Čing mnuih djuê ana Jrai mâo rĭng, hlăm grăp rĭng mâo mơ̆ng 3 boh kơ dlông, mâo điêt prŏng mdê mdê, boh điêt hĭn boh prŏng mơ̆ng mơ̆ng 10 – 15cm, hlăm anăn čing ana jing čing yuôm hĭn. Kpă Y – Čua, ti Ƀuôn Treng, să Êa H’Leo, čar Daklak lač: Mnuih Jrai ti Êa Hleo mâo lu mta čing mdê mdê, msĕ si čing Mnom, Čing Arap, čing trum, čing wang. Hlăm grăp rĭng čing anei mâo bruă tông mdê mdê sơăi hlăm klei hdĭp aguah tlam mlam hrue, pioh yua kơklei ngă yang adiê, klei huă mnăm mdê mdê. Čing Mnom tơdah tông dôk sa anôk, bi čing arap dưi tông êjai kdŏ êjai mbĭt hŏng êpul kdŏ, snăn čing arap lŏ pia jing jing čing suang. Kpă Y-Čua lač:

“Čing čhar jing yuôm bhăn snăk hŏng klei hdĭp phung ƀuôn sang, boh nik hŏng mnuih djuê ana Jrai hmei amâo mâo dưi kƀah ôh. Kyuadah ñu nao mđrĭng hŏng jih klei hdĭp anak mnuih. Mâo lu mta čing mnom, čing arap, lehanăn čing arap mrâo lŏ mkra mjing. Kreh ba yua msĕ snei, čing mnom pioh yua hlăm klei ngă yang adiê, êlâo kơ ngă yang mâo klei bi knăl hŏng klei tông sa wa čing čiăng kơ jih jang mnuih hlăm ƀuôn thâo lehanăn mprăp kơ klei ngă yang”.

Čing jing kdrăp tông siă suôr hŏng klei hdĭp mda dhar kreh, klei đăo mnuih Jrai. Tơdah mâo bruă mkŏ mjing ngă yang adiê, thâodah huă mnăm snăn amâo mâo kƀah ôh čing čhar. Ênai čing jing dŏ lŏ mđĭ ai jih jang mnuih, ba klei ktang kơ klei hdĭp ai tiê mnuih djuê ana Jrai. Kyua klei tŭ dưn mơ̆ng čing anăn yơh mnuih Jrai tinei djă pioh nanao bi jăk čing čhar pô, lehanăn lŏ mtô bi hriăm kơ hđeh gưl mrâo. Kpă Y – Čua lŏ brei thâo:

“Hŏng hla pŏk yang ƀuôn, tivi kâo čiăng bi lar klei anei kơ mnuih dôk kbưiăt dưi hmư̆ kơ čing čhar. Mgi dih anak čô pô bi kriê pioh mơh dhar kreh čing čhar ăt dôk kwang nanao hŏng jih jang mnuih hmư̆, ênai čing kwang kčŭt ai tiê jih jang mnuih bi kdŏ mmuiñ, klei anei mâo leh hlăm êrah anak mnuih Jrai, hmư̆ dưi thâo săng kơ čing pô dôk kwang anăn”.

Lač kơ klei tŭ dưn čing čhar hlăm klei hdĭp dhar kreh ai tiê mnuih Jrai ti kdriêk Êa H’Leo, Nguyễn Huy Dũng, khua adŭ bruă dhar kreh kdriêk Êa H’Leo lač, klei hdĭp mda anak mnuih Jrai ti anei dôk dleh dlan, ƀiădah lĕ mâo lu mnuih mbruă kơ čing čhar, thâo bi kriê pioh knhuah gru dhar kreh djuê ana pô, lehanăn diñu hrăm mbĭt hŏng bruă sang čư̆ êa alŭ wăl gĭr ngă djăp mta bruă čiăng kơ hđeh gưl mrâo thâo kơ čing čhar pô. Nguyễn Huy Dũng lač:

“Hŏng dhar kreh čing čhar ti kdriêk Êa H’leo mâo mnuih Êđê, lehanăn Jrai. Hŏng mnuih Jrai ti Êa H’Leo mâo klei mdê hlăm bruă ba yua čing čhar. Čing mnuih Jrai mâo čing arap, lehanăn čing arap mrâo lŏ mkra. Čiăng dưi lŏ bi kơrŭ lehanăn kriê pioh hmei hlăk dôk ngă lu mta bruă. Hmei bi tuôm hŏng phung ƀuôn sang ksiêm duah kơ dhar kreh digơ̆, lehanăn mơ̆ng digơ̆ mtam yơh jing pô bi mĭn, si srăng ngă čiăng dưi kriê pioh. Hlăm ƀuôn adôk mâo lu snăk mnuih mbruă kơ čing čhar, anei mơh jing klei găl hlăm bruă kriê pioh. Anăp anei hmei srăng pŏk adŭ mjuăt bi hriăm tông čing ti ƀuôn anei mtam, lehanăn ti dŭm boh ƀuôn mkăn hlăm kdriêk anei. Čang hmăng ƀrư̆ ƀrư̆ srăng mâo boh tŭ dưn kơ bruă kriê   pioh jăk hĭn ară anei”.

Čing jing knhuah gru dhar kreh yuôm bhăn, jing ngăn dưn mơ̆ng aê aduôn pô mơ̆ng mnuih Jrai krĭng lăn anei bi djă pioh. Ênai čing kwang, iêo jak jih jang mnuih lŏ jĕ giăm hĭn, siă suôr hĭn hŏng lăn ala êa djuh pô, bi djă ti kngan čhuang mbĭt hlue ênhiang čing./.