Mkŏ mjing mơ̆ng hruê 26/12/2022 lehanăn sui truh kơ Têt dương lịch 2023, Hruê kăm Dhar kreh – Hiu čhưn ênguê Măng Đen 2022 mâo Anôk bruă sang čư̆ êa kdriêk Kon Plŏng, čar Kon Tum mkŏ mjing ti Wăl hiu čhưn lăn mnga êa m’ak Măng Đen jak iêu leh lu phung tuê hiu čhưn tui ksiêm kơ dhar kreh Lăn dap kngư.  Adei Lương Phạm Việt Anh, tuê hiu čhưn mơ̆ng čar Dak Nông brei thâo, truh ti Măng Đen, Việt Anh dưi dlăng phung mbruă djuê ana Sedang tông čing čhar – kdŏ čhuang, mdah kdrăp tông ayŭ djuê ana lehanăn kâo ƀuh mnuih ƀuôn sang tinei jăk êdi. “Kâo ƀuh mdê mdô ƀiădah ăt jĕ giăm mơh, kyua sang kâo hriê hdĭp ti krĭng Lăn dap kngư kyua anăn kâo ăt jing mnuih krĭng anei mơh. Kâo khăp êdi kơ mnuih ƀuôn sang tinei, digơ̆ mhač êdi dlăng”.

Hlăm lu hdră dưi mkŏ mjing ti Wăl lăn mnga êa m’ak Măng Đen ƀri thŭn mrâo 2023, hdră jak iêu lu mnuih hĭn jing wăl anôk dhar kreh “Jăk siam Lăn dap kngư”. Tinei, gŭ kyâo dliê hngô, mâo 5 boh Sang Roong djuê ana mơ̆ng đưm mnuih Sedang êpul Mơ Nâm lehanăn Ca Dong dưi krŭ wĭt. Mbĭt hŏng anăn, jing dŭm êtuh mta mnơ̆ng siă suôr hŏng klei hdĭp mơ̆ng mnuih ƀuôn sang dưi rang mdah. Adei Nguyễn Ngọc Thủy Trang, sinh viên thŭn tal 2, Sang hră gưl prŏng FPT ti ƀuôn prŏng Hồ Chí Minh, brei thâo: “Anei jing gưl tal êlâo kâo truh ti Măng Đen, kâo ƀuh klei hdĭp mnuih ƀuôn sang tinei jăk êdi. Khădah kƀah lu mta mnơ̆ng ƀiădah ai tiê klei mĭn djăp ênŭm êdi. Kâo nao truh leh ti Đà Lạt, snăn kâo ƀuh Măng Đen amâo msĕ Đà Lạt ôh, gơ̆ mâo lu klei mdê. Hlăm êdei anăp, năng ai kâo srăng lŏ hriê čhưn ti Măng Đen hŏng găp kâo pô”.

Đặng Đình Toán, Khua adŭ bruă Dhar kreh lehanăn hâo hưn kdriêk Kon Plŏng brei thâo, čiăng jak iêu mnuih ƀuôn sang lehanăn tuê hiu čhưn tui ksiêm kơ dhar kreh Lăn dap kngư ti Wăl lăn mnga êa m’ak Măng Đen ƀri thŭn mrâo 2023, kdriêk mâo leh hdră duh bi liê kluôm. Mbĭt anăn, bi hgŭm hŏng pô mă bruă mkra bi msiam Minh Hạnh lehanăn pô tui ksiêm mnơ̆ng đưm Lăn dap kngư Đặng Minh Tâm srăng mkra sa wăl anôk dhar kreh Lăn dap kngư điêt ti Măng Đen: “Hluê wăl anôk dhar kreh anei, hmei mâo asăp hưn mthâo čiăng m’ĭt truh kơ jih jang anăn jing bruă kriê pioh, mđĭ lar dŭm boh tŭ yuôm dhar kreh djuê ana mơ̆ng đưm djŏ hdră kčah mtrŭn mơ̆ng Klei bi kƀĭn bruă dhar kreh kluôm ala thŭn 2021 mâo Khua gĭt gai Đảng Nguyễn Phú Trọng gĭt gai, anăn jing dhar kreh jing mngăt êwa mơ̆ng djuê ana, dhar kreh mtrang mngač kơ mnuih ƀuôn sang lehanăn dhar kreh dôk djuê ana ăt dôk mơh. Anei jing mta phŭn hmei čiăng m’ĭt kơphung tuê hiu čhưn dlăng dhar kreh ti kdriêk Kon Plŏng”.