Hlăm wăl sang ti ƀuôn hgŭm Đăk Tô, čar Quãng Ngãi, êkei êdam A Huyền mbĭt hŏng ênhiang mmuñ hing ang  “Tiếng chày trên soc Bom Bo” pĕ hŏng brô̆ T’rưng ayŏng mrâo mkra. Ñu brei thâo:

 “Brô̆ T’rưng anei dưi mkra hluê knhuah mrâo, dưi hlăp dŭm klei mmuñ djuê ana lehanăn klei mmuñ ênuk ară anei. Čiăng dưi mkra brô̆ T’rưng anei gơ̆ suaĭ mơh, ana kram alê yua mkra kreh nao mă hlăm dliê kơh mâo, khăt kdrêč đŭt hluê si pô čiăng, hơr ti dlông pui čiăng gơ̆ krô lehanăn pô hrĭ yơh si pô čiăng”.

 A Huyền yăl dliê, leh ruê̆ hriăm sang hră gưl krah bruă Dhar kreh – kdŏ mmuñ Lĭng kahan, ñu wĭt mă bruă ti Êpul kdŏ mmuñ čar Kon Tum hđăp. Hlăm klei nao mdah kdŏ mmuñ, A Huyền mâo mă lu klei pah mni. Ƀiădah knhal tuič, ñu ăt wĭt hŏng sang pô, ară anei hlăm ƀuôn hgŭm Đăk Tô, čar Quảng Ngãi čiăng dưi hrăm mbĭt hŏng kdrăp djuê ana, siă suôr hŏng klei hdĭp ƀuôn sang.

 “Kyua êpul nao mdah klei kdŏ mmuñ nanao, amâo mâommông lŏ tui ksiêm, mă asăp, čih pioh dŭm ênhiang mmuñ… Anei jing klei čiăng mơ̆ng kâo. Kyua anăn, kâo mdei, wĭt kơ ƀuôn sang tui ksiêm lehanăn mkra kdrăp djuê ana mrâo.

Amâo djŏ knŏng krơ̆ng kjăp ai ênai djuê ana đưm, pô mbruă A Huyền lŏ mkra mrâo kdrăp djuê ana čiăng hrăm mbĭt hŏng ênuk ară anei. Mơ̆ng brô̆ T’rưng 15 đĭng, ñu mkra leh jing t’rưng 46 đĭng, jing lŏ mjing 46 ênhiang mdê mdê, mkăp kơ klei čiăng rang mdah ênuk ară anei. Êngao anăn, A Huyền lŏ mkra dŭm êtuh kdrăp tông ayŭ mkăn msĕ si ting ning, klông put brô̆ boh tâo…. Ayŏng ăt lŏ mtô kdrăp tông ayŭ djuê ana, mdêč čing lẹhanăn mmuñ ênhiang djuê ana kơ phung mda asei.

 “Wĭt ti Đăk Tô, kâo mphŭn mkra brô̆ T’rưng 15 đĭng, hluê klei bhiăn mnuih Sedang. Khă snăn,hŏng klei đĭ kyar mơ̆ng ênhiang mmuñ ară anei,kâo lŏ mkra thiăm brô̆ T’rưng 46 đĭng. Ară anei, kâo mkra leh lu kdrăp djuê ana msĕ si Ting ning, klông pŭt, brô̆ boh tâo..lehanăn mdêč čing hluê ênhiang djuê ana pô”.

Ăt khăp tui ksiêm, mkra mrâo lehanăn mđĭ kyar kdrăp tông ayŭ djuê ana, ayŏng Abliêt, djuê ana Sedang, ti ƀuôn Kon Wang, ƀuôn hgŭm Tân Tiến, Dak Lak, mjing leh dŭm mta brô̆ kơ pô. Ñu jing êpul hđeh 8X, ama ñu jing Ayang pô mbruă êdah kdlưn Pâ Gut lehanăn gŏ sang mâo klei khăp kơ kdrăp tông ayŭ djuê ana. Hŏng klei khăp anei, Abliêt čŏng pô tui ksiêm, mkra tŭ dưn brô̆ T’rưng hŏng klei jăk, ênai hmư̆siam êdi.

 “Hlăk dôk hriăm gưl 2, kâo mphŭn mkra brô̆ T’rưng.Hlăk anăn, kâo mkra tal êlâo ka dưi ôh, kâo mkra tal 2 kăn dưi mơh, kyua anăn kâo ka thâo klă kơ kdrăp anei…Kâo lŏ tui ksiêm, lehanăn lŏ mkra, ama kâo brei kâo pô čŏng mkra hjăn. Leh kâo dưi hriăm tui ksiêm kơ ênhiang mmuñ ti Ƀuôn Ama Thuôt, kâo mâo mơh klei thâo săng kơ nốt nhạc, cung quãng, thang âm mơ̆ng djuê ana Sedang, hlăk anăn kâo thâo klă leh kơ ênhiang đô, rê, mi… Mơ̆ng ann, brô̆ tal êlâo kâo mkra dưi hmư̆ jăk ƀiă mơh.

Dŭm boh brô̆ T’rưng mâo A Bliêt mkra jăk êdi tơdah tông mbĭt hŏng ênhiang mmuñ djuê ana Sedang msĕ si rơngê, ting ting… Čiăng dưi mâo mnơ̆ng yua mkra brô̆, ayŏng kreh wĭt ti krĭng ƀuôn sang pô ti ƀuôn Đăk Xanh, ƀuôn hgŭm Văn Lem, kdriêk Đắk Tô, Kon Tum hđăp, kbưi dŭm êtuh km.Ñu nao hlăm dliê duah kram, alê jăk, kñăm rơ̆ng kdrăp mkra brô̆ dưi mâo ênai kwang jăk hmư̆.

 “Kâo kreh wĭt ti ƀuôn sang hđăp ƀri wưng ƀuôn sang mkŏ mjing knăm mơak mdiê mrâo hlăm hruê 25/10 grăp thŭn. Grăp thŭn kâo wĭt nanao. Leh knăm mơak, kâo nao hlăm dliê duah mnơ̆ng mkra brô̆. Mbĭt anăn, kâo lŏ mkra wăt čing kram, mâo ênai kwang ciăng msĕ hŏng kdrăp čing mnuih Êđê kâo brei kơ phung hđeh, digơ̆ ba nao hriăm. Čiăng dưi mâo mnơ̆ng mkra kdrăp tông ayŭ djuê ana, kâo kreh dôk 3 – 4 hruê ti Kon Tum hđăp, jak mnuih ƀuôn sang nao duah kram, alê mbĭt hŏng kâo, leh kơnăn kâo ba wĭt ti Dak Lak mkra.