Drei dôk hmư̆ pô thâo mbruă Y-Đhin Niê khan kơ Mdrŏng Dam. Mơ̆ng điêt, ayŏng Y-Đhin Niê hmư̆ klei khan, klei mmuiñ ênhiang djuê ana, klei yăl đưm hlue si klei duê. Ñu yăl dliê, hlăk dôk hđeh, klei mơak prŏng hĭn jing dôk djiêu kpur hmư̆ phung thâo mbruă khan. Hlăk anăn, grăp blư̆ hmư̆ phung thâo mbruă khan, ñu knŏng mă asăp hŏng đĭng mmuiñ wĭt lŏ hmư̆. Amâo thâo ôh mơ̆ng hbĭl klei khan, ênhiang buôt chôč kma hlăm mngăt êwa ai tiê ñu. Hŏng ñu, phung thâo mbruă thâo khan jing gru mngač kơ ñu tui hriăm, jing phung Yang brei klei thâo khan yuôm bhăn. Ayŏng Y-Đhin Niê brei thâo: “Sĭt hmư̆ phung thâo mbruă khua thŭn khan pô dôk hmư̆ leh anăn gĭr hdơr hlăm ai tiê. Dŭm klei yăl dliê khan hdơr hlăm ai tiê leh anăn lŏ hlue mmuiñ, êlâo adih amâo mâo hră mơar čih pioh ôh. Leh anăn tơdah arăng čih hlăm hdruôm hră snăn kăn mâo lu mnuih dưi hdơr leh mơh. Dưi lač jing klei thâo mdê mdê kơ grăp čô mnuih, mnuih Êđê lač Yang brei. Klei thâo Yang brei kơ sa čô yuôm bhăn snăk čiăng dưi hdơr hlăm ai tiê lu klei yăl dliê dlông msĕ snăn”

Amĭ kkiêng leh anăn hriê kơ prŏng ti krĭng lăn Dam Săn jing ƀuôn Ea Sah, klei khăp kơ klei khan hlăm ai tiê Y-Đhin Niê ƀrư̆ prŏng. Leh dôk mô̆, ñu ăt tui duah phung thâo mbruă khua thŭn čiăng hmư̆ klei yăl dliê ñu ka tuôm hmư̆, amâodah lŏ yăl dliê wĭt čiăng hdơr hlăm ai tiê. Phung jhŏng ktang hlăm klei khan, amâodah ênhiang êdu êun, klei duê bi hmô jăk siam kma hlăm ai tiê Y-Đhin Niê mơ̆ng điêt. Truh ară anei, ñu tuč klei khan msĕ si Dam săn, Dam Yi, Mdrŏng Dam…Êngao anăn, ñu lŏ tuč lu klei kưt kơ klei hdĭp, amâodah mtă mtăn ênuk êdei, klei eirei kơ ƀuôn sang, klei khăp mniê êkei… Pô thâo mbruă Y-Đhin Niê brei thâo, boh blŭ hlăm klei khan Êđê jing klei bi mguôp jăk soiam klei duê hŏng ênhiang mmuiñ. “Kdrăp ayŭ mbĭt hŏng khan jing buôt čhôč. Tơdah mâo dua čô snăn sa čô ayŭ buôt čhôč leh anăn sa čô khan. Tơdah amâo mâo snăn sa čô khan leh năn ayŭ buôt čhôč, jing mmuiñ khan, truh kơ kdrêč kkăn snăn srăng ayŭ buôt čhôč leh anăn lŏ mmuiñ dơ̆ng. Phung dôk hmư̆ amâo kah mbha gưl thŭn ôh, mâo mnuih srăng čŏng hdơr klei khan, msĕ si kâo thâo khan jing hmư̆ phung thâo mbruă khua thŭn khan, phung hđeh sĭt hmư̆ srăng pĭt jăk kyua ênhiang êdu êun, bi phung êdam êra, phung khua thŭn snăn khăp mđing hmư̆…”

Hŏng klei thâo yang brei kơ klei hdơr klei khan leh anăn ênhiang mmuiñ djuê ana, Y-Đhin Niê mâo leh lu klei dhar kreh djuê ana jăk siam. Anăn jing mnơ̆ng yuôm djuê ana, anăn ñu hmao lŏ bi hriăm kơ ênuk mda asei, čiăng kriê pioh klei jăk siam mdê hjăn mơ̆ng klei khan djuê ana pô. Ayŏng Y-Đhin Niê brei thâo, ñu lŏ čiăng hriăm lu hĭn, ƀiădah phung thâo mbruă khua thŭn ăt kăn lŏ hdơr lu mơh.“Kâo čang hmăng dưi ba hlăm hdră mtô bi hriăm sang hră kơ anak čô thâo kơ klei khan. Mơ̆ng anăn mđĭ ai anak čô drei khăp kơ dhar kreh djuê ana pô. Kriê pioh leh anăn mđĭ lar mta anei čiăng đăm luč ram. Kâo ƀuh dleh snăk dưi ngă klei anei. Ƀiădah amâo djŏ amâo mâo ôh mnuih khăp kơ klei khan leh anăn čiăng dưi hriăm khan”

Lu thŭn êgao, pô thâo mbruă Y-Đhin Niê jing sa hlăm ênoh ƀiă pô thâo mbruă dưi nao hlăm lu klei mjĕ êrô leh anăn rang mdah klei kdŏ mmuiñ djuê ana hlăm leh anăn êngao čar. Lu mnuih thâo kơ ñu amâo djŏ knŏng asăp khan êdu êun ôh ƀiădah lŏ jing mnuih đru mguôp răng kriê klei dhar kreh jăk siam djuê ana pô./.