66 pŏk rup rang mdah ti anôk rang mdah ba lu êa mil mdê mdê, grăp pŏk rup jing klei yăl dliê kơ phung lĭng kahan yang ƀuôn hlăm hdră mđĭ kyar lăn čar. Pŏk rup “Ngŏ Duôr čư̆ prŏng” čih kač rup kahan hlăm ktuê êlan Duôr čư̆ prŏng kdrưh kơăm, rup kahan jhŏng ktang wăt tơdah tlă anăp hŏng boh phao, djiê êka; rup “Klei awa mtă”, kah mbha klei bi hdơr Khua gĭt gai Hồ Chí Minh nao čhưn leh anăn mtă mtăn kơ phung knuă druh kahan adiê ti anăp kle bi blah; Rup “Ƀĭng kahan” kơ rup lĭng kahan leh anăn kahan ksiêm hlăm êa ksĭ hlăm ênuk êđăp ênang, bi hgŭm ngă jăk bruă đru, răng mgang phung trah mă kan tơdah ngă bruă hlăm êa ksĭ. Hŏng giăm 40 thŭn ngă bruă hlăm êpul kahan, hlăm anăn mâo 30 thŭn mă bruă hlăm Êpul kahan răng mgang wăl adiê, akŏ kơ phung lĭng kahan jing akŏ kơ pô čih kač rup Đào Hoa Vinh. Ñu lač kơ klei yuôm bhăn mơ̆ng pŏk rup “Klei awa mtă”:

           “Kâo khăp snăk kơ akŏ Awa Hồ hŏng êpul kahan răng mgang wăl adiê kyua hlăk êjai dôk hdĭp, ñu hriê čhưn hŏng êpul kahan răng mgang wăl adiê 11 dŭm blư̆, truh ti anôk bi blah čiăng čuă phung knuă druh, kahan răng mgang wăl adiê  hlăm dŭm thŭn mlan bi blah hŏng Mi. Êngao kơ êmuh hrăm, mđĭ ai, klei hdĭp phung knuă druh, lĭng kahan snăn klei ñu mtă mtăn klă sĭt jing klei ktrâo lač kơ bruă ngă mơ̆ng kahan răng mgang wăl adiê, amâo djŏ knŏng hlăm klei bi blah ôh, amâo djŏ hlăm wưng bi blah ôh ƀiădah wăt hlăm ênuk êđăp ênang, mkŏ mjing leh anăn răng mgang čar kwar snăn klei mtă mtăn anăn ăt dôk nanao leh anăn jih êpul kahan, kahan răng mgang wăl adiê ăt jiă kma klei ñu mtă leh anăn dlăng anăn jing mta kñăm gĭr ktưn hriăm mjuăt hlăm bruă mkŏ mjing leh anăn răng mgang čar kwar ară anei.”

Klei rang mdah mâo klei hgŭm mơ̆ng 66 pô čih kač rup jing phung hlăm êpul hgŭm čih mkra akŏ răng mgang čar kwar leh anăn phung čih kač rup ti Hà Nội, Nghệ An, Thanh Hóa, Thái Bình, Phú Thọ, Hải Phòng… Lu klei čih kač rup dưi mkra mjing hlăm thŭn 2023. Năng mđing, êngao kơ dŭm pŏk rup phung mă bruă hlăm lĭng kahan, kahan ksiêm, klei rang mdah thŭn anei lŏ mâo klei dlăng mrâo mơ̆ng phung čih kač rup mda asei êngao lĭng kahan. Bi mni kơ hnơ̆ng jăk leh anăn boh phŭn hâo hưn mơ̆ng dŭm pŏk rup rang mdah hlăm anôk rang mdah “Hrăm mbĭt hŏng êpul kahan” 2023, Nguyễn Bằng Lâm, K’iăng khua Êpul hgŭm čih kač rup Việt Nam  hđăp lač:

          “Klei rang mdah anei kâo bi mni snăk, lu kơ ênoh phung mơĭt, lu kơ ênoh rup leh anăn dŭm pŏk rup răng mgang čar kwar, kơ phung lĭng kahan hruê anei dưi lač hlăm klei rang mdah anei. Hmei ƀuh mơak jing akŏ kơ êpul kahan krŭ kdơ̆ng amâodah răng mgang čar kwar ăt mâo lu mnuih mđing dlăng, wăt phung čih kač rup hgao leh klei bi blah leh anăn boh nik mâo phung čih kač rup mda asei amâo găn ôh klei bi blah ƀiădah ăt čih kač rup. Anăn jing klei mơak čiăng mprăp kơ thŭn 2024 klei rang mdah kluôm ala kơ akŏ êpul kahan răng mgang krŭ kdơ̆ng, sa klei bi kƀĭn prŏng kơ phung čih kač rup kơ akŏ êpul kahan krŭ kdơ̆ng, hŏng klei ksiêm dlăng pah mni 5 thŭn mơ̆ng Phŭn bruă lĭng kahan thŭn 2025.”

Klei mđing hŏng boh phŭn leh anăn hdră bi êdah lu jơr kơ akŏ phung lĭng kahan yang ƀuôn, kahan ksiêm yang ƀuôn hlăm klei blah ngă leh anăn ară anei, amai Nguyễn Mai Anh, mă bruă ti ƀuôn prŏng Hồ Chí Minh brei thâo:

“Phung čih kač rup ba leh hlăm êa mil, pŏk rup, gru kač êdu êun amâodah mâo pŏk rup siam snăk ƀiădah pô ƀuh klei hâo hưn mơ̆ng pŏk rup čiăng lač, bi êdah klei khăp hŏng lĭng kahan leh anăn phung kahan ksiêm yang ƀuôn răng mgang čar kwar.”

Tơdah ênoh pŏk rup hlăm dŭm klei rang mdah êlâo dih amâo lu ôh, snăn hoưng klei rang mdah “Hrăm mbĭt hŏng êpul kahan” thŭn anei, dŭm pŏk rup čih anăn akâo mdag amâo lu kơ ênoh ôh ƀiădah hnơ̆ng jăk êdah êdi. Anei jing boh kdrŭt kơ phung čih kač rup lŏ dơ̆ng kƀĭn čih kač kơ akŏ êpul lĭng kahan leh anăn klei bi blah krŭ kdơ̆ng, mđing kơ klei bi hdơr 80 thŭn Hruê mkŏ mjing Êpul lĭng kahan yang ƀuôn Việt Nam hlăm thŭn kơ anăp./.