Hlăm jih jang knăm ngă yang bruă lŏ hma mnuih Mnông, snăn huă êsei mrâo jing yuôm bhăn hĭn êdi. Knăm anei knŏng ƀuh jing knăm ngă yang kơ klei hdơr knga kñăm mpŭ kơ ana mdiê, tinăn lŏ bi knăl kơ klei bi mguôp, klei hmăng hmưi kơ klei hnŭk ênang kơ jih găp djuê, ƀuôn sang hlăm sa thŭn mrâo. Y Tiêng (djuê ana M’Nông) ti să Nâm Nung, kdriêk Krông Knô, čar Dak Nông brei thâo Klei ngă yang mdiê mrâo” anăn yơh jing klei mơak prŏng. “Ngă yang mdiê, iêo mngăt mdiê wĭt jing bruă yuôm bhăn snăk, jing hruê mơk kơ phung ƀuôn sang, msĕ hŏng hrue tết ară anei anăn yơh. Leh mâo iêo mngăt mdiê kơ sang, snăn puôt mdiê ksă ba wĭt tăp braih tal êlâo knă êsei iêo jak phung ƀuôn sang hriê huă ƀơ̆ng jing klei ngă yang mdiê mrâo, leh kơ ăn ngă yang asei kơ anak čô hlăm sang hŏng dŭm hlao mprăp mnơ̆ng ngă yang djăp ênŭm mâo điŏ, čĭm ŭn, kpiê... Myơr kơ yang”./.

Ayŏng Rơ Châm Nguưr, ti ƀuôn Jut 1, să ia Dêr, kdriêk Ia Grai, čar Gia Lai brei thâo, êlâo adih, mnuih Jarai amâo ƀơ̆ng têt djuê ana msĕ mnuih Yuăn. Thŭn mrâo mơ̆ng mnuih Jarai mphŭn mơ̆ng yan mnga, jing mlan 3 grăp thŭn, leh mnuih ƀuôn sang hrui êmiêt boh mnga. Mnuih Jarai mŭt hlăm yan huă blăm mnăm thŭn hŏng lu knăm m’ak msĕ si huă êsei mrâo, knăm lui msat… Hluê hruê mlan, leh êpul êya mnuih Jarai lehanăn Yuăn hfĭp mbĭt, mâo klei bi mjĕ dhar kreh, mnuih Jarai ăt mkŏ mjing knăm drông Têt djuê ana. Hlăm wưng anei, dŭm gŏ sang mprăp dŭm mta mnơ̆ng ƀơ̆ng jiă knhuah djuê ana čĭăng drông tuê, găp djuê. Jih jang dưi mprăp djăp ênŭm, ai êwa drông thŭn mrâo m’ak hlak, hdơ̆k kdơ̆k čiăng kkuh drông sa thŭn mrâo jăk hĭn. “Gŏ sang kâo lehanăn mnuih ƀuôn sang hlăm ƀuôn kâo ti Ia Dêr anei kreh đeh hla hbei ƀlang, djam pŭng amâo dah djam mtam mâo hlăm wăl sang. Sang thâo mâo ƀiă čuh ŭn, mnĭ, đa đa čuh êmô tui hluê hŏng klei mâo mdê mdê. Hlăm hruê 1 Têt mnuih Jarai kreh ngă yang kơ aê aduôn atâo atiêt, mtă kơ čô anak thâo mpŭ kơ aduôn aê, amĭ ama, Thŭn mrâo bi h’êč hmưi hdơ̆ng găp, hiu čuă êmua čiăng mâo klei m’ak, bi hgŭm thâo bi đru hlăm bruă mă lehanăn klei hdĭp hlăm gŏ sang ƀrư̆ hruê ƀrư̆ đĭ kyar. Mnuih khua thŭn jing gru mngax čiăng anak čô tui hriăm mâo êdei anăp jăk siam đru kơ pô, gŏ sang lehanăn ala ƀuôn đĭ kyar”.