Mâo klei khăp krah mjing rup hŏng kyâo dơ̆ng mơ̆ng điêt, giăm 50 thŭn hŏng anei leh Kpă Huăt jing mnuih mbruă êdi kreh kruiñ hŏng bruă krah mjing rup hŏng kyâo, dơ̆ng mơ̆ng dŭm kdreč kyâo hơăi mung mang ñu krah mjing sa mta rup dlăng jăk êdi, jiă knhuah dhar kreh djuê ana Jrai. Kpă Huăt lač, čiăng thâo krah mjing mơ̆ng kdrêč kyâo anăn amâo mâo djŏ ôh lu mnuih thâo mkra hĕ sơăi, ƀiădah kyua hŏng klei khăp, klei thâo hriăm êmuh, klei thâo gĭr lehanăn lŏ mâo ai tiê klei mĭn čŏng ksiêm duah mơh. Anei jing sa hlăm dŭm bruă amâo mâo mnuih mtô bi hriăm brei ôh, ƀiădah knŏng hŏng kiê kngan kreh kriăng dôk krah mjing, lehanăn hŏng ai tiê klei mĭn mơ̆ng pô krah mjing. Kpă Huăt yăl dliê:

“Êjai kâo dôk krah mjing rup, kâo dôk bi mĭn yơh kơ rup kâo dôk krah. Amâo mâo mnuih mtô bi hriăm kâo ôh, knŏng kyua klei khăp krah mjing rup, klei thâo gĭrr đhuêñ đhuêñ krah mjing tui si klei mĭn pô. Anei yơh jing knhuah jăk siam mơ̆ng djuê ana pô. Mphŭn dô mnuih ƀuôn sang drei krah mjing krah mjing rup lu jing mdưm hlăm wăl sang msat”.

           Kpă Huăt tuôm krah mjing leh lu mta rup hlăm sang msat. Leh lŏ dlăng hlăm dŭm boh rup mâo krah mjing leh, jih jang mnuih ƀuh yơh ti anăn jing kngan mbruă mơ̆ng pô krah, klei krah mjing djŏ hlue hŏng knhuah mơ̆ng djuê ana pô. Hŏng kiê kngan mbruă hlăm grăp gru krah msĕ si rup sa čô amĭ dôk kmiêk anak mda, sa čô mô̆ dôk čŏk kơ ung leh djiê, Kpă Huăt mblang brei kơ dŭm boh rup ñu mâo krah leh, kñăm bi êdah ai tiê mnuih dôk hdĭp hŏng mnuih leh djiê. Anăn yơh jing ai tiê klei khăp prŏng êdi, bi êdah klei sĭt suôr hlăm klei hdĭp grăp hrue mơ̆ng atâo ayang hlăk wưng dôk hdĭp.

          “Tal krah rup êlâo kơ nao hlăm knăm krah rup sang msat, rup mniê dôk čŏk kơ ung leh djiê hlăm knăm lui msat, mâo mkra hŏng ana kyâo kčĭk. Lehanăn hlăm lu wưng mkăn ti wăl krah kâo mâo krah mkra rup amniê dôk kmiêk anak điêt. Snăn lu mnuih dlăng ƀuh lehanăn khăp snăk kơ rup kâo krah leh. Kâo amâo mâo krah rup pioh čhĭ ôh, ƀiădah kâo krah mjing rup čiăng kơ anak čô pô gưl êdei thâo, kyuadah ară anei knŏng adôk mă ƀiă snăk mnuih thâo krah rup”.

Êjai dôk dlăng kơ rup leh krah anăn ƀuh klei mbruă mơ̆ng krah mjing. Hlăm ƀuôn jih jang mnuih mpŭ sơăi kơ klei mbruă mơ̆ng pô krah. Tơdah hlăm ƀuôn hlei pô čiăng kơ rup krah anăn snăn tui duah ñu, ñu mkra amâo mâo klei mĭn čiăng čhĭ mnia ôh, ƀiădah čiăng kơ ƀuôn sang pô, amuôn adei pô thâo ƀuh lehanăn djă pioh knhuah gru dhar kreh mơ̆ng aduôn aê pô đưm, lehanăn bi kriê pioh lŏ bi lar. Čiăng kơ dhar kreh rup krah anei mâo kriê pioh, snăn amâo mâo djŏ knŏng ñu lŏ mtô bi hriăm kơ phung hđeh jing amuôn adei hlăm sang pô đuič ôh, ƀiădah ñu srăng mtô bi hriăm mtam hŏng hlei pô mâo klei čiăng hriăm. Dôk bi mĭn kơ klei mtô bi hriăm, kñăm kriê pioh knhuah gru dhar kreh rup krah anei, Kpă Huăt lač:

          “Ară anei ăt mâo mơh phung mda asei hlăm ƀuôn hlăm ƀuôn khăp čiăng tui hriăm, mgi dih tơdah leh kâo wĭt hŏng aê aduôn atâo atiêt, snăn phung čô anak, amuôn adei adôk thâo lŏ thâo kơ bruă aê ama pô tuôm ngă leh. Mâo wăt amuôn adei mơ̆ng ƀuôn mkăn hriê hriăm mơh. Klei mtô bi hriăm čiăng mơh mâo bruă sang čư̆ êa mđing uêñ brei sa ênoh duh bi liê bi djŏ. Kâo mĭn kâo mtô bi hriăm, snăn kâo mtô bi hriăm yơh kơ anak čô amuôn adei. Bi tơdah pô amâo mtô bi hriăm ôh, snăn amâo srăng lŏ mâo ôh mnuih dưi lŏ thâo. Snăn kâo ktrâo brei čiăng kơ anak čô thâo lehanăn tui ngă”.

Ăt hlăm sa wưng msĕ, lehanăn mâo klei bi mlih hlăm klei hdĭp mda ala ƀuôn, knŏng mâo mă ƀiă đuič mnuih dôk mđing hŏng rup krah anei. Čiăng kơ bruă krah mjing rup anei dưi djă pioh nanao, snăn čiăng snăk kơ hđeh gưl mrâo sa ai tiê bi kriê pioh, tui hriăm knhuah jăk siam mơ̆ng bruă krah mjing rup hŏng kyâo. Lehanăn phung dôk thâo krah mjing mâo kiê kngan mbruă, mâo klei mĭn knhăk msĕ hŏng Kpă Huăt srăng sa ai hŏng bruă krah mjing rup mơ̆ng djuê ana Jarai dưi dôk nanao./.