Amai Ka Bông (K’Ho Sre) ti alŭ Phú Bình, să Phú Hội, kdriêk Đức Trọng, čar Lâm Đồng mâo dua čô anak. Amai dôk huĭ phung anak pô srăng wor bĭt klei blŭ amĭ kkiêng, amai čang hmăng dua čô anak thâo răk, thâo čih, thâo blŭ klei K’ho pô. Amai Ka Bông brei thâo:

“Hruê anei, hla pŏk web yang ƀuôn đĭ kyar pral, kyua anăn klei blŭ K’ho pô ƀiă snăk mnuih thâo lehanăn mđing hmư̆. Kâo čang hmăng dua čô anak pô krơ̆ng kjăp klei blŭ aê aduôn pô đưm êlâo. Brei thâo blŭ, thâo dlăng, thâo čih klei amĭ kkiêng pô.

Adei Lơ Mu Nay Sa (K’Ho Cil, kkiêng thŭn 2002), ti alŭ Srê Đăng, să N’Thôl Hạ, kdriêk Đức Trọng, čar Lâm Đồng ară anei jing sinh viên thŭn tal tlâo, hriăm bruă Nai mtô hđeh gưl 1, Sang hră gưl prŏng krĭng Lăn dap kngư brei thâo, ti ƀuôn adei ară anei mâo đei lŏ dôk klei tông čing čhar lehanăn mmuñ ênhiang djuê ana hlăm dŭm knăm m’ak. Đa đa mnuih hlăm gŏ sang bi blŭ klei Yuăn s’aĭ. Kdrăp čŭt h’ô djuê ana ƀiă mơh mnuih lŏ čŭt h’ô. Hlăk dôk điêt kâo ăt hmư̆ di aduôn, aê tông čing… truh kơ prŏng, aê aduôn wĭt hŏng aê aduôn atâo atiêt ăt ba wĭt jih hŏng aê aduôn mơh lehanăn dŭm pŏk rup anăn knŏng dôk hlăm klei mĭn kâo. Adei Lơ Mu Nay Sa, brei thâo:

“Kâo čang hmăng hlăm dŭm knăm m’ak, phung khua mduôn, khua ƀuôn, mnuih thâo săng kơ knhuah djuê ana pô srăng lŏ mtô kơ hmei, jing ênuk gưl hđeh, čiăng kơ hmei dưi tui ksiêm, lŏ čuê knhuah gru dhar kreh jăk siam mơ̆ng djuê ana pô. Êdei anei hmei ăt lŏ čuê kơ ênuk gưl hđeh hĭn čiăng kơ knhuah dhar kreh djuê ana pô amâo luič ram ôh.

             Čiăng mđĭ lar ai ktang bi hgŭm mguôp jih jang djuê ana, čar Lâm Đồng mđĭ leh hdră mtô mblang kơ boh tŭ yuôm dhar kreh dŭm djuê ana, mđĭ klei ktưn hưn kơ boh tŭ yuôm knhuah dhar kreh, mđĭ klei ba yua ênhiang mmuñ djuê ana, ênhiang kdŏ, kdrăp tông ayŭ djuê ana… Čar ăt krŭ wĭt lehanăn lŏ mdah lu klei bhiăn msĕ si Knăm Pơthi mơ̆ng mnuih K’ho ti K’Long, kdriêk Đức Trọng, Knăm Nhô Wèr mơ̆ng mnuih K’Ho Sre ti kdriêk Di Linh, Knăm Nhô Rơhe (Ba wĭt mdiê hlăm hjiê) mơ̆ng mnuih K’Ho Sre, kdriêk Lâm Hà, Knăm bi kuôl ung mô̆ mnuih K’Ho Čil ti să Đạ Chais kdriêk Lạc Dương,…

Adei Ka Tảo, (K’Ho Sre, kkiêng thŭn 1998), ară anei jing sinh viên thŭn knhal tuič Adŭ ksiêm hriăm kbi mklă Kman, Sang hră gưl prŏng krĭng Lăn dap kngư brei thâo: Ƀuôn sang adei ti alŭ Kon Pàng, să Tân Thanh, kdriêk Lâm Hà, čar Lâm Đồng, mnuih ƀuôn sang ăt krơ̆ng kjăp knhuah dhar kreh djuê ana, tông čing čhar lehanăn dŭm knăm m’ak djuê ana mơ̆ng đưm dưi krơ̆ng kjăp lehanăn mđĭ lar, kyua anăn kâo dưi ƀuh lehanăn tui ksiêm kơ knhuah dhar kreh djuê ana dơ̆ng mơ̆ng điêt. Adei Ka Tảo, m’ak brei thâo:

“Ti ƀuôn kâo, mnuih ƀuôn sang ăt dôk mâo hdră tông čing čhar, kdŏ mmuñ čiăng kơ phung êdam êra hgŭm mbĭt. Hlăm knăm m’ak msĕ si bi kuôl ung mô̆, m’ak hdĭp jŏk tinei, phung êdam êra dưi tông čing, kâo ƀuh jăk lehanăn tŭ dưn êdi kyua ƀuôn sang pô dưi krơ̆ng hdră snei.

Sinh viên Ka Tảo čang hmăng knhuah dhar kreh mơ̆ng djuê ana pô srăng dưi hưn mthâo lu hĭn čiăng phung hđeh êdam êra dưi thâo. Adei Ka Tảo, brei thâo:

“Kâo čang hmăng phung hđeh êdam êra hruê anei srăng thâo mmuñ lu hĭn ênhiang mmuñ djuê ana pô; dŭm knăm m’ak dhar kreh dưi mđung lu hĭn hlăm đĭng mmuñ, tivi čiăng mâo lu mnuih thâo kơ dhar kreh djuê ana pô.

            Hdră kriê pioh klei blŭ, boh hră mnuih djuê ana ƀiă ăt mâo dŭm gưl bruă sang čư̆ êa ti Lâm Đồng mđing dlăng. Dŭm alŭ wăl ăt ba hdră mtô klei blŭ mnuih djuê ƀiă tinei mtam kơ phung hđeh djuê ana K’ho lehanăn dŭm djuê ana mkăn dôk hdĭp mda ti alŭ wăl.

            Hruê anei, dưi ƀuh ti dŭm ƀuôn sang K’ho, ƀuôn sang Lăn dap kngư mâo lu phung hđeh mâo hnơ̆ng hriăm, thâo lu čang hmăng dưi lŏ čuê knhuah gru jăk siam mơ̆ng djuê ana pô. Klei năng mđing phung hđeh anei mâo klei thâo săng klă kơ boh tŭ dhar kreh djuê ana. Čiăng hrăm mbĭt hŏng phung hđeh mnuih K’ho lehanăn dŭm djuê ana ƀiă mkăn ti alŭ wăl Lâm Đồng, dŭm gưl bruă djŏ tuôm brei lŏ pŏk adŭ bi hriăm kơ ênhiang mmuñ, ênhiang kdŏ, tông čing čhar, mtô klei blŭ, boh hră kơ phung hđeh mâo lu mnuih djuê ƀiă ăt msĕ mơh ti dŭm sang hră čiêm rông hđeh mnuih djuê ƀiă, mơ̆ng anăn đru mguôp hlăm bruă kriê pioh, mđĭ lar boh tŭ dhar kreh mơ̆ng djuê ana ƀiă./.