Mơ̆ng aguah ưm truh kơ mmăt mlam, wăt kơ mđiă ktang amâodah mlam êăt, ênai đung asăp mơ̆ng čŏng čư̆ Hàm Rồng ăt kwang nanao. Ngô Khổng Tuấn Anh, sa hlăm 4 čô ngă bruă ti anôk mđung asăp brei thâo: Mơ̆ng hruê anôk mđung asăp mdưi mđuĕ mơ̆ng ƀuôn prŏng Pleiku ba ti čŏng čư̆ Hàm Rồng, boh prŏng mđung asăp, mđung rup mơ̆ng 40 – 50km dưi pŏk phai jing 80 – 100km, luôm jih alŭ wăl čar Gia Lai. Hrô kơnăn, jih 4 čô mă bruă hlăm wăl msĕ si bi ktlah hjăn.

Hluê si ayŏng Ngô Khổng Tuấn Anh, khădah dôk ti djiêo êlan dơ̆ng mrô 14 mâo lu mnuih găn êrô leh anăn kbưi hŏng ƀuôn prŏng Pleiku knŏng 14km, ƀiădah čŏng čư̆ Hàm Rồng msĕ si hjăn păn, hlăm thŭn knŏng mâo mă mđiă, angĭn, hjan amâodah knam. Mơ̆ng jơ̆ng čư̆ truh kơ anôk mđung asăp jing êlan čư̆ mdêč mdar, dlông êbeh 400m, đĭ amâodah trŭn amâo mâo klei ênưih ôh:

        “Hlăm yan hjan, êlan đĭ ti čŏng čư̆ Hàm Rồng êbơr êdi, êjai hla hngô luh boh êlan, đĭ êdeh jing dleh dlan êdi. Lu blư̆ pô đĭ êdeh ăt ksak, lĕ ti djiêo êlan, êlan amâo mâo mnuih, amâo mâo pô găn êrô. Pô ăt gĭr mdơ̆ng êdeh leh anăn đĭ nao ti anôk mđung asăp čiăng djŏ mmông mlih bruă kơ ayŏng adei. Dleh dlan ăt gĭr ngă bi leh bruă klam”.

Ayŏng Trần Thiên Thế ăt jing sa čô ngă bruă mâo lu thŭn bi mguôp hŏng anôk mđung asăp Hàm Rồng. Ayŏng brei thâo, kâo mbĭt hŏng phŭng dĭng kna mưng leh hŏng klei hdĭp, mdei msăn hlăm sang điêt mơ̆ng anôk mđung asăp, hŏng klei huăn ƀơ̆ng aguah tlam. Dŭm klei hŭi kơ grăm yan hjan leh anăn pui ƀơ̆ng dliê hlăm yang bhang, dôk ngă bruă nanao, kyuadah čŏng čư̆ Hàm Rồng msĕ si gơ̆ng mă kmlă leh anăn dưi luôm hŏng dliê hngô ênưih pui ƀơ̆ng.

        “Grăp thŭn mâo nanao grăm đah, mâo mmông hmăi kjham, yan bhang ênưih mâo pui ƀơ̆ng dliê. Tơdah mâo klei amâo mâo suaih ăt gĭr bi mlih mmông mă bruă. Yan hjan kreh mâo lu klei amâo jăk, êjai anăn sa čô dleh thâo mgaih msir. Amâodjŏ mmông mă bruă ƀiădah tơdah mâo klei truh ăt lui bruă pưk sang nao ti anôk mđung asăp mgaih msir klei truh”.

          Nguyễn Khắc Quang, k’iăng khua kiă kriê Sang mđung asăp – mđung rup čar Gia Lai brei thâo: jih jang hdră mđung asăp, mđung rup mơ̆ng čar knang kơ anôk mđung asăp Hàm Rồng čiăng truh kơ bĭng găp hmư̆, phung kăp dlăng.

Giăm 1 thŭn anei, Sang mđung asăp – mđung rup čar Gia Lai mâo thiăm sa bruă klam mrâo jing mđung asăp ala čar VOV1 leh anăn VOV4, mmông mđung 19 mmông hlăm sa hruê. Khădah kbưi hŏng wăl krah, klei mă bruă dleh dlan leh anăn mâo lu klei hŭi hyưt, ƀiădah phung mă bruă tinei gĭr găn jih, bi leh bruă klam jao kơ pô.

 “Sang mđung asăp mkŏ mjing klei găl uêñ mĭn djăp mta mơ̆ng klei hdĭp truh kơ ai tiê, čiăng mâo hdră mđi ai ayŏng adei čiăng kơ diñu mâo thiăm ênoh đru êngao kơ prăk mlan. Êbeh sa thŭn hŏng anei, Sang mđung asăp blŭ Việt Nam ba leh măi mđung asăp VOV4, mbĭt anăn lŏ čuê asăp mơ̆ng VOV1, srăng lač anôk bruă hmei hơ̆k mơak êdi êjai mâo masin mrâo, hnơ̆ng tŭ jăk asăp mđung jăk êdi. Ti Kban, krĭng phŭng bruă krŭ kdơ̆ng hmư̆ klă êdi. Hluê anăn mnuih ƀuôn sang dưi thâo lu mta phŭn jăk, hơ̆k mơak hŏng phung hmư̆ đĭng mmuñ ti čar Gia Lai leh anăn ti alŭ wăl riêng gah”.

Truh kơ mlam, hlăm klei êăt mơ̆ng čŏng čư̆ Hàm Rồng, phung knuă druh mđung asăp mơ̆ng Sang mđung asăp blŭ – mđung rup čar Gia Lai ăt dôk ngă bruă mkriêp mliêp. Diñu găn jih klei dleh dlan, hjăn păn čiăng ba klei hưn mthâo truh kơ ƀĭng găp djăp anôk./.