Aduôn Ben brei thâo, mơ̆ng điêt ƀuh amĭ khăng mñam leh anăn kčoh kdrăp djuê ana anăn ñu ăt khăp kơ bruă maĭ pô ngă leh anăn hlue ngă. Kdrăp djuê ana aduôn aê đưm khăng mñam leh anăn kčoh hlue knhuah djuê ana. Bi ară anei snăn hlăm anôk ba čhĭ mâo mrai mrâo. Aduôn Ben brei thâo: čiăng dưi mâo sa kdrăp djuê ana pô pơ̆k mñam ngă lu bruă, mñam, jhĭt ăt suăi mơh.

“Hlăk đưm, leh pĕ kpaih srăng êwei mrai tŭk mđĭ klei rơ̆ng. Kâo ară anei snăn amâo mâo klei găl ngăn snăn ôh ƀiădah khăng blei mrai mkra mjing, mă êa jŭ leh anăn mña hlue si pô čiăng hlăm jar mñam, leh anăn mñam snăn khăt leh anăn kčoh čhum ao kơ êkei amâodah mniê.”

 Čiăng dưi mñam sa blah bi leh mâo sa hrue kăm. Sa blah snăn dưi kčoh 2 blah ao. Aduôn Ben brei thâo: hŏng klei čiăng kơ kdrăp djuê ana, brei mâo hdră mñam hlue si gru grua djuê ana Sêdang.

“Hdră mñam djuê ana kâo khăng mñam prŏng mđơr hŏng băn snăn sa blah dưi mbha mdua, kčoh 2 blah ao êkei. Tơdah mñam hliê snăn khăng mñam kơ kdrêč nah tluôn, leh mñam kdrêč nah anăp, lŏ jhĭt jing 4 blah ao. Tơdah kdrăp djuê ana mniê snăn mñam mơiêng hjăn, ao hjăn mơh jing 2 blah, sa blah êbeh 3 met, dưi kčoh 2 blah ao, mơiêng.”

Aduôn Ben lŏ brei thâo, êngao kơ mñam kčoh kdrăp djuê ana ñu lŏ mñam băn ƀă anak, ngă kdô dưm mnơ̆ng. čiăng dưi mâo mnơ̆ng siam leh anăn rơ̆ng mñam gru kđêč bi jăk, ku hruê mmông hlăm blah mñam anăn.

“Bruă mñam sa blah ao jing dleh snăk, boh nik mñam gru đêč, čiăng mjing gru đêč prŏng leh anăn siam jing suăi snăk leh anăn luič lu hruê mmông hĭn. Mñam gru đêč điêt snăn ênưih leh anăn ƀiă hruê mmông hĭn. Mâo gru đêč snăn blah mñam siam leh anăn yuôm.”

 Mñam kdrăp djuê ana jing bruă ngă jêñ jêñ, ba prăk hrui wĭt lu kơ aduôn Ben. Amâo djŏ dŭm năn ôh, ñu lŏ bi hriăm bruă anei kơ anak čô hlăm gŏ sang leh anăn ƀuôn sang. Hlăm anăn, Amai H’Diệp, jing anak mniê Aduôn Ben mâo amĭ bi hriăm leh anăn mbruă mñam mơiêng ao djuê ana.

“Kâo khăp leh anăn hriăm mñam kdrăp djuê ana pô mơ̆ng amĭ čiăng kriê pioh bruă djuê ana. Hlăk mrâo 19 thŭn kâo thâo mñam leh, hlăk anăn khăng dlăng amĭ mñam anăn kâo hriăm mơ̆ng amĭ. Hlăk 19 thŭn kâo thâo mñam leh băn ƀă anak, đa đa mñam pioh kčoh ao. Hlăk 20 thŭn kâo thâo dăp mrai leh anăn čŏng mñam blah leh anăn kčoh ao djuê ana siam hĭn. Kâo knŏng mñam kdrăp djuê ana pioh yua hlăm gŏ sang, mñam čiăng čhĭ snăn ka ôh kyua ka mâo klei thâo lu lu.”

 Kdrăp djuê ana jing kdrăp yuôm bhăn mnuih Sêdang. Mnuih ƀuôn sang khăng hơô kdrăp djuê ana hlăm knăm mơak, amâodah nao sang kkuh mpŭ. Vi Von, khua ƀuôn Kon H’Ring brei thâo: Lu msĕ si gŏ sang mnuih Sêdang mprăp sơăi kơ pô kdrăp djuê ana siam.

“Ao mơiêng mnuih Sêdang mâo mnuih ƀuôn sang kriê pioh mơ̆ng ênuk aduôn aê đưm truh kơ ară anei, mâo mnuih ƀuôn sang pioh jăk hlăm bŭng, hlăm hip, grăp blư̆ mâo knăm mơak kơh mă hơô. Hlăm gưl knăm mơak huă êsei mrâo mnuih ƀuôn sang khăng bi kƀĭn ti sang kƀĭn ƀuôn leh anăn hơô kdrăp djuê ana pô.”

 Ară anei, ti anôk ba čhĭ mâo lu kdrăp djuê ana hŏng lu mta mrâo, êa mil lu jơr grăp čô dưi blei djŏ hŏng klei pô čiăng. Êngao anăn, tơdah ƀuôn mâo knăm kơak, klei yuôm bhăn snăn mnuih ƀuôn sang hơô kdrăp djuê ana čiăng bi êdah klei jăk siam djuê ana pô./.