Sang hră gưl 3 knŭk kna rông ba kdriêk Tu Mơ Rông, čar Kon Tum mâo 372 čô hđeh sang hră, lu jing anak čô mnuih djuê ƀiă Sêdang. Mơ̆ng lu thŭn anei, Khua sang hră bi hgŭm hŏng phung thâo mbruă mtô bi hriăm čing čhar - kdŏ čhuang kơ hđeh sang hră. Hgŭm hlăm êpul kdŏ čhuang sang hră, adei Y Khin hđeh sang hră adŭ 11 brei thâo: “Phung hmei pioh mmông hriăm jing mmăt. Mmăt hmei hriăm tlâo hruê. Phung thâo mbruă bi hriăm hmei. Hmei mơak snăk dưi hriăm tông čing - kdŏ čhuang.”

Čiăng kơ hđeh sang hră mâo klei găl hriăm, mđĭ thiăm klei ktưn kơ dhar kreh djuê ana pô, Khua sang hră knŭk kna rông ba kdriêk Tu Mơ Rông mđĭ ai hđeh sang hră hgŭm hlăm dŭm klei bi lông, rang mdah čing čhar, mbĭt anăn mjing klei găl kơ hđeh hiu dlăng knăm mơak djuê ana mơ̆ng lu djuê ana ayŏng adei. Nao Văn Trọng Lưu, Khua sang hră bi mklă boh tŭ mơ̆ng bruă ba čing čhar - kdŏ čhuang hlăm sang hră: “Bruă mtô bi hriăm mơ̆ng phung thâo mbruă kơ hđeh sang hră jing găl ênưih kyua diñu bi hriăm anak čô pô, bi hriăm mơ̆ng klei thâo leh anăn knhuah mdê hjăn diñu anăn tŭ dưn snăk. Čing čhar - kdŏ čhuang jing bruă ngă jên jêñ mơ̆ng sang hră kñăm răng kriê leh anăn mđĭ lar ênoh yuôm čing čhar - kdŏ čhiang, jing kmeh gơ̆ng čiăng hgŭm hlăm knăm mơak ti alŭ wăl”.

Hŏng klei tă hdră, duh bi liê mơ̆ng dŭm gưl bruă sang čư̆ êa leh anăn dhar bruă,truh ară anei mnuih ƀuôn sang dŭm djuê ân ti čar Kon Tum răng mgang leh 2.500 rĭng čing čhar, pŏk dŭm êtuh adŭ mtô b hruăm tông čing, mgăl čing, dŭm klei čing đưm dưi kriê pioh, kơrŭ wĭt dŭm êtuh boh sang roong, duah, lŏ mkŏ mjing 16 klei bhiăn, knăm mơak djuê ana, hưn mdah dhar kreh djuê ana mnuih djuê ƀiă hlăm čar truh hŏng lu ƀĭng găp hlăm ala čar leh anăn ala tač êngao…

Dŭm bruă ngă anei kơrŭ wĭt klei găl, mđĭ klei ktưn hưn djuê ana leh anăn jing boh kdrŭt hŏng klei đĭ kyar mơ̆ng grăp čô mnuih hlăm êpul êya.  Ayŏng A Uôn, ƀuôn Mô Bành 1, să Đăk Na, kdriêk Tu Mơ Rông leh anăn pô thâo mbruă A Nuông, ƀuôn Kon Chênh, să Măng Cành, kdriêk Kon Plong, brei thâo: “Pô hriăm klei jăk, klei siam, klei mdê hjăn dhar kreh djuê ana čiăng kơ êdei anei pô lŏ bi hriăm anak čô lŏ dơ̆ng mđĭ lar dhar kreh djuê ana Sêdang pô”.

Hŏng klei gĭr răng kriê, mđĭ lar ênoh yuôm dhar kreh djuê ƀiă hlăm klei hdĭp ară anei, mbĭt hŏng klei hlue ngă jăk dŭm Hdră êlan răng mgang, lu klei jăk siam dhar kreh jing mnơ̆ng dhơ̆ng hiu čhưn ênguê ngă djŏ klei čiăng ksiêm dlăng, hiu dlăng dhar kreh alŭ wăl mơ̆ng phung tuê sĭt hriê ti Kon Tum. Tă hdră mđĭ kyar hiu čhưn êngue mtah hơĭt kjăp leh anăn hiu čhưn ênguê dhar kreh, dŭm thŭn giăm anei čar Kon Tum mđing mđĭ kyar ktang bruă hiu čhưn ênguê êpul êya. Lu tuôr hiu čhưn ênguê hiu dlăng dhar kreh čing čhar, bruă djuê ana, knăm mơak êpul êya msĕ si ƀuôn Kon Kơ Tu, ƀuôn prŏng Kon Tum; Kon Pring, huyện Kon Plông; Măng Ri, kdriêk Tu Mơ Rông… mkŏ mjing leh. Phan Văn Hoàng, K’iăng Khua Knơ̆ng bruă dhar kreh, mjuăt ktang asei mlei leh anăn hiu čhưn ênguê čar Kon Tum, brei thâo bruă răng kriê dhar kreh dŭm djuê ƀiă jing sa bruă ngă hŏng lu hdră kñăm: “Mơ̆ng klei khăp hlăm bruă mđĭ lar dŭm ênoh dhar kreh djuê ana pô snăn phung thâo mbruă mđup brei dŭm mnơ̆ng kriê pioh dhar kreh kơ ênuk mda asei dưi mjing klei khăp hĭn dhar kreh djuê ana pô. Êngao anăn, hlăm hdră mđĭ kyar kơ klei hiu čhưn ênguê ti čar snăn klei kơ dhar kreh djuê ana mnuih djuê ƀiă čiăng dưi mđĭ lar hưn mthâo kơ phung tuê hlăm leh anăn êngao čar mơ̆ng anăn mđĭ kyar hiu čhưn ênguê”

Hŏng dhar kreh jăk siam mơ̆ng 7 djuê ana ayŏng adei, thŭn 2022 čar Kon Tum drông 1 êklăk 1 êtuh êbâo gưl tuê hiu čhưn đĭ lu hĭn 3 blư̆ mkă hŏng thŭn 2021. Kơrŭ wĭt ktang êdei klei ruă Covid-19, prăk hrui wĭt bruă duh mkra mtah mơ̆ng čar Kon Tum mâo êbeh 265 êklai prăk đĭ êbeh 3 blư̆ mkă hŏng thŭn êlâo. Hgŭm hlăm bruă hiu čhưn ênguê, prăk hrui wĭt lu mnuih leh anăn êpul êya ti čar Kon Tum dưi mkra mđĭ jing klei mđĭ ai prŏng hlăm bruă răng kriê, mđĭ lar dŭm ênoh yuôm dhar kreh djuê ana mnuih ƀuôn sang./.