pô tal êlâo mơ̆ng Việt Nam leh anăn Asi phiơr nao ti êngĭt adiê hlăk thŭn 1980.