Čar Gia Lai mâo klei găl prŏng êdi hŏng lu hdră êlan mđĭ kyar bruă hiu čhưn ênguê lăn mnga êa mơak, bruă hiu čhưn ênguê dhar kreh yang ƀuôn... Jing čar mâo lu mta dhar kreh, anôk kơ čing čhar đĭ jing, alŭ wăl kriê pioh kmrơ̆ng hrông dlông čư̆ Kon Hà Nừng, mbĭt hŏng bruă lŏ hma pla mjing djăp mta, lehanăn mâo lu drai êa siam, adiê êđăp jăk, mbĭt hŏng lu knhuah gru dhar kreh mơ̆ng ênuk đưm đă...

 Tui si hdră mđĭ kyar bruă hiu čhưn ênguê wưng thŭn 2021-2025 mơ̆ng knơ̆ng bruă sang čư̆ êa čar Gia Lai, čar ktư̆n truh kơ thŭn 2025, bruă hiu čhưn ênguê srăng jing bruă phŭn kơ klei duh mkra, hŏng lu mta hdră mdê mdê, hŏng klei mbruă hĭn mơh, mâo klei jăk hĭn mơh. Wưng anei, čar bi liê leh êbeh 500 êklai prăk mơ̆ng knŭk kna pioh kơ 9 mta bruă nah gŭ pioh mđĭ, čar mkŏ mjing lu bruă dhar kreh, mjuăt asei mlei, mâo nanao klei hưn mdah kơ dŭm klei găl kơ bruă hiu čhưn ênguê.

Siămdah, ară anei, mâo leh êbeh 3/9 mta bruă nah gŭ mâo bi leh. Gia Lai ka dưi iêo jak mơh klei duh bi liê mơ̆ng ala tač êngao, lehanăn phung duh mkra bi mguôp hlăm bruă hiu čhưn ênguê; hnơ̆ng kjăp, lehanăn mnơ̆ng dhơ̆ng pioh kơ bruă hiu čhưn ênguê ka mâo klei lu jơr ôh, ka tŭ jing ôh. Nguyễn Tấn Thành- Khua êpul hgŭm bruă hiu čhưn ênguê Gia Lai lač:

“Drei bi lŏ ksiêm wĭt: Knŭk kna mjing brei leh klei găl kơ bruă duh bi liê, si ngă hdră êlan mă bruă klă mngač leh hĕ, jăk leh hĕ, djăp ai ktang dưi iêo jak klei duh bi liê leh hĕ? Ai ktang ngă bruă jing prŏng, klei găl jing jăk, ƀiădah čiăng kơ bruă hiu čhưn ênguê, snăn brei mâo klei klei duh bi liê, hrŏng ruah. Ti anôk găl, mâo klei jăk mđĭ kyar hĭn snăn duh bi liê êlâo, djŏ hŏng hdră, snăn kơh tue thâo lehanăn truh, mnuih ƀuôn sang dưi mâo ênoh ba wĭt”.

Ti anôk bi kƀĭn, Nguyễn Thị Thanh Lịch- K’iăng khua knơ̆ng bruă sang čư̆ êa čar Gia Lai mtă kơ dŭm alŭ wăl, knơ̆ng dhar bruă bi ksiêm dlăng lŏ dơ̆ng duh bi liê kơ bruă nah gŭ mâo anôk mkŏ mjing hiu čhưn ênguê jăk, ksiêm dlăng jih jang mnơ̆ng pioh kơ bruă hiu čhưn ênguê, duah anôk phŭn bruă phŭn kñăm mkŏ mbĭt, mjing alŭ wăl hiu ênguê, djăp alŭ wăl dhar bruă lŏ dơ̆ng ngă djăp bruă dhar kreh, knăm mơak mâo klei hâo hưn lu hĭn mjing klei găl kơ bruă lŏ hma mâo mđĭ kyar mđrăm mbĭt hŏng bruă hiu čhưn ênguê. Nguyễn Thị Thanh Lịch mâo klei mtă kơ bruă hiu čhưn ênguê yang ƀuôn tui tiŏ hŏng hdră êlan kjăp, truăn kơ bruă hĭn:

“Jao kơ knơ̆ng bruă dhar kreh, mjuăt asei mlei, hiu čhưn ênguê ktrâo atăt kơ jih klei truăn hlăm bruă hiu čhưn ênguê yang ƀuôn. Êjai mkŏ mjing bruă hiiu čhưn ênguê hlăm yang ƀuôn, bi mâo hdră êlan bi mguôp mbĭt hŏng bruă lŏ hma, snăn bruă anei brei mâo klei mđĭ kyar kjăp. Mâo klei bi mguôp mơ̆ng jih jang yang ƀuôn, mơ̆ng anăn srăng kriê pioh dhar kreh pô. Mâo ba wĭt klei hdĭp mda tŭ dưn kơ mnuih ƀuôn sang, sĭt nik mnuih ƀuôn sang srăng răng kriê lehanăn bi lar”./.