Dăl sa mlan êgao, grăp aguah, sang dhar kreh êpul êya ƀuôn Kmrơ̆ng Prŏng B, să Êa Tu, ƀuôn prŏng Ƀuôn Ama Thuôt, čar Dak Lak lŏ mčhĭt m’uăt hŏng ênai tông čing čhar mbĭt hŏng asăp blŭ tlao. Giăm 30 čô êdam khăp dôk mđing hmư̆ pô mbruă mtô kơ hdră tông čing, mơ̆ng klei thâo săng tal êlâo truh kơ klei thâo tông čing amâo dah mdah sa hdră tông čing kluôm ênŭm. Adei Y-Thiên Niê brei thâo:

           “Tal êlâo hriăm ka đei thâo ôh, kâo amâo thâo duah tông ôh, mâo nai mtô mtă lu, mkra wĭt mkra nao snăn ară anei hmei tông jăk ƀiă leh. Adŭ hmwi m’ak êdi mâo nai mtô hŏng jih ai tiê snei”.

Hluê Y-Wih ÊBan, Khua bruă Đảng ƀuôn Kmrơ̆ng Prŏng B, adŭ mtô tông čing jing klei čiăng mơ̆ng lu mnuih. Leh lu blư̆ nao truh grăp gŏ sang mtrŭt mjhar phung amĭ ama brei anak čô nao hriăm tông čing, yan bhang thŭn anei, adŭ mâo leh lu phung hđeh nao hgŭm.

 “Pŏk adŭ anei phung knuă druh hlăm ƀuôn ăt m’ak mơh, ƀuh phung hđeh hur har, hơ̆k m’ak nao hriăm, lu phung hđeh amâo čih anăn nao êlâo êlâo kơnăn ƀiădah ară anei ăt nao hriăm. Ară anei ƀuh ba wĭt klei tŭ dưn leh. Kyua anăn, kâo gĭr srăng lŏ pŏk lu adŭ snei, amâo djŏ knŏng sa, dua adŭ ƀiădah kâo srăng bi hgŭm pŏk lu hĭn.

Yan mdei prŏng anei, mbĭt hŏng adŭ mtô tông čing ti ƀuôn Kmrơ̆ng Prŏng B, să Êa Tu, lŏ mâo mơh sa boh adŭ msĕ snei dưi mkŏ mjing ti ƀuôn Kŏ Siêr, ƀuôn hgŭm Tân Lập, ƀuôn prŏng Ƀuôn Ama Thuôt. Anei jing Adŭ mâo Anôk bruă Mtô mblang, dhar kreh lehanăn mjuăt ktang asei mlei ƀuôn prŏng Ƀuôn Ama Thuôt mkŏ mjing hluê si hdră kčah kriê pioh, mđi lar knhuah dhar kreh dŭm djuê ana Ƀuôn prŏng Ƀuôn Ama Thuôt wưng thŭn 2022 – 2025, tă hdră êlan truh thŭn 2030.

Phạm Thị Hải Bình, K’iăng khua anôk bruă brei thâo, mbĭt hŏng bruă mtô tông čing, êpul lŏ pŏk 2 adŭ kdŏ čhuang lehanăn mđĭ klei thâo kơ 6 čô mniê ti 6 boh ƀuôn hlăm ƀuôn prŏng Ƀuôn Ama Thuôt. Dŭm adŭ mtô tông čing lehanăn kdŏ čhuang dưi pŏk nanao mơ̆ng thŭn 2019 truh kơ ară anei, jak iêu dŭm êtuh čô êdam êra nao hgŭm, mơ̆ng anăn đru krŭ wĭt lehanăn lŏ čuê kơ ênuk gưl hđeh mnuih djuê ƀiă lŏ khăp hĭn kơ dhar kreh djuê ana pô.

 “Tơdah nao mtrŭt mjhar phung hđeh hlăm thŭn anei amâo suaĭ msĕ si dŭm thŭn êlâo ôh, ênoh hđeh nao hriăm thŭn anei lu. Hmei tui hluê hnơ̆ng čuăn ti dŭm ƀuôn hgŭm, să ka pŏk adŭ mtô tông čing lehanăn kdŏ čhuang amâo dah mâo pŏk leh čiăng lŏ hriăm kdlưn hĭn čiăng pŏk adŭ mtô bi hriăm kñăm mjing klei hur har lehanăn klei khăp čiăng hlăm mmông hriăm.

Sĭt suôr hŏng bruă mtô tông čing dăl hlăm lu thŭn êgao, pô mbruă Y-Hiu Niê Kdăm, ti ƀuôn Mduk, ƀuôn hgŭm Êa Tam, ƀuôn prŏng Ƀuôn Ama Thuôt yăl dliê, klei ñu mđing mĭn hĭn jing si srăng ngă čiăng mtô hŏng klei ênưih thâo săng. Čiăng ti anôk nao, phung hđeh ăt thâo săng kơ čing čhar lehanăn nao hgŭm hlăm êpul tông čing hŏng klei jăk hĭn.

 “Mtô jih klei pô thâo kơ hdră tông čing čhar, wăt klei yuôm bhăn mơ̆ng čing čhar, kơ êkei amâo dah mniê hlăm grăp blư̆ yan bhang msĕ snăn kâo ƀuh yuôm bhăn êdi, dưi bi êdah dŭm hdră kriê pioh dhar kreh jăk siam mơ̆ng mnuih djuê ana Êđê. Mnuih ƀuôn sang ƀuh klei yuôm bhăn, klei ktưn hưn hŏng knhuah dhar kreh jăk siam mơ̆ng djuê ana pô, lŏ krŭ wĭt dŭm knăm m’ak, klei bhiăn yuôm bhăn, čiăng lŏ bi hdơr kơ phŭn agha ana hruê̆ pô, dŭm boh tŭ yuôm jăk siam mơ̆ng aê aduôn drei nao êlâo lui leh”.

Hŏng phung êdam êra nao hgŭm hlăm hdră tông čing čhar, grăp blư̆ nao ti adŭ jing mmông jăk êdi kyua phung hđeh dưi tui ksiêm kơ knhuah gru dhar kreh mơ̆ng aê ama, dưi buh klă lehanăn dưi tông kdrăp djuê ana pô. Dŭm klei hriăm anăn amâo djŏ knŏng đru kơ phung hđeh mâo lu klei thâo săng hĭn hlăm yan bhang ƀiădah lŏ đru mtă mtăn kơ dŭm boh tŭ yuôm mơ̆ng knhuah gru čiăng kơ phung hđeh lŏ dơ̆ng kriê pioh lehanăn mđĭ lar./.