Phŭn bruă Dhar kreh, Mjuăt ktang asei mlei lehanăn Hiu čhưn ênguê bi mklă leh Hdră kriê pioh, krŭ wĭt lehanăn mđĭ lar boh tŭ ênhiang mmuñ, ênhiang kdŏ mơ̆ng mnuih djuê ƀiă mguôp hŏng hdră mđĭ kyar bruă hiu čhưn ênguê wưng thŭn 2021 – 2030. Hŏng grăp djuê ana, ênhiang mmuñ, ênhiang kdŏ jing klei jăk siam hlăm knhuah dhar kreh, hƀuê ênuk, djuê ana mơ̆ng đưm.

Hluê Phŭn bruă Dhar kreh, mjuăt ktang asei mlei lehanăn Hiu čhưn ênguê, hdră anei kñăm tĭng dlăng bruă kriê pioh, krŭ wĭt lehanăn mđĭ lar boh tŭ yuôm ênhiang mmuñ, ênhiang kdŏ mơ̆ng mnuih djuê ƀiă mguôp hdră mđĭ kyar bruă hiu čhưn ênguê. Mơ̆ng anăn, ba mdah dŭm hdră msir kñăm kriê pioh mâo klei tŭ dưn. Khă snăn, čiăng bi sĭt klei anei srăng tuôm hŏng lu klei dleh dlan. Nguyễn Thị Hải Nhung, Khua knơ̆ng bruă Dha kreh djuê ana, Phŭn bruă Dhar kreh, mjuăt ktang asei mlei lehanăn hiu čhưn ênguê brei thâo: Kyua klei thâo amâo bi knar snăn yơh bruă iêu mtrŭt mnuih ngă bruă, klei đru mơ̆ng bruă sang čư̆ êa, alŭ wăl ti krĭng mnuih djuê ƀiă hlăm bruă kriê pioh, răng mgang dhar kreh dôk dleh dlan. Klei mđing dlăng mơ̆ng dŭm gưl hlăm bruă kriê pioh dhar kreh djuê ƀiă mơ̆ng đưm, mâo dŭm anôk ka kjăp lehanăn ka mâo klei thâo săng kluôm ênŭm kơ hnơ̆ng yuôm bhăn hlăm bruă dhar kreh djuê ana, boh nik hlăm hdră mtô mblang, mtrŭt mjhar mnuih ƀuôn sang dưi hluê ngă êlam lehanăn lar bra”.

Ti čar Thái Nguyên, kyua klei gĭr jih ai tiê mơ̆ng phung kdŏ mmuñ, phung mbruă ti alŭ wăl, phung hđeh mnuih djuê ana Dao ti alŭ Suối Bốc, să Yên Ninh, kdriêk Phú Lương mâo leh klei thâo săng hlăm bruă hriăm klei blŭ amĭ kkiêng, ênhiang mmuñ Pả Dung jing sa bruă čiăng thâo săng klă hĭn kơ phŭn agha ana hruê̆ pô. Mbĭt hŏng adŭ mtô bi hriăm ênhiang mmuñ Pả Dung, sa hlăm dŭm hdră kriê pioh knhuah dhar kreh kdŏ mmuñ mâo mnuih Dao ti Thái Nguyên krơ̆ng kjăp ba wĭt leh klei tŭ dưn, anăn jing mkŏ mjing Êpul hgŭm bruă. Anei jing dŭm anôk bruă dhar kreh mơ̆ng mnuih Dao khăp kơ klei kdŏ mmuñ, ênhiang mmuñ, ênhiang kdŏ djuê ana, đru bi lu jơr klei hdĭp ai tiê klei mĭn, mkŏ mjing klei hdĭp kreh dhar ti alŭ wăl. Phạm Thị Lan Anh, Khua Adŭ bruă Dhar kreh hâo hưn kdriêk Phú Lương, čar Thái Nguyên brei thâo: Hluê hŏng bruă mkŏ mjing Êpul hgŭm bruă răng mgang anei, hmei đru krŭ wĭt dŭm ênhiang mmuñ, ênhiang kdŏ, dŭm klei bhiăn ngă yang, knăm m’ak mơ̆ng mnuih Dao. Mbĭt anăn, ăt jing sa hdră čiăng kơ hmei lŏdơ̆ng bi lar ênhiang kdŏ mmuñ djuê ana.

Dưi mkŏ mjing mơ̆ng sui, kbiă hriê mơ̆ng klei mă bruă knuă, ai tiê klei mĭn đăo, ngă yang kơ aê aduôn atâo atiêt, ênhiang mmuñ Pả Dung mâo boh tŭ yuôm knhuah dhar kreh, ai tiê klei mĭn yuôm êdi hŏng mnuih Dao. Klei jk siam mơ̆ng Pả Dung dôk ti klei mmuñ. Grăp mta klei srăng bi êdah klă klei mâo, boh blŭ mdê, bi êdah klă klei mĭn čiăng, klei khăp mdê mdê. Đặng Phúc Lương, Khua hđăp Êpul bruă Văn học nghệ thuật dŭm djuê ana ƀiă čar Thái Nguyên brei thâo:Dŭm ênhiang Pả Dung mơ̆ng êpul mnuih Dao mdê s’aĭ. Knŏng mâo Dao Quý Lâm lehanăn Dao Hrah jing čiăng msĕ. Klei mă đŏk, ênhiang mmuñ gơ̆ mdê s’aĭ. Ƀiădah klei jăk êdi mơ̆ng Pả dung ăt jing ênhiang mmuñ mơ̆ng mnuih Dao Hrah.

Dŭm thŭn êgao, mâo klei mđing dlăng mơ̆ng anôk bruă dhar kreh, mnuih Dao ti Thái Nguyên mâo leh klei găl hưn mthâo kơ ênhiang mmuñ, ênhiang kdŏ mơ̆ng djuê ana pô ti lu hdră bruă mơ̆ng alŭ wăl. Ênhiang mmuñ Pả Dung dưi bi mklă jing knhuah dhar kreh amâo êdah klă gưl ala čar. Anei jing klei ktưn hưn, jing sa hlăm dŭm tur knơ̆ng čiăng kơ dŭm ênuk gưl mnuih Dao hrah hrăm mbĭt kriê pioh lehanăn mđĭ lar hlăm êpul êya dŭm boh tŭ dhar kreh jăk siam, hlăm anăn mâo ênhiang mmuñ, ênhiang kdŏ.

Dưi lač, bruă kriê pioh ênhiang mmuñ, ênhiang kdŏ mguôp hŏng hdră mđĭ kyar bruă hiu čhưn ênguê dưi dlăng jing hdră ngă jăk. Kyua anăn, dŭm ênhiang anei srăng dưi hdĭp lă lar hlăm klei hdĭp ênuk ară anei. Ƀiădah tal êlâo hĭn brei mâo klei bhiăn, hdră mtrŭn klă klơ̆ng. Hlăm anăn, mđing kơ bruă mtô bi hriăm, đru kơ phung mbruă kriê pioh, mđĭ lar knhuah dhar kreh.Đru kơ phung mbruă, mnuih mâo k’hưm hlăm êpul êya nao hgŭm ngă bruă klam ba akŏ hlăm Êpul hgŭm mtô bi hriăm kơ dhar kreh, hdră kdŏ mmuñ djuê ana amâo dah mjing boh tŭ yuôm dhar kreh, kdŏ mmuñ mrâo čiăng mkăp kơ mnuih ƀuôn sang lehanăn dŭm djuê ana mguôp hŏng hdră hiu čhưn ênguê lehanăn mđĭ klei thâo dưn yua, tui ksiêm knhuah dhar kreh mơ̆ng mnuih djuê ƀiă.