Amĭ kkiêng leh anăn hriê kơ prŏng ti Ƀon Bu Dak, să Thuận An, kdriêk Dak Mil, čar Dak Nông. Leh ruê̆ hriăm gưl prŏng Đà Lạt (nai mtô hƀuê ênuk), thŭn 2014, H’Keng nao mtô ti sang hră gưl 2 Nguyễn Trãi, kdriêk Dak Song. Jing nai mtô mda asei, ƀiădah hŏng klei thâo jing sa čô nai, klei dhar kreh leh anăn klei blŭ lu jơr, anăn H’Keng mâo nanao mnuih iêô nao mtô klei M’Nông ti Anôk mtô mjuăt jêñ jêñ kdriêk Dak Song, čar Dak Nông: ‘Arăng iêô kao nao mtô klei M’Nông ti Anôk mtô mjuăt jêñ jêñ kdriêk Dak Song, čar dak Nông hlăm dua gưl 2016 leh anăn thŭn 2020, adŭ tal êlâo mâo 35 čô nai, tal dua mâo 137 čô. Phung hriăm lu jing phung mă bruă knŭk kn ati čar Dak Nông msĕ si aê mdrao, nai mtô, kahan ksiêm… Ară anei klei Mnông dưi mtô bi hriăm hlăm sang hră, kyua anăn phung hriăm lu jing phung ayŏng amai adei Yuăn nao hriăm lu”.

Klei Mnông mâo 7 êpul, hlăm anăn êpul M’Nông Preh dưi ruah jing klei blŭ pioh bi blŭ hrăm. Kyua anăn, hlăm hdră mtô bi hriă, brei phung nai mblang bi nik pruê̆ blŭ leh anăn boh blŭ. Hlăm klei M’Nông lu jing asăp blŭ bi knar anăn ăt jing klei dleh hŏng phung hriăm. Nai H’Keng duah klei msir mgaih čiăng kơ phung hriăm dưi thâo săng hĭn. Tal êlâo, phung nai mtô jing knuă druh, lu djuê ana mdê, bi tuôm lu klei dleh dlan hlăm hdră hriăm klei blŭ mrâo. Ƀiădah hŏng klei nai H’Keng bi hriăm jih ai tiê, phung hriăm gĭr tui hriăm. ‘Phung hriăm hur har snăk, wĭt ti sang ăt lŏ iêô đĭng blŭ brei nai mblang boh blŭ ka thâo săng. Klei Mnông dleh tui blŭ, mâo boh blŭ đŏk kơ dlông leh anăn kơ gŭ msĕ si klei Yuăn. Djuê ana M’Nông mâo lu êpul mdê mdê, hjăn ti kdriêk Dak Mil jing Mnông Preh, ƀiădah ti să Dak Ghênh leh anăn Dak Săk lŏ mâo êpul Mnông mdê anăn mâo boh blŭ mdê mdê. Hlăm hdră mtô snăn yua hră mbĭt, anăn bruă yua hlăm klei mtô bi hriăm ăt mâo mơh boh blŭ ka msĕ plah wah dŭm krĭng kwar kyua anăn anei jing klei dleh dlan hĭn.”

Jing sa čô nai dôk msa, ka mâo lu klei thâo, boh nik hlăm bruă mtô bi hriăm klei blŭ, boh nik hră mơar klei Mnông adôk ƀiă, ƀiădah nai H’Keng amâo mdei tui hriăm, mbŏ čiăng kơ bruă mtô bi hriăm mâo klei tŭ dưn. Ñu pioh lu mmông ksiêm hriăm tui duah hdră mơar, hriăm klei Mnông mơ̆ng klei hdĭp ƀuôn sang, ba rup sĭt hlăm klei mtô čiăng kơ phung hriăm thâo pral hĭn. Nai H’Keng brei thâo: êngao kơ tui hriăm ênuk nao êlâo, bruă mtô bi hriăm klei M’Nông brei mâo mơ̆ng klei čiăng yua boh sĭt hlăm klei bi blŭ hrăm: “Wăt tơdah kâo jing mnuih mrâo anăn kâo hriăm lu hĭn, ƀiădah kâo hur har snăk hŏng hdră bi hriăm klei M’Nông pô. Kâo mơak kyua dưi mtô phung hriăm. Klei kâo mơak hĭn grăp blư̆ nao mtô jing phung ayŏng amai yua klei Mnông kkuh alum kơ nao. Mơak hĭn hlăk grăp hruê phung hruăm lŏ thaoa lu boh blŭ mrâo, dưi bi blŭ hrăm hŏng klei M’Nông anăn jing klei mơak mơ̆ng sa čô nai”.

Čiăng dưi mâo klei tŭ dưn hĭn hlăm klei mtô bi hriăm, nai H’Keng ăt mâo lu klei dôk bi mĭn. Ñu čang hmăng klei M’Nông sĭt dưi bi hriăm srăng msĕ hŏng dŭm boh blŭ dŭm êpul mnuih Mnông mdê mdê. Bruă djŏ tuôm brei mâo sa hră mtô bi hriăm klei M’Nông, ênưih thâo săng, ênưih hriăm leh anăn dưi yua lar ƀar. Mơ̆ng anăn, jing hră mơar klă sĭt, amâo djŏ knŏng phung hriăm jing phung knuă druh dưi hriăm ôh ƀiădah phung hđeh sang hră gưl tlâo dưi hriăm klei blŭ pô hnưm hĭn. ‘čang hmăng bruă Sang hră ksiêm hriăm leh anăn hnưm mâo hdruôm hră klei Mnông čiăng dưi yua hlăm klei mtô bi hriăm, amâo djŏ knŏng hjăn kơ phung hriăm jing phung knuă druh mơ̆ng dŭm dhar bruă ôh, ƀiădah lŏ yua hlăm sang hră. Čang hmăng Đảng leh anăn knŭk kna mđing dlăng đru kơ lu mnuih hĭn kơ mnơ̆ng dhơ̆ng hlăm sang hră, boh nik dưi ba klei M’Nông bi hriăm kơ wăt hđeh sang hră, kriê pioh klei blŭ leh anăn boh hră.”

Bruă mtô bi hriăm klei M’Nông kơ phung knuă druh leh anăn hđeh sang hră amâo djŏ knŏng mphŭn mơ̆ng klei čiăng hlăm bruă mă ôh, ƀiădah mơ̆ng anăn đru răng kriê leh anăn mđĭ lar ênoh dhar kreh mơ̆ng sa djuê ana. Kyua anăn, klei gĭr bi hriăm klei blŭ djuê ana pô mơ̆ng nai H’Keng ti kdriêk Dak Song, čar Dak Nông năng mpŭ snăk./.