Mnuih krĭng Lăn Dap Kngư amâo lŏ kbưi ôh hŏng đĭng gông. Đĭng gông kreh yua hlăm dŭm knăm mơak mơ̆ng ƀuôn sang. Ênai đing gông msĕ si ênai êa hnoh đoh hlăm tlam ti djuê hma, mâo mông msĕ si ênai hjan lĕ. Pô thâo bruă Y-Djưng Êban kreh iêô Ama Ngiăng, mnuih djuê ana Êđê, ti ƀuôn Sŭt Mđưng, să Čư̆ Suê, kdriêk Čư̆ Mgar, čar Dak Lak thâo pĕ đĭng gông mơ̆ng hlăk ñu 17 thŭn, ñu mâo lu blư̆ nao hlăm klei bi lông pĕ đĭng gông, mkra mjing kdrăp pĕ tông ti kdriêk, čar leh anăn mâo mă lu klei pah mni. Kyua klei khăp hŏng ênai đĭng anăn, pô thâo mbruă gĭr hluê hriăm leh anăn mâo nanao ƀô̆ mta hlăm dŭm knăm mơak. Kyua ênai đĭng anăn kma leh hlăm klei mĭn, ai tiê, kyuanăn ñu amâo knŏng mdei hŏng đĭng gông 6 aruăt lei, hŏng klei mbruă pô, jiă kma ênai đĭng, ñu čŏng lŏ mkra đĭng gông 10 aruăt klei. Pô thâo mbruă Ama Ngiăng brei thâo:

 “Kâo thâo pĕ đĭng gông mơ̆ng hlăk 17 thŭn. Êjai dôk êdam kâo mkra đĭng gông 6 aruăt klei, êjai anăn kâo nao hgŭm hlăm êpul kdŏ mmuñ, hŏng klei hriăm kâo lŏ mkra đĭng gông lu klei hĭn, diñu mmuñ, pĕ đĭng gông ênưih djŏ hĭn, hmư̆ jăk hĭn. Krah mlam kâo mĭn lu sơnăk čiăng mâo ênŭm klei pô čiăng. Mphŭn kčưm kâo mkra đĭng gông 12 aruăt klei ăt ka djăp mơh kâo lŏ mkra đĭng gông 18 aruăt klei. Klei mdê sitôhmô klei mmuñ Či ri ria knŏng pĕ mă 4 aruăt klei, bi đĭng gông nei srăng dưi pĕ kơ lu klei mmuñ hĭn”.

Ama Ngiăng brei thâo, mâo 2 klei pĕ đĭng gông, tal sa jing pĕ dôk gŭ, kđip kjăp hŏng 2 bĕ jơ̆ng, dŭm kđiêng kngan pĕ klei brô̆ čiăng hmư̆ ênai jăk hĭn, tal 2 jing pô dră đĭng gông hŏng tian, kŏ đĭng kơ anăp, dua kđiêng êđai djă asei brô̆, dŭm kđiêng dôk pioh pĕ klei brô̆. Kyua ênai kwang mơ̆ng boh giêt mâo ênai kwang kbưi. Čiăng mâo ênai jăk jĭn anăn, pô thâo mbruă Ama Ngiăng mâo kngan thâo leh anăn knga hmư̆ kăp. Ñu brei thâo:

           “Êjai mkra đĭng gông srăng mă sa bĕ đĭng đrao khua leh anăn bhu krô. Amâo mâo mă ôh ana mda kyuadah ana mda amâo mâo ênai. Kyâo pioh mkra knga đĭng ăt mă kyâo jăk, đŭt dlông hluê si pô čiăng leh anăn klei siam mơ̆ng grăp čô. Đĭng gông kreh pĕ êjai mmuñ klei muñ ênhiang djuê ana Êđê, amâodah mmuñ eirei. Kreh pĕ đĭng gông hlăm sang krum amâodah dŭm knăm mơak, êjai mâo pô brei pĕ srăng pĕ yơh, amâo mâo kăm ôh.”

Ênai đĭng gông mâo knhuah yăl dliê kơ pô. Rup đĭng gông kreh nao mbĭt hŏng êkei êdam yăl dliê hŏng mniê êra ti dring sang hlăm mlam mngač mlan. Ăt kyua ênai đĭng anăn ñu kreh pĕ hjăn amâodah pĕ kơ phung thâo mbruă mkăn êjai mmuñ eirei bi kmlah. Ênai đĭng gông mkŏ mjing klei mơak, bi mguôp grăp čô.

Hŏng klei khăp kơ ênai đĭng gông, pô thâo mbruă Ama Ngiăng hmăng hmưi dưi lŏ mtô kơ phung mda asei dưi thâo leh anăn mpŭ. Ƀiădah ară anei bruă mtô bi hriăm hlăm yang ƀuôn ăt dleh dlan êdi kyua lu mta phŭn mdê mdê, pô thâo mbruă Ama Ngiăng brei thâo:

 “Knŭk kna mâo klei uêñ mĭn, kreh êmuh hlei srăng lŏ čuê phung thâo mbruă mduôn msĕ hŏng hmei. Phung hđeh ară anei diñu hriăm gưl 2,3 amâo hriăm ôh kyua kmang hlăp lêñ, amâo mâo lŏ mĭn kơ dŭm mta anei ôh, bi phung êdam êra bi nao mă bruă kbưi jih, kyuanăn bruă mtô jing dleh dlan êdi…”

Hŏng klei đru mguôp hlăm brư kriê pioh kdrăp pĕ tông, ênhiang mmuñ djuê ana, pô thâo mbruă Ama Ngiăng dưi mâo mă lu hră pah mni. Ñu mbĭt hŏng phung thâo mbruă hlăm ƀuôn dôk gĭr hlăm bruă mtô bi hriăm, kriê pioh, bi lar ênai đĭng gông leh anăn dŭm kdrăp pĕ tông mkăn mơ̆ng mnuih Êđê dưi kwang nanao./.