Drông hmei ti sang pô ti alŭ Duệ, să Đinh Lạc, kdriêk Di Linh, čar Lâm Đồng, khua mduôn K’Tiếu 71 thŭn, hnêč sut rĭng čing yuôm leh anăn dăp wăl čiăng mtô bi hriăm tông čing kơ hđeh jing anak čô mnuih K’Ho ti ƀuôn sang. Ñu brei thâo, pô hnêč wưng hruê mmông ƀiă hlăm yan mdei prŏng anei čiăng kơ phung hđeh dưi hriăm, mưng hŏng ênhiang leh anăn ênai kwang čing čhar.

Khua mduôn K’Tiếu yăl dliê, ñu mphŭn ksiêm hriăm leh anăn hriăm tông čing mơ̆ng 14 thŭn. Hlăk anăn, tơdah ti ƀuôn mâo knăm mơak kbưi dưn mơh ñu ăt nao hmư̆ leh anăn hriăm. Kyua klei khăp prŏng anăn đru leh ñu pral thâo leh anăn yua raih dŭm ênhiang, ênai kwang čing čhar. Sui hŏng anei êbeh 20 thŭn, ƀuh dhar kreh čing čhar ƀuôn sang pô wơr leh, ñu mtrŭt mjhar grăp čô mnuih lŏ hriăm, ktrâo lač kơ phung khua thŭn leh anăn pŏk adŭ mtô kơ anak čô ti să.

 “ Dŭm hruê tal êlâo dleh dlan snăk kyua amâo mâo ôh hlei pô mđing. Arăng hlăp hlăm internet, hlăp game anăn amâo mâo ôh mnuih mđing kơ čing čhar. Hlăm ƀuôn ăt kăn mâo mơh hlei pô thâo tông čing bi djŏ. Kyua anăn, pô mblang, hâo hưn, lač kơ hƀuê ênuk čing čhar. Kâo dôk čang hmăng kơ phung hđeh adŭ 7, adŭ 8 kyua pô mtô phung diñu thâo pral, phung prŏng snăn dleh hĭn. Ăt dôk kƀĭn hâo hưn kơ anak čô hlăm yan mdei prŏng anei, iêô mthưr thiăm kơ phung ti adŭ hđăp lŏ hriăm grăp mlan 2,3 blư̆ čiăng đăm wơr.”

Hŏng klei gĭr mtô bi hriăm mơ̆ng Khua mduôn K’Tiếu, truh ară anei, să Đinh Lạc, kdriêk Di Linh mâo leh êbeh 200 čô thâo tông čing, hlăm anăn mâo êbeh 30 čô jing hlăm êpul tông čing alŭ wăl. Hlue si M Hiu Nguyên,  Khua dlăng bruă Đảng alŭ Duệ, să Đinh Lạc, kyua klei jih ai tiê mơ̆ng khua mduôn K’Tiếu mđĭ ai êpul êya K’Ho tinei hrăm mbĭt gĭr hriăm, mđĭ lar mnơ̆ng kriê pioh čing čhar djuê ana, hlăm anăn mâo ñu pô. M Hiu Nguyên brei thâo, jih 3 čô hlăm gŏ sang ñu, mâo mô̆ leh anăn anak mniê dưi hgŭm hlăm adŭ tông čing kyua khua mduôn K’Tiếi mtô bi hriăm:

 “Ñu mtô bi hriăm jih ai tiê. Hmei ƀuh klei anăn leh anăn gĭr hriăm bi jăk čiăng thâo kơ djăp klei tông čing. Phung hđeh hriăm gưl 2, gưl 3, hlăm anăn mâo anak mniê kâo, wăt mô̆ kâo ăt nao hriăm. Êdei anei, đru mguôp hlăm anăn jing răng kriê, răng mgang dhar kreh jăk siam mnuih K’Ho pô, čiăng kơ ênai čing dôk nanao”

Hlue si Trương Quốc Phương,  K’iăng Khua Knơ̆ng bruă sang čư̆ êa să Đinh lạc, kyua klei đru mguôp mơ̆ng khua mduôn K’Tiếu, grăp thŭn dŭm adŭ mtô bi hriăm čing čhar ti alŭ wăl dưi mđĭ lar. Mơ̆ng anăn, dŭm knăm mơak djuê ana msĕ si knăm akâo adiê hjan, knăm mơak huă êsei mrâo, klei tông čing, kdŏ čhuang, khan … mguôp hŏng bruă mjuăt asei mlei, mnơ̆ng ƀơ̆ng djuê ana mnuih ƀuôn sang tinei grăp knhuang kơrŭ wĭt. Hlăm 2 thŭn 2018-2019, să Đinh Lạc jhŏng mkŏ mjing tŭ jing 2 klei bi lông tông čing hŏng dĭm să, wăl krah ti kdriêk. Dŭm klei tŭ anei mâo klei đru mguôp yuôm bhăn mơ̆ng khua mduôn K’Tiếu. Trương Quốc Phương, brei thâo:

“Khua mduôn  K’Tiếu jing sa čô mâo kơhưm hlăm êpul êya, mâo klei đru mguôp prŏng hlăm klei răng kriê dhar kreh čing čhar Lăn Dap Kngư. Lu adŭ mtô bi hriăm ti alŭ wăl dưi pŏk anăn bruă klam khua mduôn yuôm bhăn snăk. Ñu jing mnuih mtô, mđĭ ai, mtrŭt mjhar dŭm gưl nao hgĭm, jing mnuih gĭt ba čing čhar hlăm sang hră, Đinh Lạc ăt mâo hdră tă jing lŏ dơ̆ng răng kriê dŭm knhuah dhar kreh djuê ana mkăn msĕ si kdrăp djuê ana, bruă knă kpiê čeh, bruă hrĭ mñam. Anei jing bruă găl ênưih kyua mâo klei đru mguôp plah wah wăl čing čhar hŏng dŭm ƀuôn bruă, mâo klei găl čiăng kơ mnuih ƀuôn sang mđĭ prăk hrui wĭt”

 Hŏng klei đru mguôp jăk mơ̆ng pô hlăm bruă răng kriê dhar kreh čing čhar, dŭm thŭn êgao,  Khua mduôn K’Tiếu mâo leh lu klei pah mni mơ̆ng kdriêk Di Linh leh anăn čar Lâm Đồng. Boh nik hlăm thŭn 2022, khua mduôn K’Tiếi ktưn hưn mâo Khua lăn čar mđup brei anăn knăl Pô thâo mbruă êdah êdi kyua ai tiê myơr hlăm klei mđĭ lar dhar kreh djuê ana. Êngao anăn, pô thâo mbruă êdah êdi K’Tiếu jing sa hlăm 31 čô mâo Khua knŭk kna mđup brei hră pah mni kyua mâo klei tŭ hlăm hdră bi lông ktưn khăp kơ ala čar, jing sa čô êdah êdi mơ̆ng čar Lâm Đồng dưi hưn mthâo nao hlăm klei bi mni kơ phung êdah êdi kluôm ala ƀri gưl 75 thŭn hruê Khua gĭt gai Hồ Chí Minh iêô mthưr bi lông khăp kơ ala čar  (11/06/1948 – 11/06/2023).