VOV4.Êđê -  Dŭm hruê êgao, ƀuôn prŏng Ƀuôn Ama Thuôt, čar Dak Lak mâo lu nanao mnuih ruă Covid 19, klei năng mđing, ênoh mnuih ruă hlăm êpul êya truh giăm mkrah wah ênoh mnuih ruă giăm anei. Kñăm bi hrŏ klei ktrŏ kơ dŭm anôk bi ktlah lehanăn dŭm boh sang êa drao mdrao mnuih ruă Covid 19, ƀuôn prŏng Ƀuôn Ama Thuôt hluê ngă leh hdră bi ktlah F1 ti sang lehanăn dôk mprăp dŭm hdră kñăm mdrao F0 ti sang. Knŏng tĭng mơ̆ng akŏ mlan 11 truh kơ ară anei, ƀuôn prŏng Ƀuôn Ama Thuôt mâo leh 500 čô ruă Covid 19, hlăm anăn mâo 200 čô ruă hlăm êpul êya.

Hlăm hruê 8/11, ƀuôn prŏng Ƀuôn Ama Thuôt mâo ênoh mnuih ruă lu hĭn êdi truh 123 čô, hlăm anăn mâo 81 čô hlăm êpul êya, mđĭ ênoh mnuih ruă Covid 19 ti ƀuôn prŏng Ƀuôn Ama Thuôt truh 1.359 čô ruă. Ti anăp ênoh mnuih ruă đĭ lu, ƀuôn prŏng Ƀuôn Ama Thuôt ba mdah leh Hdră kčah hluê ngă hdră bi ktlah ti sang hŏng phung F1 mâo djăp klei găl dôk bi ktlah hluê si klei kčah mtrŭn mơ̆ng Phŭn bruă mdrao mgŭn. Ară anei mâo êbeh 50 čô jing F1 dôk bi ktlah ti sang. Hlăm hruê 8/11, kluôm čar Dak Lak mâo 287 čô djŏ Covid 19, hlăm anăn mâo 127 čô ruă hlăm êpul êya. Anei jing hruê mâo ênoh mnuih ruă lu êdi mơ̆ng êlâo adih truh kơ ară anei./.

H Nêč pô mblang