VOV4.Êđê - Aguah mbrue (10/9), ti Hà Nội, Êpul mtrŭt mjhar, lehanăn iêu hgŭm bruă hlăm yang ƀuôn – Êpul khua kiă kriê bruă mdrơ̆ng hŏng klei ruă tưp Covid 19 mkŏ mjing leh klei bi kƀĭn hlue ngă hdră lŏ dơ̆ng mtrŭt mjhar, iêu mkrum “Jih jang phung ƀuôn sang bi mguôp, jih ai tiê gang mkhư̆ klei ruă tưp Covid 19”. Khua bruă mặt trận čar kwar Gưl dlông Việt Nam Đỗ Văn Chiến, jing khua kiă kriê klei bi kƀĭn mtrŭt mjhar brei thâo, čiăng dưi mâo ai ktang hlăm bruă gang mkhư̆ klei ruă tưp, Êpul mtrŭt mjhar lehanăn iêu mkrum yang ƀuôn srăng mkŏ mjing iêu jak phung knuă druh, mnuih ngă bruă hlăm kluôm ala bi mguôp ƀiă êdi sa hrue prăk mlan pioh đru kơ bruă gang mkhư̆ klei ruă tưp. Mbĭt hŏng anăn mtrŭt mjhar phung duh mkra, êpul bruă lehanăn mnuih bi đru mnơ̆ng ƀơ̆ng huă kơ puhng dôk hlăm anôk kwang dar, mdrao mgŭn klei ruă. Lehanăn êpul hgŭm mtrŭt mjhar mkŏ mjing klei bi đru êsei hŏng ai tiê klei khăp, đru kơ phung dleh dlan kyua klei ruă tưp./.

Y Khem pô mblang