Kkiêng thŭn 1966, pô mbruă Mlop, djuê ana Bahnar ti ƀuôn Brel Dôr 2, să G’Lar, kdriêk Đak Đoa, čar Gia Lai mơ̆ng điêt khăp êdi kơ bruă pơ̆k mñam. Tal êlâo, mta mnơ̆ng pơ̆k mñam knŏng yua hlăm gŏ sang amâo dah brei kơ găp djuê. Ƀiădah klei khăp m’ai mtrŭtleh pô mbruă gĭr krơ̆ng kjăp bruă pơ̆k mñam truh kơ ară anei.

Čiăng krơ̆ng kjăp bruă pơ̆k mñam aduôn aê pô mơ̆ng đưm dleh leh mbĭt anăn čiăng lŏ mđĭ kyar hĭn mơh lŏ dleh. Amâo djŏ hlei pô nao hriăm thâo mñam, mñam siam s’aĭ ôh, ƀiădah brei mâo klei thâo lehanăn gĭr. Pô mbruă Mlop yăl dliê, klei m’ak êdi mơ̆ng ñu jing thŭn 2006, Êpul hgŭm bruă lŏ hma lehanăn mnơ̆ng pơ̆k mñam G’Lar dưi mkŏ mjing, jing anôk mtô hdră pơ̆k mñam kơ mnuih ƀuôn sang hlăm ƀuôn.

“Mbĭt hŏng bruă pơ̆k mñam mnơ̆ng, kaoa ăt hnêč mtô hdră pơ̆k mñam kơ amai adei mniê, mtô kơ phung čô anak hlăm yan mdei prŏng. Dŭm thŭn giăm anei, kâo ăt nao mtô kơ phung čô anak Bahnar ti An Khê, ti krĭng anăn êlâo adih mâo lu mnuih thâo mñam, ƀiădah ară anei lui jih, luič ram ƀrư̆ ƀrư̆. Kâo mprăp nao kbưi čiăng mtô kơ digơ̆. Bi ti alŭ wăl anei găl hĭn, kâo dưi mtô aguah tlam ti sang, amâo dihnei ôh. 

Êbeh 30 thŭn siă suôr hŏng bruă pơ̆k mñam, mkŏ mjing dŭm êtuh boh adŭ mtô bi hriăm hdră pơ̆k mñam, pô mbruă Mlop dưi lač jing “Nai mtô hdră pơ̆k mñam”. Hdră pơ̆k mñam jing leh “Bruă djuê ana”, anak mniê khua ñu, amai Mlơnh ăt lŏ čuê bruă amĭ pô. Amai Mlơnh thâo mbruă êdi mơ̆ng hdră mkra, bi msiam hluê knhuah ênuk mrâo dŭm mta mnơ̆ng pơ̆k mñam čiăng djŏ guôp hŏng kdrăp ênuk ară anei. Pô mbruă Mlơnh brei thâo:

“Bruă pơ̆k mñam amâo mâo hnư hrui wĭt lu ôh, ƀiădah mta phŭn jing čiăng krơ̆ng kjăp bruă aê aduôn drei mơ̆ng đưm. Bruă pơ̆k mñam dưi hnêč ngă mmông wăn lehanăn lŏ mâo hnư hrui wĭt kơ gŏ sang.

Bi amai Seo, 35 thŭn ti ƀuôn Brel Dôr 2, leh hriăm adŭ mtô mñam, mâo pô mbruă Mlơnh brei mă bruă ti Êpul hgŭm, brei thâo:

“Kâo mă bruă tinei lu thŭn leh. Mâo gŏ sang Mlop mjing klei găl kơ kâo dưi mâo bruă mă h’ĭt kjăp, kâo m’ak êdi. Êdei anei kâo srăng gĭr mñam lu mta mnơ̆ng siam čhĭ kơ tuê blei. Mă bruă anei srăng đru kơ kâo dưi krơ̆ng kjăp bruă aduôn aê pô mơ̆ng đưm.

Hŏng klei kiă kriê mơ̆ng pô mbruă Mlop, ară anei, Êpul hgŭm bruă Lŏ hma lehnăn mnơ̆ng pơ̆k mñam G’Lar krơ̆ng kjăp hdră mă bruă kơ hlăm brô 20 čô. Dŭm mmông wăn, ênang bruă pưk bruă hma, Êpul hgŭm mâo hlăm brô 100. Êngao kơ pơ̆k mñam mnơ̆ng čiăng ba čhĭ, Êpul lŏ kuôl kă mñam mnơ̆ng hluê si klei čiăng mơ̆ng phung tuê. Pô mbruă Mlop brei thâo, ară anei mnơ̆ng pơ̆k mñam amâo djŏ knŏng ba čhĭ hlăm čar Gia Lai, ƀiădah dưi ba čhĭ ti Dak Nông, Dak Lak, Kon Tum, đa đa ti Nha Trang, Đà Nẵng, ƀuôn prŏng Hồ Chí Minh.

“Ară anei mâo đĭng blŭ leh, drei kuôl kă, ba êdeh nao m’ĭt găl mơh. Pô blei m’ĭt prăk hlăm tài khoản kyua anăn găl êdi yơh. Čhĭ pral mơh, boh nik m’iêng, ao, ao êkei, bai čiêng… pô mñam, hluê kdrăp ênuk ară anei, gơ̆ siam dlăng ƀiădah ăt krơ̆ng kjăp knhuah djuê ana snăn mâo lu êdi mnuih blei. Mâo wăt phung tuê čar Mi, mơ̆ng dŭm ala čar mkăn diñu blei lu êdi…”

Hŏng klei khăp kơ bruă pơ̆k mñam, pô mbruă Mlop lehanăn phung mbruă ti Êpul hgŭm bruă Lŏ hma lehanăn mnơ̆ng pơ̆k mñam G’Lar, kdriêk Đăk Đoa, čar Gia Lai amâo djŏ knŏng dưi krơ̆ng kjăp bruă djuê ana mơ̆ng đưm ƀiădah lŏ mjing bruă mă, mđĭ hnư hrui wĭt, đru kriê kjăp knhuah dhar kreh jăk siam mơ̆ng mnuih djuê ana Bahnar./.