VOV4.Êđê- Hruê 7/10, ti ƀuôn prŏng Đà Lạt, Êpul bi ala anôk bruă kƀĭn ala čar Lâm Đồng mkŏ mjing leh Klei bi kƀĭn hŏng phung bi ala dŭm êpul êya, anôk bruă, êpul bruă Đảng, bruă sang čư̆ êa, anôk bruă mặt trận čar lehanăn dŭm kdriêk Lạc Dương, Đơn Dương, Đức Trọng hŏng hdră klă anăp lehanăn online. Ti anôk bi tuôm, phung bi ala anôk bruă kƀĭn ala hưn mthâo leh kơ mnuih ƀuôn sang čar Lâm Đồng dŭm mta phŭn hlăm klei bi kƀĭn tal 2, anôk bruă kƀĭn ala gưl XV tĭng srăng pŏk mơ̆ng hruê 20/10 truh kơ hruê 13/11 kơ anăp, hưn mdah kluôm bruă duh mkra – ala ƀuôn mơ̆ng alŭ wăl lehanăn mơ̆ng kluôm ala hlăm 9 mlan akŏ thŭn lehanăn hdră kčah 3 mlan knhal jih thŭn 2021. Mbĭt hŏng bruă bi êdah klei đăo knang, klei mđing dlăng mơ̆ng Đảng, Knŭk kna hlăm hdră mđĭ kyar bruă duh mkra – ala ƀuôn, bruă gang mkhư̆ klei ruă Covid 19, mnuih ƀuôn sang čar Lâm Đồng lŏ hưn mthâo dŭm bruă čiăng mâo klei mđing dlăng msir mghaih lehanăn ƀư̆ mkra. Anăn jing hdră kriê dlăng, răng mgang dliê adôk mtŭk mtŭl, anôk hrui blei mnơ̆ng lŏ hma amâo h’ĭt, bruă ngă lŏ hma hluê hdră mrâo adôk êdu kƀah, klei čan prăk hŏng ênoh prăk mnga ktrŏ dôk mâo ti krĭng ƀuôn sang, klei huĭ tưp djŏ klei ruă Covid 19 ti anôk anôk čhĭ mnia lehanăn phung mgăt êdeh ktuê êlan kbưi dleh dưi ksiêm dlăng....

Pô mblang: H’Nêč Êñuôl