Lăn dap kngư jing krĭng lăn mâo lu ngăn dŏ, hŏng lăn mnga êa mơak jăk siam, lehanăn lu mta dhar kreh djuê ana, anôk kơ 47 djuê ana ayŏng adei hdĭp mda, mâo hlăm anăn ngăn dưn yuôm bhăn anăn jing čing čhar, jing knhuah gru dhar kreh amâo mâo êdah klă mơ̆ng anak mnuih; mâo dŭm knăm mơak bi lông êman, knăm lui msat, knăm huă êsei mrâo... mơ̆ng dŭm djuê ana tinei. Hŏng akŏ “Sa gưl đuĕ nao, mâo lu anôk truh”, bruă hiu čhưn ênguê ti dŭm čar Gialai; Daklak; lehanăn Kontum hưn mdah leh hŏng dŭm êpul êya, phung ngă bruă hiu čhưn ênguê ti Hải Phòng mâo dŭm anôk jăk kơ bruă hiu čhưn ênguê ti dŭm alŭ wăl lehanăn dŭm anôk truh bŏ hŏng klei hing ang, dŭm tour dưi mkŏ hlăm klei đuĕ hiu atăt ba phung tue truh hŏng lăn dap kngư jăk siam. Nguyễn Đức Hoàng, K’iăng khua knơ̆ng bruă dhar kreh, mjuăt asei mlei lehanăn hiu čhưn ênguê čar   Gia Lai brei thâo:

Hŏng dŭm knhuah gru dhar kreh mâo mă hjăn, mnơ̆ng ƀơ̆ng huă mdê mơh plah wah Hải Phòng lehanăn dŭm čar lăn dap kngư, boh nik jing Gia Lai snăn mkâo mĭn phung tue mơ̆ng Gia Lai ăt srăng khăp mơh đuĕ hiu truh kơ Hải Phòng lehanăn mklăk hŏng anăn. Hmei srăng mkŏ plah wah phung duh mkra dua alŭ wăl čiăng mâo mjing dŭm êpul hiu čhưn ênguê, lehanăn mâo klei mkŏ mbĭt, amâo mâo djŏ knŏng dŭm tour ƀiădah wăt hŏng dŭm êpul hđeh hriăm hră mơar, mnuih ngă bruă, êpul kahan hđăp... Kâo mĭn anei jing hdră jăk êdi lehanăn tŭ dưn.

Hưn mdah hŏng dŭm klei găl, klei jăk, mă klei hriăm êdah êdi hlăm bruă mđĭ kyar bruă hiu čhưn ênguê mơ̆ng Hải Phòng, Vũ Huy Thưởng, k’iăng khua knơ̆ng bruă hiu čhưn ênguê Hải Phòng lač klei bi kƀĭn hgŭm mđĭ kyar bruă hiu čhưn ênguê mlir krĭng, ƀrư̆ ƀrư̆ mâo klei lŏ kơrŭ, mâo hnơ̆ng đĭ kyar jăk ba wĭt boh tŭ dưn kjăp.

 Hrue anei, hmei drông 3 alŭ wăl hriê bi trông kơ bruă hiu čhưn ênguê, lehanăn bi êdah dŭm klei găl jăk siam, wăt hŏng lu mta mnơ̆ng dhơ̆ng mơ̆ng anôk hiu čhưn ênguê truh hŏng phung tue hriê mơ̆ng dŭm čar ti lăn dap kngư. Anei jing klei găl jăk êdi, lehanăn bruă ngă anei srăng dưi lŏ mđĭ hĭn hlăm wưng ti anăp, amâo mâo djŏ knŏng hŏng lăn dap kngư, ƀiădah wăt hŏng dŭm krĭng mkăn hlăm kluôm ala, dưi mjing dŭm tour, dŭm mta mnơ̆ng kơ bruă hiu čhưn ênguê hŏng phung tue.

Ti anôk bi kƀĭn, phung khua kiă kriê bruă hiu čhưn ênguê Hải Phòng, phung khua kiă kriê dŭm knơ̆ng bruă dhar kreh hiu čhưn ênguê dŭm 3 čar lăn dap kngư mâo leh klei kuôl kă kơ hdră bi hgŭm mđĭ kyar bruă hiu čhưn ênguê hŏng mta kñăm jing mđĭ hĭn klei bi mguôp krĭng dưn yua jih klei găl bruă hiu čhưn ênguê, mkŏ mjing mnơ̆ng dhơ̆ng mrâo kơ bruă hiu čhưn ênguê. Mbĭt hŏng anăn mâo dŭm klei hưn mdah, bi mtuôm, mkŏ mjing anăn knăl, mđĭ bruă hưn mthâo kơ rup klei hiu čhưn ênguê mơ̆ng 3 čar Daklak, Gia Lai, Kon Tum truh hŏng Hải Phòng lehanăn mklăk wĭt./.