Mmao mrăm knŏng mâo sa blư̆ hlăm thŭn hlăm yan hjan, mmao čăt ti lăn ênun, giăm ƀăng muôr. Mmao mrăm khăng čăt lu hĭn hlăm mlan 6 truh mlan 8 hlăm thŭn. Hlue si klei thâo mnuih Êđê, čiăng thâo kral mmao mrăm dưi ƀơ̆ng amâodah amâo dưi ƀơ̆ng snăn brei dlăng anôk mmao čăt mâo ƀăng muôr mơ̆ amâodah hơăi. Tal dua jing mơ̆ng mmao jing dlông, kô̆. Đuôn mmao dôk điêt uê mngač, truh prŏng snăn kô̆, mblang msĕ si adŭ.

H’Rŏk Êban (Aduôn Lia) ti ƀuôn Hŭk, să Čư̆ M’Gar, kdriêk Čư̆ M’Gar, čar Dak Lak brei thâo, mnuih Êđê bi mĭn phung mâo klei myun, hdĭp jăk tơdah nao hlăm dliê srăng ƀuh mmao mrăm. Mnuih ƀuôn sang thâo yua mnơ̆ng ƀơ̆ng jăk mơ̆ng dliê, hlăm anăn mmao mrăm jing sa mta mnơ̆ng ƀơ̆ng tŭ jăk kơ gŏ sang.

“Mnuih Êđê thâo ƀơ̆ng mmao mrăm mơ̆ng đưm leh. Pô khua thŭn leh anăn thâo kral ti mta mmao dưi ƀơ̆ng, amâo dưi ƀơ̆ng. Dưi tŭk mmao hŏng djam hrŭm dliê. Mta djam anei mnuih Êđê khăng tŭk hŏng hra, bột ngọt, amrêč. Hlăk đưm yan anei amâo guôn nao blei djam mtam ôh, mmao mâo lu hlăm hma.”

Mmao mrăm khăng čăt hlăm kping čư̆, hlăm đang kphê, đang ksu… ƀiădah dŭm ênoh yuôm tŭ jăk, mmih anăn lu mnuih khăng hiu duah. Ayŏng Y Zuem Mlô, ti ƀuôn Sưk, să Ea Đar, kdriêk Ea Kar, čar Dak Lak brei thâo, dŭm thŭn giăm anei, dleh dưi ƀuh mmao mrăm, sa kdrêč kyua wăl hdĭp mda amâo lŏ jăk, hlăk êjai lu mnuih duah mmao mrăm.

Knŏng Hlei pô myun kơh ƀuh mmao mrăm. Mmao mrăm tơdah pĕ ba wĭt mkra mjing mtam, lui sui srăng luč mta jăk. Ayŏng Y Zuem Mlô brei thâo:

“Hlăm yan hjan, tơdah nao pưk hma, dliê srăng ƀuh mmao mrăm. Leh rao bi doh, dưi tŭk djam amâodah sao. Tơdah tŭk djam tŭk êa hlơr leh anăn plĕ mmao, mnơ̆ng bi mƀăt, thiăm hla êč, hla kluă, djam ƀâo. Mta djam mkra mjing mơ̆ng mmao mrăm huă hŏng êsei amâodah riă bur ăt jăk mơak, tơdah bur ksă dưm djam ƀâo amâodah hla êč. Amâodah ăm leh anăn tak hŏng êa msĭn, tlê hŏng êsŭn, kơŭm hŏng hla mtei, jăk snăk.”

 Hlăm klei huă ƀơ̆ng mnuih Êđê, mmao mrăm lŏ dưi tŭk hŏng trŏng phĭ. Tơdah tŭk djam mơ̆ng mmao amâo dưm ôh lu mnơ̆ng bi mƀăt čiăng dưi krơ̆ng mta mmih leh anăn bâo mngưi. Mmao mrăm ênưih tŭk leh anăn amâo ruah mnơ̆ng bi mƀăt ôh. Mnuih ƀuôn sang khăng đeh hŏng êyăn čiăng kơ mta mmih bi lŭk, mâo mnâo ƀâo mngưi, êun... mjing mnơ̆ng ƀơ̆ng jăk amâo wơr.

 Hŏng mnâo jăk leh anăn mnơ̆ng tŭ jăk kơ asei mlei, lu phung hiu mnia blei mnơ̆ng ƀơ̆ng jăk ti Dak Lak khăng duah blei hŏng ênoh êbeh 500.000đ/kg. Hlăk êjai adiê hjan hŏng angĭn thut êăt ti lăn dap kngư liă lia, ăt jing klei bi knăl kơ yan mmao mrăm truh leh, phung myun srăng dưi mâo mnơ̆ng jăk mơ̆ng dliê kmrơ̆ng./.