Hlăm hrue mơak, mnuih ƀuôn sang lehanăn phung tue hiu čhưn ƀuh jih knhuah mơak thŭn mrâo Bunpimay msĕ si klei ngă yang Tắc-bạt, bi mnei yang bođa, kă mrai ti kkuê kngan, mbuôn tuôr hŏng čuah, phưi pui kpŏng hlăm êa, bi sač êa duah klei myun. Anăn jing jih jang knhuah mâo mkŏ mjing hlăm klei mĭn tui duah klei klă mngač, duhmăng hmưi klei êđăp ênang, lehanăn ksul mbŭ klei jăk yâo kơ thŭn mrâo.

Hŏng lu mnuih Lào hdĭp leh sui thŭn ti Buôn Đôn, knăm mơak thŭn mrâo djuê ana amâo mâo djŏ knŏng jing klei kuh kŭm ênŭm ênap mnuih hlăm găp djuê, ƀiădah lŏ jing klei lŏ hdơr kơ phŭn agha ana hruĕ. Khăm Bo Lào, ti buôn Trí, ƀuôn hgŭm Buôn Đôn lač:

“Pô ngă yang myơr mnga, boh kroh ƀêñ kan, lehanăn mơĭt ƀiă mâo mnơ̆ng kơ phung kiă kiê sang yang, ciăng kwưng akâo kơ klei suaih pral jăk mơak kơ gŏ sang. Pô ngă klei bi mnei kơ rup yang boda, čiăng akâo klei êđăp ênang kơ găp djuê , kơ čô anak.”

 Mbĭt anăn, phung tue mđrăm mbĭt mơak mñai hlăm klei kdŏ Lăm Vông, kdŏ Chăm-pa, mgrông hbia Nang Sangkhane, knăm ruĕ hlăm êlan klông, nao hlăm klei hiu čhưn dhing jĕ giăm hŏng êman, dlăng dŭm mta klei mdah kưt muiñ, lehanăn mnơ̆ng ƀơ̆ng huă djuê ana. Amai Hoàng Thúy Lư, ti ƀuôn hgŭm Ea Kao, čar Daklak brei thâo:

“Hrue anei kâo truh ti Buôn Đôn lehanăn nao hlăm knăm mơak thŭn mrâo djuê ana Lào. Kâo ƀuh bŏ hŏng klei mơak êdi kơ dhar kreh djuê ana mnuih Lào ti Buôn Đôn. Kâo ƀuh khăp snăk kơ kdrăp čŭt hơô djuê ana tinei, dŭm knăm mơak tinei, lehanăn kâo mơak mâo hlăp hlăm klei bi sač êa, jih jang mnuih hlăp klei bi sač êa bŏ hŏng klei mơak.”

Buôn Đôn, tui si klei Lào sitôhmô jing ƀuôn brao, anôk mnuih Lao hdĭp mơ̆ng sui leh ti Daklak.

Tui si Nguyễn Cảnh Tùng, Khua knơ̆ng bruă sang čư̆ êa ƀuôn hgŭm Buôn Đôn, leh klei bi mŭt mbĭt, kluôm ƀuôn hgŭm mâo truh 15 djuê ana ayŏng adei hdĭp mbĭt mbla, hlăm anăn mâo êbeh 400 čô mnuih Lào. Klei djă pioh nanao knăm Bunpimay amâo mâo djŏ knŏng krơ̆ng kjăp knhuah bhiăn djuê ana mơ̆ng mnuih ƀuôn sang tinei ôh, ƀiădah lŏ jing klei bi mjĕ êrô, lŏ bi kjăp hĭn klei thâo bi mguôp, mđĭ kyar bruă duh mkra ala ƀuôn ti alŭ wăl.

 “Mnuih ƀuôn sang djuê ana Lào mâo hlăm brô 400 čô mnuih hdĭp mda hlăm alŭ wăl ƀuôn hgŭm Buôn Đôn. Anei jing knhuah gru dhar kreh djuê ana Lào dôk kriê pioh mơ̆ng sui leh. Grăp thŭn hmei mkŏ mjing nanao knăm mơak thŭn mrâo mơ̆ng mnuih Lào hdĭp hlăm alŭ wăl anei, čiăng bi êdah klei thâo bi mguôp plah wah hŏng dŭm djuê ana mkăn, mâo klei thâo bi đru hlăm bruă duh ƀơ̆ng, mđĭ kyar klei hdĭp ti alŭ wăl ƀuôn hgŭm Buôn Đôn.