Hlăm mlan 7 leh êgao, grăp aguah knăm sa, knăm tlâo lehanăn knăm êma grăp hruê kăm, giăm 30 čô hđeh sang hră gưl sa lehanăn gưl dua nao ti Sang dlông mơ̆ng Ama Jiwon, ti ƀuôn Akŏ Dhông, ƀuôn prŏng Ƀuôn Ama Thuôt, čar Dak Lak. Tinei mâo 2 adŭ mtô klei Angle amâo mă prăk kơ phung hđeh ba anăp hlăm čar pŏk hlăm wưng yan mdei prŏng. Nao hlăm adŭ anei, phung hđeh dưi hriăm boh hră lehanăn hriăm blŭ klei Angle hluê hŏng dŭm klei hlăp lêñ, klei mmuñ. Adei Đỗ Thanh Nhã Byă, 10 thŭn, ti ƀuôn Akŏ Dhông brei thâo:

 “Kâo dưi hriăm klei Angle amâo liê prăk mâo phung ayŏng adei sinh viên tinei mtô. Kâo ƀuh tŭ dưn êdi. Hlăm yan mdei prŏng anei dưi hriăm lu mta klei, boh nik kâo čang hmăng dưi thâo blŭ lu klei ala tač êngao, kâo srăng gĭr hriăm, hriăm blŭ hrăm hŏng ayŏng amai lehanăn mnuih ala tač êngao”.

 Bi hŏng adei H’DaRin Êñuôl ti ƀuôn Alê B, ƀuôn hgŭm Êa Tam, ƀuôn prŏng Ƀuôn Ama Thuôt, dŭm hruê yan mdei prŏng hơ̆k m’ak êdi hlăk ñu dưi thâo săng hĭn kơ dhar kreh Êđê hluê hŏng adŭ kdŏ čhuang mâo Anôk bruă Mtô mblang, Dhar kreh lehanăn Mjuăt ktang asei mlei ƀuôn prŏng Ƀuôn Ama Thuôt mkŏ mjing. H’Darin brei thâo, hlăm 1 mlan êgao, adei lehanăn jing jang ƀĭng găp dưi tui ksiêm kơ knăm m’ak mơ̆ng mnuih Êđê, dŭm klei bhiăn, knăm mâo klei kdŏ čhuang lehanăn dŭm hdră kdŏ čhuang. Mơ̆ng anăn, đru kơ adei thâo săng lehanăn khăp hĭn kơ dhar kreh djuê ana.

 “Kâo dưi hriăm lu hĭn kơ dhar kreh djuê ana pô. Kâo thâo leh lu hdră kdŏ čhuang lehanăn mơ̆ng klei phung nai mtô, kâo lŏ thâo lu hdră kdŏ hĭn, dưi lŏ mtô, lŏ čuê kơ phung adei gưl êdei. Mơ̆ng anăn, hlăm dŭm knăm m’ak amâo dah ya knăm hlăm ƀuôn mkŏ mjing snăn jih jang hmei srăng dưi lehanăn jhŏng kdŏ anăp lu mnuih”.

 Sa hdră mkăn ăt mâo lu phung hđeh, êdam êra mnuih djuê ƀiă ti Dak Lak nao hgŭm grăp blư̆ yan mdei prŏng. Anăn jing “Anôk mjuăt bi hriăm klei thâo čih mčeh klei yăl dliê, klei duê, klei mmuñ” mâo Êpul hgŭm bruă Văn học Nghệ thuật Dak Lak mkŏ mjing. Thŭn anei, hdră anei mâo giăm 40 čô nao hgŭm. Anei jing phung hđeh mâo ruah mơ̆ng dŭm klei bi lông phung hđeh hriăm thâo, bi lông čih hră quốc tế (UPU), phung hđeh mâo klei thâo ti 24 boh sang hră gưl dua lehanăn gưl tlâo hlăm čar.

Mbĭt hŏng bruă mâo phung mă bruă čih mčeh, phung čih kač rup ktrâo lač kơ hdră čih mčeh klei čih, klei yăl dliê, čih kač rup, phung hđeh lŏ dưi nao dlăng lehanăn bi mjĕ mjuk hŏng phung kahan răng mgang knông lăb, tui ksiêm kơ dhar kreh dliê, dhar kreh êman ti Đang dliê knŭk kna mkuôm Yok Đôn, mjĕ mjuk hŏng phung hđeh ti krĭng knông lăn, tui ksiêm Adŭ bruă kahan ksiêm truih mdjiê klei pui ƀơ̆ng lehanăn đru dŏng mnuih mâo klei truh, kahan ksiêm čar Dak Lak… Mơ̆ng anăn, đru kơ phung hđeh mâo lu klei thâo săng hĭn hlăm bruă čih mčeh. Adei Bế Thị Thu Uyên 13 thŭn, djuê ana Tày, ti să Êa Hđĭng, kdriêk Čư̆ Mgar brei thâo, dŭm hruê nao hlăm hdră anei, đru kơ adei mâo lu hĭn klei thâo săng, mơ̆ng anăn thâo mpŭ lehanăn lač jăk kơ dŭm mta klei pô dôk mâo dưn yua.

 “Hmei dưi nao tui ksiêm lu hdră bruă, si tô hmô tui ksiêm kơ Sang kriê pioh kdrăp Kphê tar rŏng lăn, Sang kriê pioh mnơ̆ng Ama H’Mai, truh ti krĭng knông lăn Việt Nam – Campuchia, kđông kahan răng mgang knông lăn Bô Heng lehanăn nao dlăng gơ̆ng knăl knông lăn Việt Nam – Campuchia. Anei jing gưl tal êlâo kâo dưi truh ti krĭng knông lăn, dưi sô̆ kngan ti krĭng gơ̆ng knăl knông lăn kâo ƀuh jăk êdi.

Niê Thanh Mai, Khua Êpul hgŭm bruă Văn học Nghệ thuật Dak Lak tĭng dlăng, khădah wưng tui ksiêm amâo sui ôh ƀiădah phung hđeh bi êdah leh klei mđing dlăng hŏng grăp hdră bruă. Mơ̆ng grăp thŭn, hdră mâo nanao klei bi mlih, amâo msĕ čiăng kơ phung hđeh ƀuh klei mrâo, jăk jĭn wăt hŏng phung hđeh nao hgŭm leh gưl êlâo.

 “Hmei ƀuh phung hđeh khăp êdi hmư̆ di amai mblang kơ dŭm knhuah dhar kreh jăk siam mơ̆ng djuê ana lehanăn kơ hƀuê ênuk, phung hđeh mđing hmư̆, čih pioh jih. Mphŭn mơ̆ng dŭm klei đ’điêt hlăm gưl hiu čhưn, truh kơ dŭm klei bi tuôm hŏng phung kahan, kahan ksiêm truih mdjiê klei pui ƀơ̆ng, mnuih jih ai hlăk pô dôk duh myơr kơ ƀuôn sang.

Mai Văn Chuyền, ti să Êa Mdroh, kdriêk Čư̆ Mgar, mâo anak nao hrăm hdră anei brei thâo, dŭm hdră anei ba wĭt leh boh tŭ dưn klă sĭt. Leh wĭt mơ̆ng hdră anei, ñu ƀuh anak ñu mâo leh lu klei bi mlih, jhŏng hĭn, jhŏng blŭ hrăm hŏng mnuih riêng gah lu hĭn mơh.

 “Leh wĭt mơ̆ng hdră anei, kâo ƀuh anak jăk ênang hĭn, klei blŭ hrăm, mâo lu klei bi mlih jăk hĭn. Ksiêm dlăng lehanăn blŭ hrăm hŏng anôk bruă mkŏ mjing hlăm Zalo kâo ƀuh anôk mkŏ mjing lehanăn phung nai ktrâo lač klă klơ̆ng êdi, mâo klei hmăi jăk truh hŏng phung hđeh. Anei jing sa hdră tui ksiêm jăk hŏng phung hđeh hlăm yan mdei prŏng.

 Yan mdei prŏng thŭn anei dơ̆ng jih, ƀiădah hŏng phung hđeh mnuih djuê ƀiă ti Dak Lak, dŭm hdră tui ksiêm kơ dhar kreh pŏk leh klei găl tui ksiêm lu hĭn kơ knhuah jăk siam mơ̆ng grăp djuê ana. Mơ̆ng anăn ksŭl mbŭ klei khăp kơ dhar kreh hlăm phung hđeh, čiăng dưi mâo sa yan mdei prŏng jăk jĭn./.