Dŭm mnơ̆ng kriê pioh dhar kreh Chăm mơ̆ng sang tuôr, knăm knhuah gru djuê ana leh anăn dŭm ƀuôn mkra mnơ̆ng mmuôn hŏng lăn, pơ̆k mñam mơ̆ng mnuih Chăm tơdah dưi mkŏ, ba yua tŭ dưn srăng jing mnơ̆ng dhơ̆ng bruă hiu čhưn ênguê mkŏ mjing hdră duh ƀơ̆ng čiăng mđĭ prăk hrui wĭt kơ mnuih ƀuôn sang.

Amai Hán Thị Kim Sương ti ƀuôn Chăm Hậu Sanh, să Phước Hữu, kdriêk Ninh Phước ƀuh mơak snăk leh tal êlâo dưi hgŭm hriăm mjuăt hŏng akŏ ba yua mnơ̆ng kriê pioh dhar kreh Chăm mđĭ kyar hơĭt kjăp hŏng klei hgŭm mơ̆ng êpul êya, kyua Êpul hgŭm Ăngle bi hgŭm hŏng Anôk bruă bruă dhar kreh Chăm Ninh Thuận mkŏ mjing. Adŭ bruă mâo 35 čô, hriê mơ̆ng ƀuôn bruă mkra mnơ̆ng hŏng lăn čuh Bàu Trúc, ƀuôn bruă pơ̆k mñam Mỹ Nghiệp leh anăn dŭm alŭ wăl mâo mnơ̆ng kriê pioh sang tuôr Chăm. Amai Hán Thị Kim Sương brei thâo:

  Hlăm wưng êgao, tơdah dưi hriăm mjuăt ƀuh tŭ dưn kơ čiăng pô mâo klei thâo kơ mđĭ kyar hiu čhưn êpul êya mơ̆ng dhar kreh Chăm pô. Ti ƀuôn pô mâo sang Pôrôme, kyua anăn, pô ăt hưn mdah čiăng hiu dlăng sang Pôrôme. Čiăng kơ tue thâo ƀuh kơ klei mđĭ kyar hiu čhưn ênguê ti čar pô.

Hŏng dŭm sang tuôr Chăm adôk snăn, hŏng dŭm knăm mơak djuê ana dưi mkŏ mjing grăp thŭn leh anăn dŭm ƀuôn bruă msĕ si ƀuôn pơ̆k mñam Mỹ Nghiệp, ƀuôn mkra mnơ̆ng hŏng lăn čuh Bàu Trúc, tơdah dưi ba yua jăk srăng jing dŭm anôk truh jăk, čiăng kơ Ninh Thuân ba yua dŭm mta mnơ̆ng kriê pioh Dhar kreh Chăm mđĭ kyar hiu čhưn ênguê êpul êya. Kơ klei găl mđĭ kyar hiu čhưn ênguê êpul êya mâo klei tŭ dưn, amai Phạm Thu Nha, Êpul hgŭm Ăngle brei thâo:

 “Hŏng klei hgŭm mơ̆ng êpul êya snăn hmei đăo knang alŭ wăl srăng lŏ dơ̆ng mđĭ lar dŭm ênoh yuôm djuê ana ăt msĕ mơh pŏk ngă dŭm bruă lu jơr kriê pioh, mđĭ lar ênoh yuôm dhar kreh leh anăn đru kơ êpul êya ti alŭ wăl mđĭ kyar bruă duh mkra mơ̆ng mnơ̆ng kriê pioh dhar kreh mơ̆ng alŭ wăl pô.”

Ară anei dŭm anôk truh msĕ si ƀuôn bruă mkra mnơ̆ng hŏng lăn čuh Bàu Trúc, ƀuôn bruă pơ̆k mñam Mỹ Nghiệp kah knar grăp hruê mâo êbeh 300 čô nao čhưn dlăng. Hjăn sang đưm Pô Klong Girai, grăp thŭn mâo hlăm brô 120 êbâo čô tue hiu čhưn. Ti ƀuôn Bàu Trúc, êngao kơ hdră mkra mjing mnơ̆ng hŏng lăn čuh amâo mdar kngan snăn bruă mă lăn mkra mnơ̆ng hŏng lăn čuh leh anăn tŭk ăt mdê hjăn snăk, phung tuê khăp snăk kơ klei anei. Tơdah nao ti ƀuôn bruă mkra mnơ̆ng hŏng lăn čuh Bàu Trúc, hŏng klei hiu dlăng hdră mkra mnơ̆ng hŏng lăn čuh hŏng phung thâo mbruă, phung tuê lŏ đru hưn mdah mnơ̆ng dhơ̆ng mâo mnơ̆ng mkra hŏng lăn čuh Chăm Bàu Trúc hŏng grăp čar kwar. Ayŏng Siêu H Riêng sa čô tuê ti čar Gia Lai brei thâo:

: “Hlăm wưng nao čhưn ti ƀuôn bruă mkra mnơ̆ng hŏng lăn čuh Bàu Trúc, kâo ƀuh lu mta mnơ̆ng dhơ̆ng, klei găl čiăng mđĭ kyar hiu čhưn ênguê êpul êya. Sa hlăm dŭm mta mnơ̆ng dhơ̆ng yuôm hĭn jing mnơng mkra hŏng lăn čuh Bàu Trúc. Tơdah mnơ̆ng hŏng lăn čuh Bàu Trúc dưi mâo UNESCO yap jing mnơ̆ng kriê pioh dlông rŏng lăn, snăn anăn jing klei găl prŏng kơ êpul êya Chăm ti ƀuôn Bàu Trúc dưi mkŏ hŏng dŭm êpul êya mkăn amâodah phung thâo mbruă bi mguôp hŏng dhar kreh kdŏ mmuiñ čiăng mđĭ kyar hiu čhưn ênguê êpul êya Bài Trúc.

Mơ̆ng dua thŭn anei, ti ƀuôn mkra mnơ̆ng hŏng lăn čuh Bàu Trúc mkŏ mjing leh Anôk bruă hiu čhưn ênguê êpul êya hŏng djăp dŭm êpul msĕ si: Êpul drông tuê, êpul mnơ̆ng ƀơ̆ng huă, êpul tuh mnơ̆ng hŏng lăn čuh, êpul ksŏ mmuiiñ… Kyua mâo bruă ngă anăn Anôk bruă hiu čhưn ênguê êpul êya Bàu Trúc amâo djŏ knŏng pioh kơ tuê hiu čhưn ti ƀuôn bruă ôh ƀiădah lŏ mâo arăng iêô nao hưn mdah mnơ̆ng dhơ̆ng Chăm ti lu alŭ wăl hlăm kluôm ala. Amai Đàng Thị Ngọc Ngà, Wăl Bàu Trúc, wăl krah Phước Dân, kdriêk Ninh Phước, Ninh Thuận brei thâo:

     Mơ̆ng hruê Anôk dlăng bruă hiu čhưn ênguê êpul êya Bàu Trúc dưi mkŏ mjing. Hmei dưi ktrâo lač, hriăm mjuăt phung adei ngă bruă hiu čhưn ênguê êpul êya. Si bĕ ngă čiăng kơ tuê čhưn ênguê khăp, nao čhưn dlăng, ksiêm hriăm kơ dhar kreh Chăm. Mơ̆ng anăn, hưn mthâo kơ tuê hiu čhưn hlăm ala čar leh anăn ala tač êngao thâo kơ lu hră mơar dhar kreh mnuih Chăm.

 Ba yua mnơ̆ng kriê pioh dhar kreh čiăng mđĭ kyar hiu čhưn ênguê ti dŭm krĭng mnuih Chăm Ninh Thuận čiăng mjing lu bruă mă leh anăn prăk hrui wĭt kơ mnuih ƀuôn sang. Mbĭt hŏng dŭm mta mnơ̆ng dhơ̆ng hiu čhưn ênguê ară anei mâo ti Ninh Thuận, hiu čhưn ênguê ksiêm hriăm kơ dhar kreh Chăm jing sa kdrêč amâo dưi kƀah ôh hŏng tuê hlăm hdră nao ti čar Ninh Thuận.  mnơ̆ng kriê pioh dhar kreh Chăm tơdah dưi mkŏ amâo djŏ knŏng đru mđĭ kyar hiu čhưn ênguê ƀiădah lŏ đru kơ dŭm ƀuôn bruă đĭ kyar, đru răng kriê leh anăn mđĭ lar ênoh yuôm dhar kreh djuê ana hlăm wưng ară anei./.