Ti tač čưng boh krah ƀuôn Như Ngọc, ƀuôn hgŭm Phước Hữu, čar Khánh Hòa, dŭm êtuh čô phung êdam êra mnuih djuê ana Chăm thŏng kdrăp čŭt hơô djuê ana pô, bi kdŏ hŏng hgơr Paranưng lehanăn ki Saranai mơak mñai. Jih jang klei kdŏ muiñ anăn mâo mprăp hŏng klei kjăp, lŏ bi hmô dŭm klei hdĭp aguah tlam mơ̆ng djuê ana Chăm, mơ̆ng rup klei gui mdiê, kai lŏ, mñăm giêng, truh kơ dŭm klei kdŏ hlue knhuah djuê ana. Phung tue nao mơak mbĭt hŏng knăm mơak anei, aduôn Đàng Thị Hơi, ƀuôn hgŭm Phước Hữu, čar Khánh Hòa lač:

“Knăm mơak thŭn anei mâo mkŏ mjing mơ̆ng gah ƀuôn hlŏng truh kơ ôk ƀuôn bŏ hŏng klei hơ̆k mơak. Mâo mkŏ mjing lu mta klei kdŏ muiñ, jih jang phung mdah mprăp êmiêt hŏng klei ƀhĭ ênŭm hơk mơak.”

Rija Nagar jing knăm drông thŭn mrâo mơ̆ng djuê ana Chăm, hŏng klei hmăng hmưi jăk êa hlĭm hjăn djŏ boh mnga kơ ƀuôn sang. Grăp boh ƀuôn Chăm mkŏ mjing knăm phŭn hlăm dua hrue, hŏng dŭm klei ngă yang, khădah hrue mkŏ mjing mdê mdê, ƀiădah ai êwa mtluk mtlak mơak mñai dưi mkŏ mjing nanao mđruĕ mđrông sui hrue mlam hlăm ƀuôn sang. Amai Trần Thị Dung, tue hriê čhưn mơ̆ng Hà Nội lač:

“Kâo tuôm ƀuh lu knăm mơak ti kwar dưr hlŏng kơ kwar dhŭng, msĕ si knăm mơak djuê ana Chăm, ñu jing mdê hĭn êdi. Anei klă sĭt bi êdah knhuah klei thâio bi mguôp mơ̆ng djuê ana, mpŭ mni kơ dhar kreh krĭng lăn anei. Kâo ƀuh jăk êdi, mơak hŏng knăm mơak krĭng anei.”

Knăm mơak Rija Nagar lŏ jing anôk bi êdah lu klei kưt muiñ, jiă knhuah djuê ana  Chăm, dơ̆ng mơ̆ng klei pĕ tông, klei kdŏ muiñ, truh hŏng klei ngă yang mơ̆ng djuê ana, anei jing anôk lŏ bi kriê pioh knhuah gru dhar kreh djuê ana kơ lu phung hđeh gưl mrâo.

K’iăng khua kiă kriê sang yang Lưu Sanh Thanh, ƀuôn hgŭm Phước Hữu, čar Khánh Hòa brei thâo:

“Knăm mơak thŭn anei hrue 1 mlan 1 thŭn 16/4 thŭn hlue yang hrue ƀlĕ, ăt jing hrue bi hdơr kơ čar Ninh Thuận (hđăp), mnuih ƀuôn sang bŏ hŏng klei mơak. Đảng lehanăn knŭk kna hlăm wưng leh êgao mâo mđing lu kơ klei hdĭp mda mnuih ƀuôn sang. Hmei čang hmăng hlăm knăm mơak Rija Nagar lŏ dơ̆ng bi kriê pioh lehanăn mđĭ bi lar pral dưi mdưm hlăm ênoh knhuah gru dhar kreh amâo mâo êdah klă gưl ala čar.”

Dŭm ênai hgơr Paranưng lehanăn asăp ki Saranai kwang hlăm knăm mơak, bi mguôp ƀuôn sang, lehanăn lŏ bi hdơr knhuah bhiăn đưm mơ̆ng djuê ana Chăm. Lehanăn dŭm anôk mkŏ mjing knăm mơak msĕ si Rija Nagar, jiă knhuah gru dhar kreh Chăm lŏ dơ̆ng kriê pioh, bi lar hlăm klei hdĭp ară anei./.