K’iăng nai prŏng, nai prĭn Nguyễn Trọng Phúc, Khua anôk bruă ksiêm duah kơ hƀuê ênuk Đảng, Anôk bruă ksiêm hriăm kơ kđi čar Hồ Chí Minh mơ̆ng ala čar mñă, hlăm jih wưng mă bruă knuă, mâo Đảng, Knŭk kna jao bruă jing khua kiă kriê knơ̆ng, wăt hlăm klei hlak mblang thâodah klei ngă bruă sĭt, khua gĭt gai Đảng Nguyễn Phú Trọng duh myơr leh jih hnơ̆ng hlăm klei suh sah, klei anei mâo leh kluôm Đảng, jih jang mnuih ƀuôn sang, wăt hŏng mah jiăng ala tač êngao ƀuh, lehanăn bi mni:

“Anei jing Mêđai mâo mơ̆ng ênuk Việt Nam dân chủ Cộng hòa, Mêđai mtŭ kñi jing dŏ pioh mđup brei kơ hlei pô mâo bruă tŭ kdlưn hĭn hlăm bruă cách mạng Đảng, Knŭk kna hlăm lăn čar, hŏng lu klei duh myơr mơ̆ng phung khua kiă kriê, mâo čih pioh leh jih ai tiê đru mguôp prŏng prĭn mơ̆ng khua gĭt gai Đảng hŏng bruă knuă lăn čar.”

Mñă kơ lklei bi mguôp jih jang djuê ana, lehanăn kơ klei jưh knang sĭt kơ klei Đảng Cộng sản Việt Nam kiă kriê, djă akŏ jing khua gĭt gai Nguyễn Phú Trọng mơ̆ng jih jang mnuih ƀuôn sang hlăm wưng leh êgao, Bùi Thị An, Khua êpul hgŭm mniê kreh knhâo ti Hà Nội, Khua êpul hgŭm mniê ksiêm lu mơ̆ng Êpul hgŭm mnuih ngă bruă ƀuôn prŏng Hà Nội bi êdah ai tiê leh hmư̆ hing Khua gĭt gai Đảng Nguyễn Phú Trọng mâo tŭ mă mêđai mtŭ kñĭ mơ̆ng dŭm anôk bruă hâo hưn bi êdah;

“Mêđai mtŭ kñĭ yuôm bhăn mơ̆ng lăn čar Việt Nam êjai mđup brei kơ Khua gĭt gai Nguyễn Phú Trọng jing leh klei čih yap, klei thâo hdơr knga mơ̆ng kluôm đảng jih jang mnuih ƀuôn sang, lehanăn lĭng kahan hŏng khua gĭt gai”.

Mâo lu klei blŭ bi lač, hlăm 3 wưng păn bruă leh êgao, mơ̆ng gưl 11 (thŭn 2011) truh ară anei, Khua gĭt gai Đảng Nguyễn Phú Trọng mâo duh myơr leh prŏng prĭn hlăm bruă rŭ mdơ̆ng lăn čar, boh nik kơ klei tuh tia ênuk mrâo, ñu kmă hŏng ala tač êngao, hlue ngă hdră êlan răng mgang lăn čar hlăm ênuk gưl mrâo. Boh nik, Khua gĭt gai mâo leh ai tiê čih mkra hdră êlan, leh lu thŭn mlan ksiêm duah lehanăn dưi lŏ ƀuh hdră êlan mrâo hŏng klei čih: “Dŭm klei hlak mblang lehanăn bruă ngă klă mngač kơ hdră êlan yang ƀuôn ngă phŭn jing êlan đĭ nao kơ yang ƀuôn hnŭk êngiê ti Việt Nam”. Anei klă sĭt jing klei bi klin jih jang hdră êlan mlih mrâo, bi djŏ hŏng hdră êlan yang ƀuôn ngă phŭn mâo leh Awa Hô hrŏng ruah. Kyuanăn yơh klei pah mni yuôm bhăn anei mâo Ðảng lehanăn knŭk kna mđup brei kơ khua gĭt gai Nguyễn Phú Trọng jing klei čih pioh, mpŭ mni ai tiê prŏng prĭn mơ̆ng Khua gĭt gai hlăm sdjăp mta bruă. K’iăng nai prŏng, nai prĭn Đào Duy Quát – K’iăng khua anôk bruă hâo hưn gưl dlông êlâo dih lač:

“Đảng, knŭk kna mâo leh klei bi mklă lehanăn mđup brei mêđai mtŭ kñĭ anei kơ Khua gĭt gai Nguyễn Phú Trọng jing leh sa klei čih pioh mơ̆ng Đảng, Knŭk kna lehanăn mnuih ƀuôn sang hŏng ai tiê prŏng prĭn Nguyễn Phú Trọng mâo leh hlăm bruă cách mạng lehanăn klei mlih mrâo lăn čar, lehanăn djuê ana, anei jing klei čih pioh ai tiê ñu mâo đru mguôp leh suh sah êdi hŏng bruă cách mạng mơ̆ng djuê ana.

Y-Nuel Niê, Khua ƀuôn, ƀuôn Ako Dhong, ƀuôn hgŭm Tân Lợi, ƀuôn prŏng Buôn Ma Thuột, čar Đắk Lắk mơak leh hmư̆ Phŭn bruă kđi čar bi mklă mđup brei mêđai mtŭ kñĭ kơ Khua gĭt gai Đảng Nguyễn Phú Trọng. Y-Nuel lač:

 “Khua gĭt gai Đảng Nguyễn Phú Trọng tŭ mă mêđai mtŭ kñĭ jing klei năng êdi. Lač kơ ai tiê prŏng prĭn mơ̆ng ñu, anăn jing klei bi kdơ̆ng hŏng ƀơ̆ng ngăn, ngă tơl jih hnơ̆ng. Truh kơ ară anei bruă bi kdơ̆ng hŏng klei ƀơ̆ng ngăn ñu ngă leh mâo boh tŭ dưn êdi”.

Leh thâo kơ Phŭn bruă kđi čar mđup brei mêđai mtŭ kñĭ kơ Khua gĭt gai Đảng Nguyễn Phú Trọng, Trương Duy Cảnh, 70 thŭn, mâo 44 thŭn đảng, dôk ti alŭ wăl anôk dôk mrô 2, ƀuôn hgŭm Lê Lợi, ƀuôn prŏng Kon Tum, čar Kon Tum, lač: 

“Klei khua gĭt gai Đảng Nguyễn Phú Trọng mâo knŭk kna mđup brei mêđai mtŭ kñĭ jing sa klei năng êdi. Ai tiê ñu jing ai tiê sa čô mnuih cộng sản thâo khăp kơ mnuih ƀuôn sang, kyua mnuih ƀuôn sang. Boh nik hlăm bruă kdơ̆ng hŏng klei ƀơ̆ng ngăn mơ̆ng Đảng lehanăn knŭk kna, hlăm abnăn áei ñu pô yơh Nguyễn Phú Trọng jing khua êpul bi kdơ̆ng hŏng klei ƀơ̆ng ngăn mơ̆ng Đảng, ñu gĭt gai ktang phĭt kut kat, amâo mâo ñĕ đuĕ, amâo mâo lui sa čô ti êngao ôh, kăn duah klei tŭ dưn hjăn rei. Ñu ngă bruă čiăng kơ mnuih ƀuôn sang tŭ, Đảng tŭ, klei duh mkra ala ƀuôn yang ƀuôn ngă phŭn mđĭ kyar ktang. Jih jang dŭm gưl phung knuă druh tui tluôn lŏ dơ̆ng hriăm čiăgn bi năng jing sa čô đảng viên, năng jing knuă druh kơ sang lăn čar yang ƀuôn ngă phŭn êngiê”./.