Mơ̆ng aguah ưm, ti sang H’Thinh Kƀuôr leh anăn Y-Lê Niê mâo leh lu mnuih. Pô đru koh adhan kyâo, kă kpiê čeh, pô tŭk knă, pô čuh ŭn mnŭ, mprăp mnơ̆ng ngă yang. Y-Lê Niê, pô sang brei thâo, hruê anei gŏ sang dôk mprăp klei ngă yang akâo klei suaih pral kơ Y-Hai Kƀuôr, kreh iêo aê H’Rao, jing awa mơ̆ng H’Thinh:

 “Mkŏ mjing klei ngă yang akâo klei suaih pral kơ awa, djŏ hruê k’kiêng kơ ñu kyuanăn hmei ngă yang, akâo kơ ñu mâo klei suaih pral êđăp ênang. Êlâo kơ hruê mkŏ mjing, hmei duah ŭn mnŭ, kpiê čeh leh anăn đa đa mnơ̆ng mkăn. Hưn hŏng ƀuôn sang, găp djuê hriê mơak mbĭt hŏng gŏ sang leh anăn hơêč hmưi kơ Awa”.

Leh mprăp jih mnơ̆ng ngă yang, hŏng pui diăn trơ̆ng ti mtil, hdăng pui dôk ƀơ̆ng, čhiêng kông mâo kpiê, êhăng, êsei, sa drei mnŭ ăm. 8 boh čeh kpiê kă ti krah sang, hlăm anăn 1 boh ngă yang kơ aduôn aê atâo tiêt, 5 boh čeh ngă yang akâo klei suaih pral kơ aê H’rao leh anăn dŭm adôk pioh mdơ̆ng kơ tuê.

Ênai čing kwang, hưn kơ klei ngă yang dơ̆ng leh. Ênai čing kwang nanao hlăm mmông ngă yang, pô dưi ngă yang dôk ti mtih ngŏ, ti djiêo mnơ̆ng ngă yang. Tlă anăp jing pô ngă yang, gŏ sang leh anăn phung tuê.

Klei ngă yang akâo klei suaih pral mâo 3 kdrêč jing ngă yang iêo aduôn aê tâo tiê, ngă yang akâo klei suaih pral leh anăn ngă yang lač jăk, mă klei hơêč hmưi mơ̆ng gŏ sang, găp djuê.

Hơô ao Êđê, Aê H’rao thŭn anei 82 thŭn hơ̆k mơak êdi mâo anak čô, amuôn adei ngă klei ngă yang akâo klei suaih pral. Anei jing gưl tal 4 ñu mâo klei ngă yang msĕ sơnei.

 “Hruê anei jing hruê mơak, hruê jăk, lač jăk kơ anak čô, amuôn adei, grăp djuê mkŏ mjing klei ngă yang anei, lŏ wĭt bi hdơr knhuah gru aduôn aê đưm. Kâo ară anei thŭn khua ai awăt srăng ngă yang hrô kơ klei hơêč hmưi mơ̆g anak čô čiăng kơ kâo mâo klei suaih pral, hdĭp yâo mơak. Kâo ƀuh hơ̆k mơak êdi, lač jăk kơ gŏ sang, anak čô, amuôn adei leh anăn mnuih ƀuôn sang hriê mơak mbĭt”.

Leh grăp kdrêč klei ngă yang, aê H’rao mbĭt hŏng pô ngă yang ƀơ̆ng sa kpăt êsei, sa klŏ kđeh čĭm, mnăm kpiê čeh msĕ si drông dŭm klei jăk mơ̆ng klei ngă yang. Pô ngă yan jao đĭng ƀuôp kpiê kơ aê H’rao leh anăn ngă klei jao kông. Leh anăn jing anak čô, gŏ sang, grăp djuê bi čŭt kông, brei mnơ̆ng kơ aê H’rao.

Hluê si pô ngă yang Y-Čôč Niê, kreh iêo aê Lê, ti ƀuôn Mlăng, să Ea Tar, kdriêk Čư̆ Mgar, čar Dak Lak, mnuih Êđê dlăng kơ kông msĕ si mnơ̆ng bi klă kơ sa klei ƀuăn kjăp, sa klei hmăng hmưi hdĭp sui. Hlăm klei ngă yang akâo klei suaih pral, mă kông jing hdră bhiăn yuôm bhăn bi klă klei đĭ hriê kơ prŏng, ăt msĕ mơh boh tŭ dưn hlăm sa klei hdĭp mnuih. Pô ngă yang aê Lê brei thâo, grăp blư̆ ngă yang, kông srăng lŏ dưi krah sa êlan. Anak čô, gŏ sang ăt mđup brei kông msĕ si klei hơêč hmưi kơ pô dưi ngă yang.

 “Grăp čô anak čô, găp djuê mơ̆ng pô dưi ngă yang srăng hơêč hmưi kơ pô anăn hŏng klei čŭt kông, klei băk, mđup brei mnơ̆ng kơ pô anăn. Klei anăn amâo djŏ knŏng jing klei hrăm mbĭt ƀiădah lŏ jing klei hơ̆k mơak, klei jĕ giăm mơ̆ng anak čo, găp djuê, bi klă klei mjĕ giăm tian prôč, êjai sang mâo bruă srăng bi đru bi gui. Čŭt kông ăt bi êdah kơ klei mjĕ giăm anăn”.

Hŏng mnuih Êđê, ngă yang akâo klei suaih pral jing hdră bhiăn yuôm bhăn jing krŭ kruăk knăl amâodah sa boh tŭ dưn hlăm klei hdĭp grăp čô, boh nik jing phung êkei. Hŏng grăp čô dưi mkŏ mjing klei ngă yang akâo klei suaih pral jing klei myưng mơang kyuadah knŏng gŏ sang thâo mâo kơh dưi mkŏ mjing. Kyuanăn yơh, hlăm klei hdĭp ară anei, dŭm klei ngă anăn anăn mkŏ mjing ƀiă êjai. Y-Wem Hwing, k’iăng khua bruă sang čư êa kdriêk Čư̆ Mgar, čar Dak Lak lač, bruă mkŏ wĭt klei ngă yang akâo klei suaih pral leh anăn lu hdră bhiăn mkăn jing sa hdră jăk čiăng dưi djă pioh leh anăn bi lar knhuah siam dhar kreh mơ̆ng dŭm djuê ana ti alŭ wăl.

 “Klei ngă yang akâo klei suaih pral mrâo mkŏ wĭt dưi bi hdơr knhuah gru jăk siam mơ̆ng mnuih Êđê hlăm bruă ngă yang akâo klei suaih pral kơ gŏ sang, mtô mjuăt phung mda asei thâo săng boh tŭ yuôm mơ̆ng bruă ngă yang asei čiăng kơ êdei anăp srăng bi lar, hưn mdah rup siam mnuih ƀuôn sang Čư̆ Mgar, hluê anăn đru mđĭ kyar bruă hiu čhưn ênguê yang ƀuôn mơ̆ng kdriêk”.

Hlăm wăl klei ngă yang akâo klei suaih pral mơ̆ng mnuih Êđê, mnuih ƀuôn sang, phung tuê ƀuh klă knhuah siam dhar kreh dưi bi êdah. Anăn jing klei tông čing, mâo ênai čĭng kơ mâo klei ngă yang. Anăn jing kpiê čeh, klei ngă yang ktang prŏng ktang lu čeh kpiê, čeh mâo kpiê yuôm, bi êdah bruă klam, kơhưm gŏ sang. Anăn jing wăl dhar kreh mnơ̆ng ƀơ̆ng huă, hŏng kngan thâo mbruă mơ̆ng phung amai adei, dŭm mta mnơ̆ng ƀơ̆ng jăk mâo ênŭm hlăm klei huă ƀơ̆ng. Mbĭt hŏng anăn jing klei bi mguôp gŏ sang, găp djuê leh anăn klei thâo mpŭ mơ̆ng anak čô hŏng phung mduôn hlăm gŏ sang, hlăm găp djuê mnuih Êđê.