Ti krah adiê mđiă ktang mơ̆ng čư̆ dliê Trường Sơn, mơ̆ng aguah ưm, grăp êpul mnuih mơ̆ng kdriêk Kà Lưm, čar Sê Kông, Lào- krĭng bi knông hŏng să Hùng Sơn, ƀuôn prŏng Đà Nẵng (kdriêk Tây Giang, čar Quảng Nam hđăp) bi iêo jak nao ti alŭ A Tu 1, să Hùng Sơn msĕ hŏng nao knăm mơak. Hlăm êpul mnuih mơ̆ng nah dih knông lăn, grăp čô bi čŭt hơô kdrăp siam hĭn.

Dŭm klei blŭ tlao hơ̆k mơak mâo hlăm ƀô̆ mta êjai mđiă mtrang. Mâo pô  ba wăt phung mduôn, anak điêt. Amâo pô gui ba wăt mnơ̆ng jăk mơ̆ng ƀuôn sang pô….Savandi hơ̆k mơak hưn, thâo să Hùng Sơn mkŏ mjing knăm mơak Bunpimay, mnuih ƀuôn sang hlăm ƀuôn bi hơ̆k mơak, bi jak hriê mơak mbĭt.

“Grăp thŭn truh Tết Bunpimay, mnuih ƀuôn sang hlăm ƀuôn bi čang sơnăk… Hriê tinei grăp čô mơak sơnăk, hơuh mđao êdi. Anei jing Tết pô, mâo phung ƀĭng găp Việt Nam mkŏ mjing jăk êdi, msĕ hŏng knăm mơak knhuah gru diñu. Hriê tinei tuôm hŏng ayŏng adei, dưi huă ƀơ̆ng, hlăp lêñ, drông tết…hơ̆k mơak msĕ tết ti sang pô”.

Ti să Hùng Sơn, dŭm mta mnơ̆ng ƀơ̆ng knhuah gru mơ̆ng mnuih Kơtu dưi mprăp ênŭm ênap, mâo wăt klei drông jum tuê mơ̆ng mnuih ƀuôn sang krĭng čư̆ čhiăng. Plong Rang, Khua glăm bruă alŭ A Tu 1 hơ̆k mơak, grăp čô dlăng anei jing bruă mbĭt mơ̆ng ƀuôn, mâo ai đru ai.

“Mdơ̆ng pưk, mprăp anôk kdŏ mmuñ, mtrŭt mjhar mnuih ƀuôn sang pĕ djam mtam, buč hbei ƀlang čiăng tŭk mkra dŭm mta mnơ̆ng ƀơ̆ng knhuah gru nao hlăm tết Lào. Dŭm mta mnơ̆ng jăk msĕ si ŭn, mnŭ, kan, đĭo brông dưi mprăp djăp čiăng drông phung ƀĭng găp mơ̆ng Lào. Ai êwa hơ̆k mơak êdi.

Hruê knhal jih hruê kăm, dŭm êbâo čô mơ̆ng 5 ƀuôn kdriêk Kà Lừm, čar Sê Kông ba mƀĭt ai êwa tết Bunpimay truh ti čư̆ čhiăng Hùng Sơn. Klei blŭ tlao mbĭt hŏng ênhiang mmuñ ti krah čư̆ dliê. Dŭm klei hlăp lêñ đưm msĕ si ktŭng klei, trŭt giê, kdăt klŭng…mkŏ mjing hơ̆k mơak êdi, iêo jak lu mnuih ƀuôn sang dua tĭng nao bi hgŭm, mđĭ ai.

Mta kñăm mơ̆ng hruê knăm jing Anôk čhĭ mnia Tết Bunpimay bŏ hŏng klei bi hgŭm Việt Nam Lào. Tinăn, mnuih ƀuôn sang dưi blei mnơ̆ng amâo mâo liê prăk leh anăn dưi ƀơ̆ng dŭm mta mnơ̆ng knhuah gru. Dŭm hnư mnơ̆ng anăn msĕ si braih, ƀung hdang krô, čhum ao mrâo… leh anăn wăt wăng kgă, dŭm mta mnơ̆ng yua hlăm grăp hruê, dưi mđup brei kơ mnuih ƀuôn sang msĕ si hnư mnơ̆ng tết klei khăp.

Đại tá Hoàng Văn Mẫn, khua bruă kđi čar knơ̆ng gĭt gai lĭng kahan knông lăn Đà Nẵng mñă klă, dŭm hnư mnơ̆ng klă klơ̆ng, duh bruă mnuih ƀuôn sang, truh kơ dŭm mta bruă dhar kreh, mjuăt asei mlei…mđing truh sơăi kơ mnuih Lào msĕ gŏng gŏ sang pô.

“Hlăm wưng tết Lào amâodah tết việt, hmei mkŏ mjing čiăng kơ mnuih ƀuôn sang nao hgŭm, mnuih ƀuôn sang mâo klei hơ̆k mơak êjai mkŏ mjing tết Việt, leh anăn mnuih ƀuôn sang Việt ăt hơ̆k mơak êjai truh Tết Lào. Dŭm thŭn êgao, klei bi mhgŭm plah wah mnuih ƀuôn sang dua tĭng knông lăn, dŭm êpul răng mgang knông lăn, Bruă sang čư̆ êa alŭ wăl dua tĭng knông lăn jing bi mguôp êdi, đru mkŏ mjing krĭng knông lăn bi hgŭm, bi mguôp.”

Ti krah čư̆ dliê Trường Sơn, Tết Bunpimay thŭn anei lŏ sa blư̆ mkŏ čhuang jơ̆ng dua nah knông lăn. Klei bi mă kiê kngan, dŭm klei blŭ tlao bi tuôm…dlăng sơnăn ƀiădah hơuh mđao êdi.