VOV4.Êđê- Jing sa hlăm dŭm bruă ngă ƀri wưng bi hdơr 91 thŭn hruê mkŏ mjing êpul hgŭm bruă phung mniê Việt Nam leh anăn hruê phung mniê Việt Nam 20/10, ti ƀuôn prŏng Kon Tum êpul hgŭm bruă phung mniê Việt Nam mkŏ mjing leh klei kƀĭn đru kơ phung mniê kčưm klei mă bruă knuă, mnia mblei, mkŏ mjing anăn knăl nao mbĭt hŏng dŭm mta mnơ̆ng dhơ̆ng OCOP leh anăn bi mklin klei bi lông phung mniê kčưm ngă bruă hŏng klei thâo thŭn 2021.

Leh 4 thŭn tui ngă hdră mkăp “Đru kơ phung mniê kčưm ngă bruă wưng thŭn 2017-2025”, mâo leh 9 klei bi lông kčưm ngă bruă mơ̆ng phung mniê čar Kon Tum mâo klei pah mni mơ̆ng êpul hgŭm bruă phung mniê gưl dlông Việt Nam mkŏ mjing. Dŭm gưl bruă hlăm êpul ti čar Kon Tum bi mguôp, dưi ngă 30 klei kčĕ kčưm ngă bruă knuă, grăp čô hlăm êpul nao hgŭm mkŏ mjing 34 mnơ̆ng dhơ̆ng OCOP hlăm čar. Hlăm klei bi kƀĭn anăn, dŭm klei blŭ mơ̆ng phung bi ala dưi mblang klă hdră đru kơ phung mniê kčưm ngă bruă, klei hriăm hlăm bruă duah anôk mnia mblei, mtrŭt mđĭ klei čhĭ mnia, hưn kơ mnơ̆ng dhơ̆ng pô.

Pô mblang: Y-Ƀel Êban