Mơ̆ng aguah ưm ôk leh, jih jang kpur mơ̆ng phung ƀuôn sang bi kuič răm pui leh sơăi, dlăng lăng săp pui đung đĭ phă adiê, mđung ba wăt mnâo mnañ mdhư̆ mdhưi mơ̆ng djăp mta mnơ̆ng ƀơ̆ng mơ̆ng knhuah djuê ana pô, msĕ si điŏ brông, kpiê čeh, kđeh čĭm ŭn, čĭm mnŭ lehanăn kkuih, djam trŏng phĭ, lehanăn djam pŭng... H’Vêu, sa čô mnuih dôk mkra mnơ̆ng ƀơ̆ng lač:

“Hrue 1 jing hrue ngă yang mdiê, jih jang mnuih hlăm êpul pô bi kđrăp mđrăm mbĭt mă bruă. Anei jing điŏ brông, anei jing êbŭng msăm đeh hŏng čĭm ŭn, bi ana mtei leh mrâo reh mñao kpit hĕ lehanăn pioh kčoh hŏng kđeh čĭm kkuih leh anăn jiă hlăm đĭng m’ô pioh brông. Lehanăn ba jih jang mnơ̆ng anei kơ sang roong huă ƀơ̆ng kơ anăn”.

Sa mta mnơ̆ng ƀơ̆ng amâo mâo dưi kƀah ôh grăp blư̆ huă êsei mrâo, anăn jing čĭm kkuih. Tui si klei mĭn mnuih Sedang, kkuih jing sa mta mnơ̆ng bi rai dŏ pla mjing, kyuanăn mă kkuih pioh ngă yang, čiăng kơ thŭn êdei kkuih amâo lŏ bi rai ôh mnơ̆ng pla mjing. A Quân, pô hiu ƀêč kkuih pioh mkra mnơ̆ng ƀơ̆ng hŏng kđeh kkuih lač, čiăng dưi mâo kkuih doh snăn bi đuĕ hiu hlăm anôk kbưi truh hlăm kmrơ̆ng:

“Mơ̆ng anei truh kơ anôk ƀêč kkuih mâo hlăm brô 75; 76 km, grăp blư̆ đuĕ hiu snăn luič truh 12h yang hrue dơ̆ng lehanăn truh 7; 8 h aguah kơh mâo wĭt kơ sang. Gưl đuĕ hiu mrâo anei kâo djă ba truh 50 boh kap”.

Tui si Vi Von, khua ƀuôn, ƀuôn Kon H’ring, êlâo dih, mnuih Sedang ti Kon Hring dôk ti kdriêk Đăk Tô, čar Kon Tum. Kyua roh gah tuôm hŏng klei blah ngă, thŭn 1972 đuĕ hriê dôk ti să Ea Yiêng, kdriêk Krông Pač, čar Daklak; truh kơ thŭn 1988 lŏ hiu duah lăn čăt jing hĭn mâo 1988 ti Kon Hring čiăng mkŏ mkra ala ƀuôn mrâo, mđĭ kyar klei hdĭp mda. Êlâo dih knăm huă êsei mrâo mnuih djuê ana Sedang knŏng mkŏ mjing mă mdê bi sang, mkŏ mjing nanao dơ̆ng mơ̆ng mlan 10 hlŏng truh kơ mlan 12. Mơ̆ng thŭn 1994 truh kơ ară anei, knăm huă êsei mrâo hlŏng jing knăm prŏng, mkŏ mjing mbĭt hlăm jih boh ƀuôn, lehanăn knŏng mkŏ mjing mă hlăm sa hrue, grăp boh sang bi mprăp sơăi mnơ̆ng ƀơ̆ng lehanăn ba kơ sang bi kƀĭn ƀuôn huă ƀơ̆ng mbĭt kơ anăn.

“Ruah hrue 1/1 thŭn mrâo jing yuôm bhăn hĭn, yap jing mdiê leh wiă ênŭm, ksŭ kphê leh ruĕ pĕ boh. Bruă hăm sa thŭn leh ênŭm kơ sang. Snăn bi mkŏ mjing huă ƀơ̆ng hơ̆k mơak, tinăn mâo klei bi yăl dliê, bi hriăm êmuh klei duah ƀơ̆ng, lehanăn lŏ hyuă kjăp hĭng klei bi mguôp hlăm ƀuôn sang”.

 Leh čing čhar kwang klei jum tue, jih jang mnuih bi kluh nao ênŭm ti sang roong hrăm mbĭt mkŏ mjing klei ngă yang adiê lehanăn mkŏ mjing klei huă ƀơ̆ng  

“Hmei hmăng hmưi kơ thŭn mrâo buh pla mdiê ktơr čăt đĭ jăk siam, msĕ hlang hlăm dliê, msĕ kbâo hlăm bưn, jih jang mnuih tui akâo ba djuê, čang hmăng kơ sa thŭn jăk êa hlĭm hjan, mnuih mâo klei suaih pral, grăp boh sang êđăp ênang, anak čô hriăm hră mơar jing mnuih tŭ dưn...”

Leh klei ngă yang adiê, kpiê čeh dơ̆ng čŭt đĭng, čing čhar dơ̆ng bi tông, mơ̆ng anăn klei bi kdŏ čhuăng bi krăp, mđrăm mbĭt hŏng klei bi mmuiñ, hlăp hlue knhuah djuê ana pô. Jih mnuih hlăm ƀuôn, lehanăn wăt hŏng tue truh hlŏng jing mnuih jĕ giăm sĭt suôr hlăm knăm mơak akŏ thŭn, bi hơêč hmưi sa thŭn mrâo mâo lu klei myun mdan mơak mñai.

-“Kâo jing Nguyễn Văn Dương hriê mơ̆ng Hà Nội, kâo ƀuh phung ƀuôn sang kơ anei mâo knhuah dhar kreh jăk siam êdi, lehanăn kâo khăp êdi ƀuh klei anei. Kâo khăp lehanăn mpŭ snăk kơ knhuah gru dhar kreh Sedang ti ƀuôn Kon H’ring čar Daklak anei. Digơ̆ thâo khăp, thâo mpŭ kơ tue. Iêo mnăm kpiê čeh msĕ hŏng mnuih hlăm sa boh sang mtam”.

- “Kâo jing Lê Thị Thanh Thủy dôk ti ƀuôn Jŏk, să Ea H’đing, anei jing gưl tal 5 leh kâo hriê huă êsei mrâo hŏng ƀuôn Sedang. Kâo ƀuh thŭn anei phung ƀuôn sang mơak hĭn, lehanăn mâo lu bruă ngă hĭn, jăk snăk, phung ƀuôn sang mprăp djăp ênŭm. Bi kơ klei mnơ̆ng ƀơ̆ng huă snăn mâo lu mta mnơ̆ng ƀơ̆ng mơ̆ng phung ƀuôn sang kơ anei”.

 Leh bi mnăm kpiê čeh, nao hlăm klei bi čhuang kdŏ phung mniê êra, êkei êdam jih jang bŏ hŏng klei mtluk mtlak mơak mñai. Tinei lăn adiê êđăp ênang, ai tiê anak mnuih mhač tlao, thâo bi khăp mđrăm mbĭt hŏng phung ƀuôn sang ti ƀuôn Kon H’ring./.