30 thŭn êgao, phung ngă bruă klei mrâo VOV ti Lăn Dap Kngư klă sĭt jing phung ba anăp hlăm bruă dhar kreh, ngă jăk bruă klam klei mrâo krŭ kdơ̆ng: jing phung jâo hưn mtô mblang hdră êlan, hdră mơ̆ng Đảng, hdră bhiăn mơ̆ng Knŭk kna. Mkăp klei hâo hưn pral- djŏ klă. Mbĭt anăn lač djŏ kơ klei bhiăn soh, lač kơ djăp mnêč bai bi rai klei êđăp ênang, đru yuôm bhăn hlăm klei mđĭ kyar Lăn Dap Kngư.  Điểu Dũng ti să Dak Ndrung, kdriêk Dak Song, čar Dak Nông lač:

“Hdră mđung asăp blŭ klei M’Nông jăk snăk, mnuih ƀuôn sang khăp hmư̆. Hdră ƀrư̆ hruê jăk hĭn, hdră ƀĭng ngă lŏ hma ktrâo lač kơ mnuih ƀuôn sang hdră kriê dlăng ana pla mjing. Hâo hưn kơ hdră êlan mơ̆ng Đảng leh anăn knŭk kna truh hŏng mnuih ƀuôn sang. Kâo čang hmăng hdră mđung asăp blŭ klei Mnông mđĭ lar hdră mđung mtô lač kơ anak čô hriăm hră, hdră pla mjing tiu kphê... mnuih ƀuôn sang khăp hmư̆ snăk.”

Ka Lót (djuê ana K’Ho Mạ) ti să Lộc Bắc, kdriêk Bảo Lâm, čar Lâm Đồng jing sa čô khăp hmư̆ Hdră mđung klei K’Ho mơ̆ng Sang mđung asăp blŭ Việt Nam. Hmư̆ dŭm hdră ênhiang mmuiñ djuê ana, klei blŭ djuê ana pô, Ka Lot ƀuh mgei ai tiê. Jing knuă druh mă bruă ti ƀuôn sang, ñu ƀuh bruă klam yuôm bhăn mơ̆ng klei blŭ djuê ana amâo djŏ knŏng hlăm klei blŭ hrăm ôh, ƀiădah hlăm bruă mă grăp hruê. Kyua khăng hmư̆ hdră mđung asăp klei K’Ho mơ̆ng Sang mđung asăp blŭ Việt Nam anăn Ka Lot mâo thiăm klei thâo kơ dhar kreh djuê ana pô.

“Kâo pô khăp snăk hmư̆ klei mmuiñ long, ênhiang mmuiñ djuê ana pô, ƀiădah kâo pô amâo lač klă ôh leh anăn amâo thâo ôh ênhiang mmuiñ djuê ana… kâo pô jing sa čô khăp hmư̆ Radio. Đảng, Knŭk kna mđing ba klei blŭ K’Ho- Mạ hlăm Sang mđung asăp, kâo mơak snăk”

 Ha Hiếu (djuê ana K’Ho) dôk mă bruă ti Anôk bruă dhar kreh hâo hưn leh anăn mjuăt ktang asei mlei kdriêk Dam Rông, čar Lâm Đồng brei thâo, ñu ngă pô čih klei mrâo êjai, mblang êjai leha năn hdră mđung asăp klei K’Ho. Êngao kơ bruă mkra mjing hdră tinăn mtam, Sang mđung asăp - mđung rup kdriêk lŏ dơ̆ng mđung hdră mđung mơ̆ng Sang mđung asăp mđung rup čar Lâm Đồng leh anăn Hdră mđung asăp klei K’Ho mơ̆ng Sang mđung asăp blŭ Việt Nam kyua Anôk bruă dôk jưh ti Lăn Dap Kngư mkra mjing. Kyua anăn, mnuih K’Ho ti kdriêk krĭng taih kbưi Dam Rông hmư̆ lu klei hâo hưn leh anăn klă sĭt.

“Êlâo dih kâo nao mă bruă ti adŭ bruă kriê dlăng bruă knuă, leh anăn kâo ngă ti adŭ bruă djuê ana. Truh knhal jih thŭn 2018 kâo ngă bruă hlăm Sang mđung asăp blŭ mđung rup Dam Rôn. Bruă grăp hruê jing mblang klei Yuăn - K’Ho. Leh anăn snăn mđung asăp blŭ djuê ana K’Ho. Dŭm kdrêč hluê ngă tinei snăn djŏ tuôm kơ klei mkra mjing, mđĭ kyar mkra mjing gŏ sang, bruă răng mgang wăl hdĭp mda ti alŭ, hriăm hră mơ̆ng phung hđeh ti alŭ wăl.

30 thŭn êgao, Anôk bruă dôk jưh ti krĭng Lăn Dap Kngư hgao klei dleh dlan bi leh jăk bruă klam. Mơ̆ng klei čih, hâo hưn djăp ênŭm, êlam, djŏ hdră klei kđi čar, bruă duh mkra ala ƀuôn, êđăp ênang ala čar hlăm kluôm krĭng wăl hŏng ƀĭng dôk hmư̆, phung dlăng hlăm ala čar leh anăn ala tač êngao. Anôk bruă dôk jưh ti Lăn Dap Kngư đru mguôp jăk kơ bruă mđĭ klei tŭ dưn kơ bruă mkŏ mjing klei bi hgŭm jih jang mnuih ƀuôn sang, kơ klei mđĭ kyar mơ̆ng krĭng Lăn Dap Kngư./.