Nguyễn Thị San, jing mnuih Tày, amĭ kkiêng leh anăn hriê kơ prŏng ti Nghiã Đô, kdriêk Bảo Yên, čar Lào Cai. San yăl dliê, Nghiã Đô jing krĭng lăn đưm, anôk mkŏ mjing, bi lar klei dhar kreh lu jơr, jiă kma knhuah dhar kreh leh anăn klei blŭ mnuih Tày. Tinei lŏ mâo thiăm klei găl mđĭ kyar bruă hiu čhưn ênguê   êpul êya. Bruă hưn mdah, hưn mthâo dŭm mta mnơ̆ng dhơ̆ng alŭ wăl ăt msĕ mơh mnơ̆ng dhơ̆ng dhar kreh djuê ana truh kơ grăp čô mnuih jing klei čiăng êdi, boh nik hlăm wưng kdrăp mrâo mrang 4.0 msĕ si ară anei.

Êngao kơ bruă hgŭm hlăm bruă phung mniê ti alŭ ƀuôn, bruă pưk hma, Nguyễn Thị San pioh nanao mmông čiăng hiu duah, lŏ čih klei mmuiñ then, mmuiñ cọi đưm ti Nghĩa Đô. Truh ară anei, mnuih ƀuôn sang čih leh 119 klei mmuiñ cọi djuê ana mơ̆ng alŭ wăl leh anăn čang hmăng srăng mtô kơ phung hđeh hlăm mgĭ dih čiăng ñĕ kơ klei luič hĕ klei mmuiñ mơ̆ng aduôn aê. Boh nik, hlăm wưng ênuk mrâo mrang 4.0 anei, bruă lar bra ênoh yuôm dhar kreh djuê ana jing ênưih hĭn lu.

Hla pŏk web ala ƀuôn msĕ si Facebook, Zalo, YouTube, TikTok jing leh kdrăp tŭ jing đru hlăm bruă mkŏ, lar bra leh anăn răng kriê ênoh yuôm mnơ̆ng kriê pioh dhar kreh mguôp hŏng hdră mđĭ kyar hiu čhưn ênguê kơ êpul êya Tày. Hlue si Nai prĭn, Nguyễn Anh Cường –  Khua adŭ bruă dhar kreh mnuih djuê ƀiă (sang hră gưl prŏng Hà Nội), ară anei klei hmăi mơ̆ng kdrăp 4.0 ngă leh, leh anăn dôk bi mlih djăp mta bruă hlăm klei hdĭp mda anak mnuih, Tơdah drei păn kjăp klei găl snăn ai lar bra truh kơ êpul êya mnuih hlăm krĭng wăl, boh nik kluôm rŏng lăn srăng ênưih hĭn lu: Ăt mâo lu hdră čiăng răng kriê, hưn mdah ƀiădah hlue si kâo kei yuôm bhăn hĭn ăt jing bruă kriê pioh rup. Jing rup brei bi mjing mrô. Hŏng kdrăp 4.0 ară anei snăn bruă hưn mdah kơ kdrăp mnơ̆ng, kơ dhar kreh djuê ana jing ênưih hŏng lu hdră mdê mdê. Ăt msĕ mơh ênưih kơ bruă lar bra dŭm klei hâo hưn anăn. Êlâo dih mơĭt sa pŏk rup dleh mơh, ară anei knŏng sa klei ngă srăng dưi.

Ară anei facebook, tiktok dôk iêô jak lu mnuih kluôm rŏng lăn yua kyua dŭm klei thâo mĭn msĕ si like, share, follow, livestream…mjing leh wăl jăk čiăng mkŏ, lar bra dhar kreh. Dŭm hla pŏk fanpage mơ̆ng anăn ăt dưi mkŏ mjing hlue si akŏ klă klơ̆ng msĕ si: fanpage kơ mmuiñ then, mmuiñ cọi, amâodah hưn mdah kdrăp čŭt hơô djuê ana, mnơ̆ng ƀơ̆ng jăk… Tinăn, mguôp hŏng bruă hưn mthâo, hưn mdah dhar kreh, jing gru hmô mđĭ kyar hiu čhưn ênguê kñăm mđĭ ênoh yuôm mnơ̆ng kriê pioh, đru mđĭ klei đĭ kyar…

Hlue si amai Đồng Thị Vân Hà, mnuih Tày ti ƀuôn prŏng Bắc Kạn, čar Bắc Kạn, ară anei dŭm mta mnơ̆ng dhơ̆ng djŏ tuôm kơ dhar kreh djuê ana msĕ si: kdrăp djuê, ênhiang mmuiñ djuê ana amâodah dŭm mta mnơ̆ng dhơ̆ng mơ̆ng hrĭ mñam mơ̆ng mnuih djuê ƀiă ƀrư̆ hruê dưi hưn mthâo hŏng klei lu jơr mơ̆ng hla pŏk web ala ƀuôn. Si tô hmô, sa kdrăp djuê ana, hrô kơ nao rang mdah amâodah ba hlăm homestay čiăng hưn mthâo kơ phung tuê. Lu phung mda asei djuê ana Tày ba mnơ̆ng dhơ̆ng anăn kơ anôk mnia blei điện tử, ba hlăm facebook, zalo, tiktok čiăng hưn kơ grăp čô mnuih kơ kdrăp djuê ana. Ƀiădah anei ăt jing hdră diñu dôk hưn mdah kơ dhar kreh djuê ana, kơ mnơ̆ng dhơ̆ng mnuih Tày. Amai Đồng Thị Vân Hà brei thâo:Ti ƀuôn prŏng lu mnuih mâo klei mưng blei mnơ̆ng hlăm internet, kâo ăt ba yua mơh, mbĭt hŏng phung khua mduôn, êdam êra mă rup mnơ̆ng dhơ̆ng čiăng dưm hlăm internet, hŏng klei čanh hmăng mnơ̆ng dhơ̆ng pô ngă amâo djŏ knŏng dưi čhĭ ti ƀuôn, ti čar, hlăm ala čar ôh ƀiădah kbưi hĭn jing čhĭ kơ ala tač êngao.

Hruê anei, klei đĭ kyar mơ̆ng hla pŏk web ala ƀuôn hluh knông lăn mjing leh klei găl čiăng hgŭm hŏng lu ala čar mâo klei găl dưi pŏk mlar, hŏng klei găl kơ klei blŭ ala tač êngao leh anăn klei dưi păn kjăp, lu phung hlăk ai ruah klei mkŏ mjing Youtube hŏng boh phŭn hưn mdah dhar kreh, hiu čhưn ênguê Việt Nam mâo mblang klei Ăngle đru kơ ƀĭng găp ala tač êngao ênưih thâo ƀuh thâo săng. Lu hla pŏk web dưi ngă tŭ jing, klă sĭt jing dŭm anôk dhar kreh dưi dlăng hlăm leh anăn ala tač êngao mđing dlăng./.