Đru răng kriê, mđĭ lar dŭm ênoh yuôm dhar kreh djuê ana; mđing truh kkuh drông bi hdơr 40 thŭn hruê phung nai Việt Nam leh anăn bi hdơr 110 thŭn Hruê mkŏ mjing čar Kon Tum, Ti sang roong Kon Klor, ƀuôn hgŭm Thắng Lợi, adŭ bruă sang hră mtô bi hriăm ƀuôn prŏng Kon Tum, čar Kon Tum mkŏ mjing klei bi lông tông čing - kdŏ čhuang leh anăn bi lông kdrăp djuê ana kơ hđeh sang hră tal VI thŭn 2022.

Klei bi lông tông čing - kdŏ čhuang lehanăn bi lông kdrăp djuê ana kơ hđeh sang hră mâo adŭ bruă sang hră mtô bi hriăm ti ƀuôn prŏng Kon Tum mđĭ lar mkŏ mjing 2 thŭn sa blư̆. Hlăm klei bi lông tal VI thŭn anei mâo 16 êpul hŏng 1.100 čô hđeh nao hgĭm.

Hlăm wưng mkŏ mjing, mâo êbeh 300 čô hđeh bi lông tông čing, 500 čô hđeh sang hră kdŏ čhuang leh anăn giăm 250 čô hđeh bi lông rang mdah kdrăp djuê ana. Jih jang phung hđeh jing hđeh sang hră gưl sa leh anăn gưl 1, lu jing hđeh Bahnar.

Bruă mđĭ lar mkŏ mjing klei bi lông anei jing bruă ngă klă sĭt mơ̆ng bruă Sang hră mtô bi hriăm ƀuôn prŏng čiăng mđĭ lar dŭm ênoh yuôm dhar kreh djuê ana, mđĭ ai phung hđeh ƀrư̆ hruê khăp kơ dhar kreh djuê ana leh anăn đru kơ phung hđeh hriăm hră thâo hĭn, mâo klei mĭn, bruă ngă jăk siam./.