Khădah dôk hlăm wưng puôt wiă mdiê ƀiădah grăp mmăt, Pleiku Roh, ƀuôn hgŭm Yên Đỗ, ƀuôn prŏng Pleiku ăt mčhĭt m’uăt ênai čing čhar lehanăn klei blŭ tlao ti Sang Roong. Kyua anei jing mmông giăm 50 čô hlăm êpul tông čing phung hđeh, phung êdam êra lehanăn phung khua hlăm ƀuôn nao hriăm tông bi kjăp čiăng mprăp kơ Festival Dhar kreh čing čhar Gia Lai 2023 mkŏ mjing hlăm hruê 11/11 lehanăn 12/11. Siu Thưm – êpul tông čing êdam êra brei thâo, êpul phung mbruă ti ƀuôn srăng mdah 4 hdră jing knăm mdah wĭt klei ngă yang m’ak mdiê mrâo, mmuñ ênhiang djuê ana, mdah hdră tông čing čhar lehanăn tông ayŭ kdrăp djuê ana:

 “Yan puôt wiă mdiê kuê truh leh, ƀiădah phung mbruă ăt hur har nao hriăm čiăng bi kjăp hdră tông čing, dŭm ênhiang kdŏ čiăng kơ hdră kơ anăp dưi mkŏ mjing jăk hĭn, mkăp kơ phung tuê nao dlăng”.

 Ti kdriêk Krông Pa, hdră mprăp ăt msĕ mơh. Ngô Đức Mạo – Khua anôk bruă Dhar kreh – hâo hưn lehanăn Mjuăt ktang asei mlei kdriêk brei thâo: Thŭn anei, kdriêk mâo 50 čô mbruă nao hgŭm hlăm Hruê kăm Dhar kreh hiu čhưn ênguê mơ̆ng čar. Hluê anăn, dŭm hdră tông čing srăng dưi mdah hlăm knăm m’ak Festival; phung mbruă lŏ mdah wĭt bruă djuê ana mơ̆ng đưm msĕ si hrĭ mñam, mkrah mkra rup, pơ̆k mñam hlăm knăm m’ak ktuê êlan. Čiăng mjing sa wăl anôk dhar kreh djuê ana jăk siam, êpul lŏ mkra dŭm mta mnơ̆ng ƀơ̆ng jăk ti alŭ wăl msĕ si điŏ brông, čĭm mnŭ ăm, čĭm êmô ƀhu sa mđiă čiăng hưn mthâo kơ phung tuê hiu čhưn ênguê.

 “Hlăm adiê tlam mmăt, leh sa hruê mă bruă duh mkra pla mjing, phung mbruă hriê ti sang dhar kreh ƀuôn lŏ hriăm. Hŏng phung mbruă nao hgŭm krah mkra rup, pơ̆k mñam, hrĭ mñam ăt mprăp nao truh ti Pleiku kñăm bi leh mnơ̆ng pô mkra, pô mñam, hưn mthâo hŏng tuê hiu čhưn. Grăp mmăt, phung mbruă ăt tui ksiêm kơ klei ngă yang m’ak sang mrâo, knăm bi mnuh kbao čiăng ba sa wăl anôk jiă knhuah dhar kreh mnuih Jarai ti Krông Pa”.

Hruê kăm Dhar kreh – Hiu čhưn ênguê Gia Lai 2023 srăng dưi mkŏ mjing mơ̆ng hruê 11/11 – 18/11 mâo klei hgŭm mơ̆ng hlăm brô 1 êbâo čô mbruă hlăm lehanăn êngao čar. Hruê kăm srăng mphŭn kčưm hŏng Festival Wăl dhar kreh Čing čhar Gia Lai 2023 mâo êpul phung mbruă mơ̆ng 17 kdriêk, wăl krah, ƀuôn prŏng ti alŭ wăl čar lehanăn dŭm čar Lăn dap kngư. Leh kơnăn jing knăm m’ak mnga kpĭ – čư̆ pui Čư̆ Dang Yang kdriêk Čư̆ Pah, knăm bi mtiŏ mran ti êa krông Pô Cô kdriêk Ia Grai.

Ƀri gưl anei, Gia Lai ăt mkŏ mjing knăm m’ak hlăm ktuê êlan, mdah wĭt hdră bi mjĕ mjuk dhar kreh êpul êya, klei bhiăn dhar kreh djuê ana mơ̆ng đưm; rang mdah, hưn mthâo kdrăp tông ayŭ Lăn dap kngư, rup siam hưn mthâo kơ dhar kreh Gia Lai, kơ knhuah gru ala čar lehanăn mnơ̆ng yuôm mơ̆ng ala čar ti Gia Lai,... Nguyễn Xuân Hà – Khua adŭ bruă Dhar kreh, hâo hưn ƀuôn prŏng Pleiku, anôk mkŏ mjing lu hdră hlăm knăm anei brei thâo:

 “Ară anei, dŭm să, ƀuôn hgŭm, anôk bruă ti ƀuôn prŏng Pleiku dôk mprăp djăp bruă čiăng hâo hưn, hưn mthâo pŏk rup Gia Lai lač kluôm, anak mnuih krĭng čư̆ čhiăng Pleiku lač hjăn truh kơ phung tuê hiu čhưn ênguê hlăm lehanăn êngao ala čar. Ară anei, dŭmêpeul phung mbruă ti dŭm boh ƀuôn mnuih djuê ƀiă dôk hriăm lŏ bi kjăp hdră tông cicng čhar, krah mkra rup, pơ̆k mñam, hrĭ mñam, čiăng mprăp kơ dŭm hdră hlăm Hruê kăm Dhar kreh hiu čhưn ênguê čar Gia Lai.”

Hruê kăm Dhar kreh hiu čhưn ênguê čar Gia Lai thŭn 2023 kñăm hưn mthâo boh tŭ yuôm dhar kreh jăk siam, hưn kơ wăl anôk hiu čhưn ênguê jăk siam ti Gia Lai, boh nik wăl anôk dhar kreh čing čhar lăn dap kngư dôk hlăm Hdră ngă bruă lŏ krŭ wĭt, kriê pioh lehanăn mđĭ lar boh tŭ yuôm knhuah dhar kreh amâo êdah klă bi ala kơ anak mnuih tar rŏng lăn. Khua anôk bruă sang čư̆ êa čar Gia Lai Trương Hải Long mtă kơ anôk bruă djŏ tuôm mđĭ hĭn ai tiê đua klam, bi hgŭm pral hlăm hdră ngă bruă kñăm rơ̆ng klei tŭ dưn, jăk siam dưi jak iêu lu mnuih ƀuôn sang, phung tuê hiu čhưn ênguê, phung duh bi liê, đru mtrŭt mđĭ kyar bruă duh mkra, dhar kreh lehanăn hiu čhưn ênguê ti alŭ wăl čar. Anôk čhĭ mnơ̆ng, anôk dôk đih đăm amâo dưi mđĭ ênoh hlăm wưng anei, mnuih ƀuôn sang ƀuôn prŏng Pleiku lŏ dơ̆ng pŏk ngă gru hmô sang tlô “Jăk msĕ ti sang”… čiăng mjing pŏk rup siam, khăp kơ tuê, rơ̆ng dŭm hdră anei dưi mkŏ mjing tŭ dưn, êđăp ênang, tŭ yuôm./.