2 čô khua gĭt gai mnă klă mâo leh klei blŭ hrăm tŭ jing, bi tŭ ư kơ lu mta bruă bi mguôp yuôm bhăn, mđĭ hnơ̆ng klei bi hgŭm hdră êlan plah wah 2 ala čar. Khua lăn čar Nguyễn Xuân Phúc brei thâo, hŏng hnơ̆ng mnia mblei 2 nah mâo 11,5 êklai USD hlăm thŭn 2021, truh hnưm hĭn 2 thŭn leh anăn thŭn anei dưi mâo 13 êklai USD, 2 tĭng bi tŭ ư ba hnơ̆ng mnia mblei 2 tĭng đĭ 15 êklai USD. Thŭn kơ anăp, 2 ala čar bi hdơr 10 thŭn bi mguôp hdră êlan, pŏk sa wưng mrâo hlăm klei bi mguôp 2 ala čar.

Khua mil čhil Indonesia Joko Widodo mnă kơ Việt Nam mkŏ mjing klei găl kơ mnơ̆ng dhơ̆ng Indonesia mnia mblei kơ Việt Nam, boh nik jing boh mnga bruă lŏ hma. Hrăm mbĭt mtrŭt mđĭ bruă hiu čhưn ênguê, leh anăn bruă êdeh phiơr plah wah 2 ala čar bi leh bruă pŏk êlan phiơr mrâo mơ̆ng Đà Nẵng leh anăn Java, mđĭ hĭn dŭm gưl phiơr plah wah ƀuôn prŏng Hồ Chí Minh leh anăn Jakatar. Leh kơnăn Khua mil čhil Joko Widodo mâo klei iêo jak huă mnăm gưl knŭk kna hŏng Khua lăn čar Nguyễn Xuân Phúc.