Pô thâo mbruă Y-Dŭ Êban (Ama Đam) brei thâo, amâo thâo ôh hbil ênai čing mŭt hlăm ai tiê pô. Ñu knŏng hdơr pô hriê kơ prŏng hlăm ênai čing aduôn aê kwang msĕ si drai êa, ênai čĭm jăk siam hlăm djiê. Hlăk dôk điêt, ñu kma hlăm ênai čing knăm mơak, yan huă mnăm kblăm thŭn, hŏng klei thâo ñu kma ênhiang čing leh anăn ênhiang mmuiñ djuê ana êdu êun.

“Kâo hmư̆ lu klei tông čing hlăm gưl ƀuôn sang mâo dŭm knăm mơak leh anăn ênai čing mŭt hlăm ai tiê pô, kâo khăng dôk giăm phung tông čing čiăng mđing hmư̆. Phung amiêt awa brei kâo lông tông leh anăn kâo khăp tui hriăm. Kâo thâo tông čing hlăk êjai adôk êdam. Lu phung thâo mbruă ƀuh kâo thâo tông anăn brei kâo mŭt hlăm êpul leh anăn bi hriăm phung mkăn tông.

 Mơ̆ng hlăk đưm, hlăm dŭm knăm mơak leh anăn bruă dhar kreh êpul êya, ênai čing jing mnơ̆ng mkŏ anak mnuih hŏng yang, bi mguôp anak mnuih hlăm ƀuôn sang. Kyua anăn, ênai čing jing mngăt êwa ƀuôn sang. Tơdah ƀuh dhar kreh čing čhar ƀrư̆ luč ram, Pô thâo mbruă Ama Đam pioh lu hruê mmông, ai tiê čiăng pŏk adŭ bi hriăm kơ anak čô hlăm ƀuôn. Lu phung hđeh hlăm ƀuôn thâo tông čing leh anăn hiu mdah lu anôk. Pô thâo mbruă Ama Đam brei thâo:

“Hlăm ƀuôn kâo jing pô mdêč čing, bi hriăm tông čing kơ phung thâo mbruă hlăm ƀuôn hrăm mbĭt hơ̆k mơak djă pioh ênai čing leh anăn ti anôk nao mdah kâo nao mbĭt hŏng êpul nanao. Kâo ăt bi hriăm kơ phung hđeh hlăm brô 15-16 thŭn leh anăn êpul tông čing hđeh anei ăt tuôm hiu mdah 3-4 blư̆ leh mơh.”

Čiăng mâo klei tŭ anei, Pô thâo mbruă Ama Đam amâo uêñ kơ klei dleh dlan, mbĭt hŏng phung thâo mbruă hlăm ƀuôn bi hriăm tông čing, mđing pioh hruê mmông bi hriăm phung hđeh, ba yua mmông găl yan mdei prŏng jing wưng djŏ guôp hĭn. Ñu lŏ nao grăp boh sang, mtrŭt mjhar amĭ ama leh anăn phung hđeh nao hriăm. Kyua klei gĭr djă pioh ênai čing kwang, phưi mngăt êwa hlăm ênai čing anăn Pô thâo mbruă Ama Đam dưi ngă klei tŭ dưn jăk siam jing mâo lu phung hđeh khăp kơ ênai čing djuê ana pô.

“Adŭ tông čing hđeh mbha dua boh adŭ A,B. Ară anei phung hđeh lŏ nao sang hră snăn ăt dleh mơh mâo mmông djŏ guôp. Kâo bi mĭn snăk si ngă čiăng kơ phung hđeh mrâo tông čing, amâo bi luč ôh dhar kreh jăk siam djuê ana pô. Hlăm klei hdĭp mrâo mrang klei dhar kreh djuê ana ƀrư̆ luč. Kâo čang hmăng hlăk pô dôk mâo klei suaih prak snăn dưi lŏ mtô kơ phung hđeh mrâo.”

Čing čhar hŏng mnuih Êđê amâo djŏ jing kdrăp tông ôh, ƀiădah lŏ dưi bi mlih hŏng lu êmô, kbao, jing mnơ̆ng yuôm bhăn mơ̆ng gŏ sang. Ênai čing kdrăp kơah hlăm jih klei hdĭp phung êkei, mniê Êđê, mơ̆ng amĭ kkiêng truh kơ wĭt hŏng aduôn aê atâo atiêt. Pô thâo mbruă Ama Đam brei thâo čiăng kơ ênai čing lŏ kwang brei mâo klei hrăm mbĭt sa ai tiê mnuih ƀuôn sang leh anăn bruă sang čư̆ êa dŭm gưl.

“Tơdah knŏng sa gŏ sang kâo ngă klei mtô bi hriăm snăn srăng amâo dưi kriê pioh ôh ênai čing djuê ana pô. Brei mâo klei hrăm mbĭt mơ̆ng khua ƀuôn, bruă sang čư̆ êa. Mâo klei hrăm mbĭt mơ̆ng ala ƀuôn leh anăn phung thâo mbruă msĕ si hmei. Hmei čang hmăng phung hđeh srăng thâo leh anăn khăp kơ klei jăk siam anei mơ̆ng djuê ana pô”

Hŏng klei thâo săng kơ klei tông čing, mdêč čing, hŏng klei đru mguôp prŏng prĭn hlăm bruă răng mgang, kriê pioh, mđĭ lar ênai čing mnuih Êđê, Pô thâo mbruă Ama Đam mâo lu klei pah mni mơ̆ng dŭm gưl. Anăn jing klei bi mni năng djŏ mđĭ ai phung thâo mbruă msĕ si ñu lŏ dơ̆ng lar bra klei khăp, čiăng kơ ênai čing srăng kwang nanao./.