Anei jing sa hlăm dŭm hdră mđing truh kơ knăm bi hdơr 50 thŭn Hruê mkŏ mjing klei bi mjĕ Việt Nam – Japon (21/9/1973 - 21/9/2023). Ti knăm anei, phung bi ala lehanăn phung tuê jak duei hgŭm hlăm hdră mjĕ mjuk dhar kreh, kdŏ mmuñ jăk siam. Dŭm ênhiang kdŏ, mmuñ, tông ayŭ kdrăp djuê ana mơ̆ng mnuih djuê ƀiă krĭng Lăn dap kngư lehanăn Japon mâo mta phŭn bi mni kơ ƀuôn sang, lăn čar, anak mnuih ti grăp ala čar mâo phung mbruă bi êdah jăk.

Phung nao hlăm knăm anei ăt dưi wĭt lač dŭm klei êmuh tui ksiêm kơ dhar kreh 2 ala čar Việt Nam – Japon, nao dlăng mnơ̆ng OCOP mơ̆ng anôk bruă duh mkra hlăm Êpul phung mniê mă bruă duh mkra ƀuôn prŏng Ƀuôn Ama Thuôt lehanăn ƀơ̆ng dŭm mta mnơ̆ng ƀơ̆ng Japon mâo mnuih Japon mkra. Võ Tấn Tài, K’iăng khua êpul hgŭm mjĕ mjuk Việt Nam – Japon čar Dak Lak brei thâo, anei jing hdră kruăk knăl yuôm bhăn hlăm klei bi mjĕ dua ala čar dưi mđĭ jing klei bi mjĕ ƀĭng hgŭm phŭn kluôm dhuôm. Hdră mjĕ mjuk anei srăng mjing klei găl mtô mblang, hưn mthâo pŏk rup, anak mnuih mơ̆ng 2 ala čar; đru kơ čar mđĭ kyar klei găl, pŏk hdră bi hgŭm đru mtrŭt mđĭ hdră ñŭ kma dhar kreh mơ̆ng alŭ wăl ƀrư̆ hruê ƀrư̆ êlam hĭn lehanăn h’ĭt kjăp./.