- Kkuh alum kơ pô mbruă Alíp! Bŏ hŏng klei mơak mâo bi blŭ hrăm hŏng ih, hlăm kdrêč knhuah siam dhar kreh dŭm djuê ana ti Lăn dap kngư hrue anei. Akâo kơ ih brei thâo si klei yuôm bhăn mơ̆ng čing čhar mnuih djuê ana Bahnar?

- Alip: “Êlâo hĭn kâo mâo klei čiăng kkuh čhưn hŏng ƀĭng hmư̆ hdră mđung asăp blŭ... Čing čhar jing ngăn dưn yuôm bhăn snăk hlăm klei hdĭp mnuih ƀuôn sang. Klei tŭ dưn mơ̆ng ñu jing hlăm klei ba yua mơ̆ng dŭm knăm mơak yuôm bhăn, hlăm klei dơr djiê, hlăm klei ngă yang adiê, msĕ si klei ngă yang ƀơ̆ng kbao, klei ngă yang aseh... jing bi ba yua čing sơăi. lehanăn mphŭn dô adih, jing mnuih mdrŏng sah kơh dưi tloh blei čing čhar, blei sa rĭng čing luič dŭm drei êmô kbao... čing čhar mâo ba yua kơ jih yang ƀuôn, jing klei tŭ dưn kơ ai tiê lehanăn ngă dŏ anak mnuih.

- Djŏ mơ̆, kyua ih thâo săng kơ klei tŭ dưn mơ̆ng čing čhar, jing leh mnơ̆ng siă suôr hĭn mơ̆ng hlăk điêt, mjing leh klei khăp prŏng hlăm klei hdĭp ih?

- Alíp: Čing čhar kđiăm hŏng kâo mơ̆ng hlăk kâo điêt hlŏng truh kơ ară anei, êwa čing bi hdơr nanao hlăm kâo mơ̆ng dŭm knăm knhuah gru jing klei lui msat... asei mlei kâo kyua mâo klei kâo tui hriăm mơ̆ng ama, mơ̆ng aê kâo, ktrâo atăt tơl kâo thâo raih leh hŏng lu ênhiang msĕ si knăm lui msat, amâodah ya mta klei huă mnăm mâo ba yua čing čhar snăn kâo tui hlue sơăi...

- Snăn găn hlăm dŭm knăm mơak, si phung thâo mdêč čing bi tui hriăm hlăm klei bi tiŏ mdêč čing? Akâo kơ ih yal dliê klei anei?

- Alíp: Hlăm wưng knăm mơak mâo hmư̆ ênai čing snăn jih jang mnuih bi tui nao, mdrăm mbĭt bi tông čing, bi kdŏ čhuang, mơak snăk, boh nik hlăm knăm lui msat jing mơak hĭn... Kyuanăn dôk guôn truh mlam kơh truh kơ gưl pô nao tông čing, mâo hriăm mdêč tinăn. Akŏ tlam mâo mnuih mbruă bi mdêč čing êlâo, kyuadah hlăm mmông anei mâo lu phung mniê êra dôk bi kdŏ čhuang, phung êkei êdam čiăng bi êdah mơh klei mbruă pô hlăm klei mdêč čing, kyuanăn tơdah mmông anei pô čiăng tui hriăm jing dleh mâo hriăm, dôk guôn tơl truh êla krah mlam adih, lu mnuih dơ̆ng bi kpiê ruă čuă êba, kăn lŏ ar tông čing rei, mmông anei kơh srăng mâo yơh mnuih thâo kăp mtô brei, pô dơ̆ng mâo hriăm ƀrư̆ ƀrư̆ snăn. Tal 2 dah kƀah mnuih tông, snăn hmei yơh akâo hrô nao tông, akâo pai tông mơ̆ng dŭm boh čing điêt hlŏng ƀrư̆ ƀrư̆ truh čing prŏng, mơ̆ng ênưih hlŏng truh kơ dleh, nanao msĕ snăn ƀrư̆ ƀrư̆ hlŏng raih lehanăn mưng msĕ si ară anei.

- Ơ̆, hŏng klei khăp, lehanăn klei thâo gĭr hlăm klei tui hriăm dŭm pluh thŭn mjuăt hriăm, sĭt nik ih mâo leh lu klei thâo mdêč tông djăp mta ênhiang hlăm klei mdêč čing?

- Alíp: “asei mlei kâo pô thâo juăt leh hŏng lu ênhiang tông čing, yap wăt ênhiang đưm, lehanăn lu mta ênhiang mrâo msĕ mơh. Msĕ si knăm tông čing hlăm grăp mlan, thâodah hlăm knăm lui msat, mâo dŭm ênhiang tông mdê mdê, mơak ênguôt mdê mdê, bi hlăm dŭm knăm ngă yang ƀơ̆ng kbao ƀơ̆ng êmô, ngă yang kơ aseh jing bi tông čing mâo ksâo. Tông čing ƀơ̆ng kbao čiăng msĕ hŏng tông čing đĭ dôk sang roong. Snăn klei tông čing mâo lu ênhiang snăk jing hlue si knhuah đưm, bi ară anei lŏ mâo dŭm mta čing Jrai, mâo lu mta ênhiang mdê mdê, truh kơ dŭm pluh mta mơh.

- Snăn hlăm dŭm ênhiang tông čing msĕ snăn, mâo mơ̆ đa đa ênhiang tông luič leh, ih mâo mơ̆ hdră lŏ bi kơrŭ ênhiang anăn, čiăng mtô bi hriăm kơ phung hđeh gưl mrâo?

 - Alíp: “Kâo dơ̆ng mâo mtô leh mơ̆ng 11, 12 thŭn hŏng anei. Ênoh phung hđeh tui hriăm lehanăn mâo mkăp hră tŭ yap năng ai hlăm brô 40 čô hđeh. Ară anei phung hđeh khăp nao hlăm dŭm klei mkŏ mjing knăm mơak, klei bi lông tông čing. Kâo hmăng hmưi kơ phuing hđeh gưl mrâo djă pioh nanao ênhiang klei tông čing mơ̆ng aê ama pô đưm, snăn kâo gĭr jih ai tiê mtô bi hriăm, amâo mâo djŏ knŏng tông čing đuič ôh, ƀiădah wăt hŏng tông T’rưng thâodah brô̆ Ting ning...”

- Lač jăk kơ ih pô mbruă Alip pioh leh mmông hriê hlăm klei bi blŭ hrăm anei./.

          --------------