VOV4.Êđê- Hruê 29-9, Êpul bi ala čar Dak Lak mkŏ mjing klei bi tuôm êlâo kơ klei kƀĭn tal 2, Bruă kƀĭn ala gưl XV. Lu klei blŭ mđing kơ dŭm hdră msir čiăng  hluê ngă hdră kñăm “mdua” mđĭ kyar bruă duh mkra - ala ƀuôn, gang mkhư̆ klei ruă tưp tŭ dưn mâo phung bi ala lač. Hlăm dŭm anôk bi tuôm, phung bi ala čar Dak lak akâo kơ Bruă kƀĭn ala, Knŭk kna, dŭm phŭn, dhar bruă Gưl dlông leh anăn čar lŏ dơ̆ng gĭt gai jăk hdră gang mkhư̆ klei ruă tưp Covid-19, mjing phŭn vaccin tlŏ mgang kơ mnuih ƀuôn sang, mđĭ êpul mdrao mgŭn, êpul mă bruă, kdrăp mnơ̆ng, boh nik êpul knuă druh mdrao mgŭn nah gŭ čiăng hnưm msưh kdŭn klei ruă tưp, ba lăn čar hnưm lŏ wĭt msĕ aguah tlam.

Mbĭt hŏng anăn, phung bi ala ăt akâo: brei mkra mlih, mbŏ dŭm hră mơar hdră bhiăn msĕ si: Hdră bhiăn lăn ala, Hdră bhiăn kčŭt kđi thŭn 2015, Hdră bhiăn mŭt nao ngă kahan, Hdră bhiăn pah mni… čiăng dŭm gưl, dhar bruă ênưih pŏk ngă rơ̆ng ƀah mkra klei ngă soh hŏng hdră bhiăn leh anăn djŏ hŏng boh sĭt hlăm klei hdĭp.

Pô mblang: H’Zawut Ƀuôn Yă